ايماقتار • 15 قاڭتار، 2021

الماتى وبلىسىندا جالپى وڭىرلىك ءونىمدى 5 ترلن. تەڭگەگە جەتكىزۋ كوزدەلەدى

7 رەت كورسەتىلدى

الماتى وبلىسىندا ەكونوميكانىڭ تۇراقتى دامۋىن جىل سايىن ورتا ەسەپپەن 4%-كە قامتاماسىز ەتۋ شارالارى كوزدەلىپ وتىر. ءسويتىپ جالپى وڭىرلىك ءونىمدى 2025 جىلعا قاراي 5 ترلن. تەڭگەگە جەتپەك. وبلىستىق ءماسليحاتتىڭ جاڭادان سايلانعان دەپۋتاتتارى بۇگىن 1-ءشى سەسسيادا وسى جانە وزگە دە ماقسات-مىندەتتەر بەلگىلەنگەن ءوڭىردىڭ 2021-2025 جىلدارعا ارنالعان دامۋ باعدارلاماسىن ءبىراۋىزدان قولدادى، دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.

سەسسيا بارىسىندا ايماقتىڭ بەس جىلعا ارنالعان دامۋ باعدارلاماسى جايلى وبلىس اكىمىنىڭ ورىنباسارى ج. تۇياقوۆ باياندادى. ونىڭ ايتۋىنشا، ءوڭىر ەكونوميكاسىن كوتەرۋ – باعدارلامانىڭ ءبىرىنشى جانە نەگىزگى باعىتى. ول ءۇشىن وڭدەۋ ونەركاسىبىنىڭ باسەكەگە قابىلەتتىلىگىن ارتتىرۋ ماقساتى العا قويىلعان. بۇگىنگى تاڭدا وبلىستىڭ ينۆەستيتسيالىق پورتفەلىنە 5،4 ترلن. تەڭگەگە 546 جوبا ەنگىزىلدى.  ونىڭ ىشىندە وڭدەۋ ونەركاسىبىندە 2021-2025 جىلدارى ءتورت جارىم مىڭ جۇمىس ورنىن قۇرا وتىرىپ، ينۆەستيتسيالار كولەمى 690 ملرد.تەڭگە بولاتىن 37 جوبا ىسكە اسىرىلادى.

ولاردىڭ اراسىندا ترانسۇلتتىق كومپانيالاردىڭ قاتىسۋىمەن جۇزەگە اسىرىلاتىن ىلە اۋدانىندا ۇساق مالدى تەرەڭ وڭدەيتىن «جەتىسۋ قوي»، قاپشاعاي قالاسىندا ءىرى قارا مال ەتىن وڭدەيتىن «تايسون فۋدس»، كەربۇلاق جانە ۇيعىر اۋداندارىندا «پريما قۇس»، «كاۋساراگرو» قۇس فابريكالارى، ەڭبەكشىقازاق اۋدانىندا «جەتىسۋ ۆولفرامى» كەن وڭدەۋ زاۋىتى، سارقان اۋدانىندا «Kunkuat» جەل ەلەكتر ستانتسياسىنىڭ قۇرىلىسى سياقتى جوبالار بار. سونىڭ ناتيجەسىندە شيكىزاتتىق ەمەس ەكسپورت كولەمى جىل سايىن 8%-كە، وڭدەۋ ونەركاسىبىندەگى ەڭبەك ونىمدىلىگى 6%-كە ارتادى.

ج. تۇياقوۆتىڭ ايتۋىنشا، اۋىل شارۋاشىلىعىندا باسىمدى داقىلدار ەگىستىگىنىڭ كولەمى ۇلعايتىلادى. ون ءۇش اۋداندا 30 مال بورداقىلاۋ الاڭى مەن 22 ءسۇت-تاۋارلى فەرماسىن قۇرۋ جوسپارلانىپ وتىر. وسىنىڭ ءبارى 2025 جىلعا قاراي اۋىل شارۋاشىلىعىنىڭ جالپى ءونىمىن 1،3 ترلن. تەڭگەگە، ەڭبەك ونىمدىلىگىن 2،5 ەسە ءوسىرىپ، 6 ملن. تەڭگەگە جەتكىزۋگە مۇمكىندىك بەرەدى.

وبلىستا شاعىن جانە ورتا بيزنەستىڭ جالپى وڭىرلىك ونىمدەگى ۇلەسىن 2025 جىلعا قاراي 38%-كە دەيىن جەتكىزۋ جوسپارلانۋدا. ول ءۇشىن «بيزنەستىڭ جول كارتاسى» اياسىندا جىل سايىن 265 كاسىپكەرگە قولداۋ كورسەتىلىپ، «ەڭبەك» باعدارلاماسى بويىنشا 3 مىڭنان استام ادام شاعىن نەسيەلەر مەن گرانتتار الاتىن بولادى.

ءوڭىر ەكونوميكاسىنداعى لوكوموتيۆتەردىڭ ءبىرى رەتىندە تۋريزمگە دە باعدارلامادا زور ءمان بەرىلگەن. قولداۋ شارالارىنىڭ ارقاسىندا تۋريستىك اعىن 2025 جىلعا قاراي 3،5 ملن. ادامعا جەتەدى، بۇل بيۋدجەتتىڭ كىرىس بولىگىنە قوماقتى ۇلەس قوساتىن بولادى.

اتاپ وتسەك، الماتى وبلىسىنىڭ 2021-2025 جىلدارعا ارنالعان دامۋ باعدارلاماسىن جۇزەگە اسىرۋعا 3،5 ترلن. تەڭگە قاراستىرىلعان، ونىڭ 2 ترلن. 300 ملرد. تەڭگەسى – بيۋدجەتتىك، 1 ترلن. 200 ملرد. تەڭگەسى - جەكە قاراجات.

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار