بۇل انت قابىلداۋ ءراسىمى بۇرىنعىدان وزگەشە ءوتتى. الەمدە بەلەڭ العان ىندەتتىڭ الدىن الۋ ماقساتىندا جاس ساربازداردىڭ اتا-انالارى ۇلدارىنىڭ انت قابىلداۋ ءراسىمىن اسكەري ءبولىمنىڭ الەۋمەتتىك جەلىدەگى پاراقشاسىنان تىكەلەي ەفيردە تاماشالادى. سارباز بولىپ ساپ تۇزەپ, وتان الدىندا سەرت بەرگەن ورەندەردى قازاقستان رەسپۋبليكاسى توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى گەنەرال-مايور ۇلاربەك ابىكەەۆ باستاعان قوناقتار قۇتتىقتاپ, ەل تىنىشتىعىن كۇزەتۋ ابىرويلى ءىس ەكەنىن وتان قورعاۋشىلاردىڭ جادىنا تاعى ءبىر سالىپ ءوتتى.
– اسكەري انت قابىلداۋ – وتانىڭا, حالقىڭا اقتىق دەمىڭ شىققانشا ادال بولۋ, ەل باسىنا سىن ساعات تونسە, مويىماي كوتەرۋ, قاجەت بولسا جان قيۋ دەگەن ءسوز. انت – ادالدىق رۋحى. حالقىمىز «انتتان اتتاعانى – اردان اتتاعانى» دەيدى. ياعني ادامزات نورمالارىنىڭ قالىپتاسقان شەگى ار بولسا, ونى بۇزۋ وپاسىزدىققا جاتادى. بۇگىن سايدىڭ تاسىنداي 200 ساربازىمىز اسكەري انت قابىلداپ, وتان قورعاۋشىلاردىڭ قاتارىنا قوسىلدى. وسى ۋاقىتتان باستاپ ولارعا جۇكتەلگەن مىندەت تە زور. ويتكەنى اسكەري انت – اسكەري ءومىردىڭ وزگەرمەيتىن زاڭى. وندا وتاندى قورعاۋدىڭ, ونىڭ ىشىندە حالىققا جانە زاڭدى سايلانعان پرەزيدەنتكە ادال قىزمەت ەتۋدىڭ ايقىن بەلگىلەرى بار. اسكەري ءومىر قانشالىقتى قيىن بولعانىمەن, جارعىمەن بەلگىلەنگەن تالاپتاردى ورىنداۋ – پارىز جانە قاسيەتتى مىندەت. ساربازداردىڭ مىندەت – وزىنە جۇكتەلگەن مىندەتتى ابىرويمەن ورىنداۋ, – دەيدى 28 237 اسكەري ءبولىمىنىڭ كومانديرى پودپولكوۆنيك دانيار قاسىموۆ.
انت قابىلداپ, ناعىز سارباز اتانعان جاس جاۋىنگەرلەر الداعى ۋاقىتتا كەڭەس وداعىنىڭ باتىرى باۋىرجان مومىش ۇلىنىڭ ەسىمىن يەلەنەتىن اسكەري ءبولىم جەكە قۇرامىنىڭ ساپىندا رەسپۋبليكا كولەمىندەگى ازاماتتىق قورعانىس سالاسىنداعى توتەنشە جاعدايلاردىڭ سالدارىن جويۋ جانە اپات بولعان جەرلەردە قۇتقارۋ جۇمىستارىن جۇرگىزۋ بويىنشا ءتۇرلى مىندەتتەردى ورىندايتىن بولادى.
الماتى
