نۇر-سۇلتاننىڭ ماڭايىنان ءۇي سالعىسى كەلىپ, ارزان جەر تەلىمىن ىزدەپ جۇرگەن ءبىر اقىن تانىسىمىزدى قالامداس زامانداسى: «ادام جەردە ءجۇرىپ تە جەر ىزدەيدى ەكەن-اۋ», دەپ قاعىتادى.
قالانىڭ كورىكتى اۋدانىندا ءزاۋلىم ءۇيدىڭ بالكونىنان ءۇرىپ تۇرعان ءيتتى كورىپ: «دوكەيلەردىڭ ءيتى بولعىم كەلەدى...» دەپ جازعان اقىن دا بار. بۇل – ەندى باسپاناسىزدىقتىڭ زارىن ابدەن تارتقان, شاراسى تاۋسىلۋعا جاقىنداعان ادامنىڭ ءسوزى.
اقىن دەگەن حالىقتىڭ ءۇنىن, مۇڭىن كوركەمدەپ جەتكىزۋشى عوي. باسپانانى جىرعا قوسسا, دەمەك ەلدەگى اسقىنعان الەۋمەتتىك پروبلەمانى ايتقانى. باسقالاردىڭ ايتقانى ءبىر بولەك تە, اقىننىڭ ايتقانى ەرەكشە ەستىلەرى ءھام باعىتتالعان ادرەسىنە ءدوپ تيەرى حاق! ايتپەسە قاسىم اقىننىڭ: «بەرمەسەڭ بەرمەي-اق قوي باسپاناڭدى, سوندا دا تاستامايمىن استانامدى...» دەگەنى افوريزمگە اينالىپ كەتەر مە ەدى؟!
اسقاق دۇنيەلەردى ەمەس, كاكىر-شۇكىر الەۋمەتتىك ماسەلەنى ءسوز ەتتىڭ دەپ قالامگەرلەردى كىنالاۋعا استە بولمايدى دەگەن ويدامىز. سەبەبى پاتەر دەگەن جاي عانا تاستان قالانعان ءتورت قابىرعا ەمەس. ول باقۋاتتى ءومىردىڭ كورىنىسى, وتباسى بەرەكەسىنىڭ ماڭىزدى ءبىر كىلتى ەكەنى تۇسىنىكتى. ال اقىندار ءوز پروبلەماسىن تىلگە تيەك ەتە وتىرىپ, قوعامنىڭ بەرەكەسى تۋرالى وي قوزعايدى.
ءبىز بۇگىنگىلەردى ايتامىز, «شاڭىراعىن ارقالاپ كوشىپ جۇرگەن بۇعى مىنەز بابالارىمىزدىڭ» ءوزى التى قانات اق ورداسىن جىرعا قوسقانى تەگىن ەمەس شىعار. ايتپەسە, باياعى حان-سۇلتانداردىڭ زامانىندا ءومىر سۇرگەن جيرەنشە شەشەن:
«قايران مەنىڭ ءوز ءۇيىم,
كەڭ سارايداي بوز ءۇيىم», دەپتى دەسەدى كۇركەسىنەن اياعى سىرتقا شىعىپ جاتىپ.
اقتامبەردىنىڭ تولعاۋىن تىڭداساڭىز, وندا دا:
«وزەنگە بيە بايلاتىپ,
توسكەيدە وردا ورناتىپ,
تورتكىلدەپ وشاق قازدىرىپ,
توبەل بيە سويعىزىپ,
تومەندە ءبيدىڭ كەڭەسىن,
ءبىز دە ءبىر قۇرار ما ەكەنبىز» دەپ كەلەدى.
جالپى, بۇل باسپانا ماسەلەسى قازاق قوعامى وتىرىقشى ومىرگە كوشىپ, تاس قالادا تۇرا باستاعاننان بەرى كۇشەيگەنى تۇسىنىكتى. قازاقتىڭ عانا ەمەس, جالپى ادامزاتتىڭ دا اڭسارى سول جايلى باسپانا, باقۋات ءومىر شىعار, بالكىم.
تاۋەلسىزدىك جىلدارىندا قانشاما مەملەكەتتىك باعدارلامالار قابىلدانىپ, ميللياردتار قۇيىلىپ جاتسا دا, ماسەلەنىڭ شەشىلەتىن ءتۇرى كورىنبەيدى. شەشىلمەگەسىن دە ءبىزدىڭ زامانداستارىمىز:
اناۋ تۇرعان ءزاۋلىم ءۇيدىڭ بيىگى-اي,
وندا تۇرعان ادامدارعا باق قونعان...
تامسانسىن دەپ ءبىز سەكىلدى سورلىلار,
تاز ۇكىمەت ساپ قويعان...
ۇكىمەتتىڭ جوسپارىندا دا, جاساعان جۇمىسى تۋرالى ەسەبىندە دە ءمىن جوق-اۋ.
بىلتىر وسىنشا ميلليون شارشى مەتر ءۇي سالىندى, ول الدىڭعى جىلمەن سالىستىرعاندا بالەنشە ميلليون شارشى مەترگە كوپ دەگەن ەسەبىن جۇرت جاتتاپ الدى. كەلەسى جىلدا نەمەسە كەلەسى بەس جىلعا ارناعان جوسپارى ودان دا جاقسى.
ورىستىڭ كلاسسيك جازۋشىسى ميحايل بۋلگاكوۆ: «كۆارتيرنىي ۆوپروس يسپورتيل موسكۆيچەي» دەيدى. «سانانى تۇرمىس بيلەيتىنىن» ەسكەرسەك, ادامدى تارشىلىق ازدىرادى. ماسكەۋلىكتەردى عانا ەمەس, قازاقتاردى دا. بۇرىن اعايىندىلاردىڭ پاتەرگە تالاسىپ, ءبىر-ءبىرىن قارالاپ جاتقانىن تەك شەتەلدىك توك-شوۋلاردان كورۋشى ەدىك. قازىر قانداستارىمىز دا سونداي باعدارلامالاردىڭ كەيىپكەرىنە اينالدى.
كۇنى كەشە مارەگە جەتكەن پارلامەنت سايلاۋىندا پارتيالاردىڭ كوپشىلىگى سايلاۋالدى باعدارلاماسىنا باسپانا ماسەلەسىن ەنگىزىپتى. بالكىم الداعى بەس جىلدا ماسەلە شەشىمىن تاۋىپ جاتسا, قازاق قالامگەرلەرى باسپانا تاقىرىبىن جاباتىن شىعار.
