قارماقشى اۋدانىنىڭ ورتالىعىندا تۇراتىن شارھان بىلتىر جازدا الماتىدان تۇيەقۇستىڭ قول باسىنداي 3 بالاپانىن جەتكىزىپتى. ارينە, وعان دەيىن تاڭسىق قۇستى ابدەن زەرتتەگەن. بۇلار باستاپقى 3-4 ايدا كۇتىمدى قاتتى قاجەت ەتەدى ەكەن. ءسال وسكەسىن سۋىققا بوي ۇيرەتىپ, كادىمگى قۇستاردىڭ جەمىن جەي بەرەتىن كورىنەدى.
«بالا كەزىمنەن وسى قۇستى باعۋعا قۇمار بولدىم. ءتىپتى افريكادان جوسالىعا جەتكىزۋدىڭ جوسپارىن قۇرعان ساتتەرىم دە بولعان. كەيىننەن كادىمگى ءوزىمىز ۇيرەنگەن تاۋىق, تۇيەتاۋىق وسىرە باستادىم. بىلتىر ءساتى ءتۇسىپ الماتىدان وسى بالاپانداردى جەتكىزىپ الدىم. قازىر سونىڭ ەكەۋىن ءوسىرىپ وتىرمىن», – دەيدى شارھان وسپانوۆ.
شارھاننىڭ ايتۋىنشا تۇيەقۇستىڭ بويى 3 مەترگە دەيىن ءوسىپ, سالماعى 140 كەلىگە دەيىن تارتادى. قازىر ول باققان بالاپاندار كىسى بويىنان اسادى, سالماعى 50 كەلىگە جاقىنداپ قالدى.
قازاق بۇل قۇستى تۇيەگە بەكەر ۇقساتپاعان ەكەن. جارىقتىق ويسىلقارا تۇقىمى ەكى جىلدا ءبىر بوتالاسا, تۇيەقۇستاردىڭ تولىق جەتىلۋىنە دە 2 جىل كەتەدى. بىراق, جىلىنا سەكسەنگە جۋىق جۇمىرتقا تابادى. ونىسىن جان بالاسىنا الدىرمايتىن شالكەس مىنەزى تاعى بار.
«جالپى بۇلار جانىنا ەشكىمدى جولاتا بەرمەيدى. الماتىداعى تانىسىم وسى بالاپانداردان جۋاس قۇس شىعادى دەپ تاڭداپ بەرگەن. شىنىمەن دە ايتقانعا كونەتىن ءتۇرى بار. ازىرشە تەنتەكتىك تانىتقان كەزى جوق. الدا ينكۋباتور ارقىلى وسى قۇستاردى كوبەيتۋدى جوسپارلاپ وتىرمىن», – دەيدى شارھان وسپانوۆ.
