باسقارما باسشىسىنىڭ ايتۋىنشا, شاھار بيزنەسىن دامىتۋدا «Almaty Business-2025» ايماقتىق كاسىپكەرلىكتى دامىتۋ باعدارلاماسىنىڭ ماڭىزى وتە زور. باعدارلاما بيزنەسپەن جۇمىس ىستەۋدىڭ بەس نەگىزگى ينستيتۋتسيونالدى باعىتىن قامتيدى. ونىڭ قۇرامىنا Qoldaý كاسىپكەرلىك ورتالىعىن, نەسيە بەرۋ ءۇشىن جەكە جانە ميكروقارجى ينستيتۋتتارىن قۇرۋ, الماتى قالاسى اۋماعىندا وندىرىستىك پاركتەردى ۇيىمداستىرۋ, كەيبىر كاسىپكەرلەرگە جەكە ءارى شاعىن وندىرىستەرىن ۇيىمداستىرۋلارى ءۇشىن جەڭىلدەتىلگەن نەسيە ۇسىنۋ ەنەدى.
سپيكەردىڭ ايتۋىنشا, پاندەمياعا قاراماستان نەسيەلەۋ كولەمى ارتقان, ينفراقۇرىلىم دامي تۇسكەن, شاھار باسشىلىعى جۇمىس ورنىن ساقتاۋ مەن كاسىپكەرلەرگە كومەك كورسەتۋ بويىنشا اۋقىمدى جۇمىس اتقارعان.
«بۇگىندە جالپى سوماسى 42 ملرد تەڭگەنى قۇرايتىن 52 جوبا بويىنشا كەڭەستەر بەرىلدى. ء«بىر تەرەزە» قاعيداتى بويىنشا 500-دەن استام رۇقسات قۇجاتتارى ۇسىنىلدى. ورتالىقتا شوب وكىلدەرىنە ءوز بيزنەسىن دامىتۋعا قاتىستى ءتۇرلى مەملەكەتتىك ورگاندار مەن ۇيىمداردان رۇقسات قۇجاتتارىن الۋ ءۇشىن تەگىن قولداۋ كورسەتىلەدى, سونىمەن قاتار ءتۇرلى قارجى ينستيتۋتتارىندا قارجىنى جەڭىلدىكپەن الۋلارىنا كومەكتەسەدى. ءبىز ورىن العان كەمشىلىكتەردى جويىپ, ىستەرىن جاڭادان باستاعان كاسىپكەرلەرگە 5 ملن-عا دەيىنگى كولەمدە گرانتتار بەردىك. ولار گرانت العاننان كەيىنگى العاشقى كەزەڭدە ءوز بيزنەستەرىن تەگىن جۇرگىزە الادى. ەكىنشى كەزەڭدە بيزنەس-جوسپارلاردى ازىرلەۋ بويىنشا ءارى زاڭگەرلىك جانە بۋحگالتەرلىك كەڭەستەر كورسەتىلەدى. ەگەر ەكىنشى كەزەڭدە ءوز بيزنەستەرىن دۇرىس جۇرگىزىپ, ونى كەڭەيتۋدى قالاسا, وندا ولار ءبىزدىڭ شاعىن قارجى ينستيتۋتتارىمىزعا جۇگىنىپ, 6 پايىزدىق مولشەرلەمەمەن جەڭىلدەتىلگەن نەسيە الۋلارىنا بولادى», دەدى ە.ورازالين.
ونىڭ ايتۋىنشا, بۇل ينستيتۋتتار الماتى قالاسى اكىمىنىڭ تىكەلەي تاپسىرماسى بويىنشا جەرگىلىكتى بيۋدجەت قارجىسى ەسەبىنەن گرانتتار كولەمىن ۇلعايتۋ اياسىندا قوسىمشا ەكوجۇيەمەن قامتىلادى.
جالپى, بيزنەسكە قارجىلاي قولداۋ كورسەتۋگە 12,2 ملرد تەڭگە بولىنگەن. قارجىلاندىرۋدى «Almaty Finance» نەسيەلىك ۇيىمى جانە «الماتى» مقۇ جۇزەگە اسىرادى. «Almaty Finance» 500 ملن تەڭگەگە دەيىن ءىرى جانە ورتا جوبالارعا نەسيە بەرۋدى قاراستىرادى. «الماتى» شاعىن جانە ميكروبيزنەسكە باعىتتالعان ءارى مۇندا نەسيەنىڭ ەڭ جوعارعى مولشەرى 70 ملن تەڭگە دەڭگەيىندە بەلگىلەنگەن. جالپى العاندا 40-تان استام جوباعا نەسيە بەرىلىپتى.
ينستيتۋتتار پاندەميا كەزىندە ءدارى-دارمەكپەن قامتاماسىز ەتۋدى تۇراقتاندىرۋ پروتسەستەرىنە دە قاتىسقان. بولىنگەن 12,2 ملرد تەڭگەنىڭ 4 ملرد تەڭگەسى الماتى قالاسىنداعى ءىرى ديستريبيۋتەرلىك كومپانيالارعا, مەديتسينالىق زاتتار مەن ءدارى-دارمەكتەردى جەتكىزۋشىلەرگە بەرىلگەن.
«وندىرىستىك پاركتەردى ۇيىمداستىرۋ تەتىگى دە ويداعىداي جۇمىس ىستەي باستادى. وسى ورايدا ماقسات قالالىق اكىمدىك ءىرى بيزنەسكە بوس عيماراتتار مەن قۇرىلىستاردى قالپىنا كەلتىرۋگە نەمەسە جاڭا ورىن سالۋى ءۇشىن 6 پايىزبەن جەڭىلدەتىلگەن نەسيە بەرەدى. مۇندا وسى جوباعا قوسىمشا رەتىندە وندىرىستىك پاركتەر رەزيدەنتتەرىنىڭ جىلىنا 2 پايىزدىق مولشەرلەمەمەن نەسيە بەرۋ مۇمكىندىگى قاراستىرىلعان. بۇل – ەلىمىزدە بالاماسى جوق اكتسيا. ءبىز بۇگىنگى كۇنى وسىنداي ءۇش جوبانىڭ ويداعىداي جۇمىس ىستەپ جاتقانىن ماقتانىشپەن ايتا الامىز. ءۇش جوبا تولىعىمەن جابدىقتالعان, ىستەرىن جاڭا باستاعان كاسىپكەرلەر وسى وندىرىستىك ورىنداردى جالعا الدى. بۇلاردان وزگە, ءبىز يندۋستريالىق ايماقتا وسىعان ۇقساس وندىرىستىك پاركتەردى قۇرۋ ءۇشىن جالپى الاڭى 40 مىڭ شارشى مەتر بولاتىن 4 جەر ۋچاسكەلەرىن قوسىمشا بولدىك. بارلىق قۇجاتتاما, ەرەجەلەر ازىرلەندى جانە قابىلداندى. بۇگىندە يندۋستريالىق ايماقتاعى 4 ءوندىرىس پاركىنە الەۋەتى جوعارى قاتىسۋشىلاردان 50-دەن استام ءوتىنىش كەلىپ ءتۇستى» دەدى ە.ورازالين.
سپيكەردىڭ ايتۋىنشا, 2020 جىلى نەسيەلەردىڭ 70 پايىزى ساۋدا مەن قىزمەت كورسەتۋ سالاسىنا بولىنگەن. ماڭىزدىسى سول, وسى نەسيەلەر ارقىلى بيزنەس اۋقىمى ارتتى جانە قارجى اينالىمى تولىقتى.
الماتى
