ءىس-شاراعا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ, مەملەكەتتىك دەپارتامەنتتىڭ زورلىق-زومبىلىق ەكسترەميزمەن كۇرەس جونىندەگى ۇيلەستىرۋشىنىڭ ورىنباسارى كريستوفەر حارنيش جانە اقش-تىڭ جەتەكشى ساراپشىلارى قاتىستى.
ە.اشىقباەۆ ۆەبينارعا قاتىسۋشىلاردى سوعىس ايماقتارىنان وتانداستاردى قايتارۋ بويىنشا جۇرگىزىلگەن وپەراتسيانىڭ بارلىق كەزەڭدەرىمەن, سونداي-اق ولاردى بەيبىت قوعامعا قايتا ينتەگراتسيالاۋ بويىنشا جۇرگىزىلىپ جاتقان جۇمىستارمەن قىسقاشا تانىستىردى.
قازاقستاندىق ديپلومات «جۋسان» وپەراتسياسى ءبىرىنشى كەزەكتە راديكالدى يدەولوگيانىڭ قۇربانى بولعان ايەلدەر مەن بالالاردى قورعاۋعا باعىتتالعان گۋمانيتارلىق ميسسيا ەكەنىن اتاپ ءوتتى. بۇل قر پرەزيدەنتى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن, سونداي-اق تۇڭعىش پرەزيدەنت - ەلباسى نۇرسۇلتان نازارباەۆتىڭ تەرروريزمگە قارسى كۇرەس سالاسىنداعى ماڭىزدى حالىقارالىق باستامالارىن ناقتى ىسكە اسىرۋدىڭ جارقىن مىسالى.
اقش مەملەكەتتىك دەپارتامەنتىنىڭ وكىلدەرى مەن امەريكاندىق ساراپشىلار ءوز سوزدەرىندە قايتارىپ اكەلىنگەن ادامداردى سوعىس ايماقتارىنان قايتارۋ جانە قايتا ينتەگراتسيالاۋ ماسەلەسىندە قازاقستاننىڭ الەمدىك كوشباسشىلىعىن اتاپ ءوتتى.
ولار قازاقستاندىق تاجىريبە «ۇلگى تۇتاتىن» جانە وسى وتە كۇردەلى پروبلەمانى شەشۋگە جاۋاپتى ءتاسىلدىڭ كورىنىسى دەپ مالىمدەدى.
سونىمەن قاتار قازاقستان ۇكىمەتىنىڭ اشىقتىعى, ىنتىماقتاستىققا جانە ديالوگ ورناتۋعا دايىندىعى ايرىقشا اتاپ كورسەتىلدى.
بريفينگكە قاتىسۋشىلار قازاقستان الەمدىك قوعامداستىقتىڭ تەرروريزمگە قارسى كۇش-جىگەرىنە جانە بۇۇ قاۋىپسىزدىك كەڭەسىنىڭ ءتيىستى قارارلارىن ەنگىزۋگە ايتارلىقتاي ۇلەس قوسىپ وتىرعانىن اتاپ ءوتتى.
