كۇندىزگى ستاتسيونار جاعدايىندا اللەرگولوگيالىق, كارديولوگيالىق, ەندوكرينولوگيالىق جانە گاستروەنتەرولوگيالىق بەيىندەگى پاتسيەنتتەردى ەمدەۋ دارىگەردىڭ باقىلاۋىمەن پاتسيەنتكە ادەكۆاتتى تەراپيانى تاعايىنداۋعا, ونىڭ تاڭدالعان ءدارى-دارمەكتەرگە بەيىمدىلىگىن ازىرلەۋ, اللەرگيالىق رەاكتسيالاردىڭ نەمەسە دارىلىك توزبەۋشىلىكتىڭ باسقا تۇرلەرىنىڭ بولۋىن باقىلاۋعا مۇمكىندىك بەرەدى.
كۇندىزگى ستاتسيونار جانىندا وكپە پاتولوگياسى بار پاتسيەنتتەرگە جوعارى مامانداندىرىلعان كومەك كورسەتەتىن رەسپيراتورلىق ورتالىق جۇمىس ىستەيدى.
كۇندىزگى ستاتسيوناردىڭ مەڭگەرۋشىسى, جوعارى ساناتتى كارديولوگ دارىگەر, مەديتسينا عىلىمىنڭ كانديداتى باعدات قۇتتىباەۆانىڭ ايتۋىنشا, 2020 جىلدىڭ قاڭتار ايىنان باستاپ كۇندىزگى ستاتسيوناردا امبۋلاتورلىق جاعدايدا دياگنوستيكالىق كوروناروانگيوگرافيا جاسالىپ كەلەدى. سونىمەن قاتار فەرمەنتتى, يممۋنومودۋلياتسيالاۋشى دارىلەردى, بيولوگيالىق تەراپيانى قاجەت ەتەتىن فابري, مۋكوپوليساحاريدوز, كرون اۋرۋىنا, سپەتسيفيكالىق ەمەس ويىقجارالى كوليتكە جانە ت.ب. ورفاندىق (سيرەك كەزدەسەتىن) اۋرۋلارىنا شالدىققان پاتسيەنتتەر ەم قابىلدايدى.
«كۇندىزى ستاتسيوناردا ەمدەلۋ تەگىن جۇرگىزىلەدى. ەمدەلۋگە جاتقىزۋ تۇرعىلىقتى جەرىنىڭ ەمحاناسى, كارديولوگيا جانە ىشكى اۋرۋلار عزي كونسۋلتاتسيالىق-دياگنوستيكالىق ورتالىعىنىڭ جولداماسىمەن جانە پاتسيەنتتىڭ ءوز بەتىنشە كۇندىزگى ستاتسيونارعا قارالعان جاعدايدا ىسكە اسىرىلادى», - دەيدى باعدات سانسىزبايقىزى.
بولىمشەدە كارديولوگيا, اللەرگولوگيا, ەندوكرينولوگيا, گاستروەنتەرولوگيا جانە رەۆماتولوگيا سەكىلدى بەيىندەر بويىنشا ەم جۇرگىزىلەدى. بولىمشە دارىگەرلەرى دياگنوزدى دەر كەزىندە جانە دۇرىس قويۋ ءۇشىن ەڭ جاڭا, زاماناۋي جانە ساپالى دەڭگەيدە زەرتتەۋلەردىڭ كەڭ سپەكترىن پايدالانادى.
كۇندىزى ستاتسيوناردا ستاتسيوناردى الماستىرۋشى كومەك, ياعني كۇنى بويى ۇزاقتىعى 4 ساعاتتان 8 ساعاتقا دەيىن مەديتسينا ماماندارىنىڭ باقىلاۋىمەن مامانداندىرىلعان مەديتسينالىق كومەك, سونىمەن قاتار ەمدىك-دياگنوستيكالىق جانە كونسۋلتاتسيالىق كومەك كورسەتىلەدى. جۇرەكتىڭ يشەميالىق اۋرۋلارىنىڭ سوزىلمالى تۇرلەرى, ستەنوكارديا, ارتەريالىق گيپەرتونيا, جۇرەكتىڭ جۇرە پايدا بولعان كەمىستىگى, كارديوميوپاتيا, جۇرەكتىڭ سوزىلمالى رەۆماتيكالىق اۋرۋلارى, جۇرەك ىرعاعىنىڭ بۇزىلىسى, سونىمەن قاتار ميوكارد ينفارگىنە شالدىققان جانە سوزىلمالى جۇرەك كەمىستىگى بار پاتسيەنتتەردى تەكسەرۋ جانە ەمدەۋ جۇرگىزىلەدى. بازيستىك تەراپيا, پروفيلاكتيكالىق ەم تاڭدالادى, پاتسيەنتتىڭ كۇي-جاعدايىنا كۇنى بويى باقىلاۋ جۇرگىزىلەدى, كارديولوگيالىق جانە تەراپەۆتىك بەيىندەر بويىنشا جوسپارلى ەمدەۋ شارالارى جاسالادى. كۇردەلى دياگنوستيكالىق جاعدايلار كەزىندە كونسيليۋم جۇرگىزىلەدى.
قاجەت بولسا جۇرەك ەحوكارديوگرافياسى, جۇرەككە وڭەش ارقىلى ەلەكترلى ستيمۋلياتسيا جاساۋ, ۆەلوەرگومەتريا, ترەدميل تەست, ىشپەردە قۋىسى مەن بۇيرەكتىڭ ۋلترادىبىستىق زەرتتەۋى, ەكگ مەن ارتەريالىق قان قىسىمىن تاۋلىكتىك باقىلاۋ جانە زەرتحانالىق زەرتتەۋلەر: جالپى ءزار ءاناليزى, قاننىڭ جالپى ءاناليزى, قاننىڭ بيوحيميالىق تالداۋى جاسالادى.
الماتى
