كوروناۆيرۋس • 11 قاڭتار، 2021

COVID-19-دىڭ قاۋىپتى جاڭا شتاممى

جاپون جۇرتىندا الەمنىڭ 40 تان استام ەلىنە تارادى دەگەن كوروناۆيرۋستىڭ جاڭا شتاممىنان باسقا مۋتاتسياعا ۇشىراعان كۆي-ءدىڭ تاعى ءبىر ءتۇرى شىقتى.

انار تولەۋحانقىزى

ۇلىبريتانيادا مەن وڭتۇستىك افريكادا انىقتالىپ، تارالۋى جونىنەن بۇرىنعىعا قاراعاندا 40-70 پايىزعا دەيىن جىلدامىراق جۇعاتىن ۆيرۋس الەمدى شارلاپ بارادى. كەشە رەسەيدە جاڭا شتامم ءبىر ادامنان تابىلسا، اقش-تىڭ 8 شتاتىندا: نيۋ-يورك، كاليفورنيا، فلوريدا، كولورادو، تەحاس، دجوردجيا، كوننەكتيكۋت، جانە پەنسيلۆانيادا 63 ناۋقاس تىركەلىپ وتىر. اسىرەسە ول كاليفورنيا مەن فلوريدا تۇرعىندارى اراسىندا كوبىرەك تارالۋدا. وسىعان قاراپ اقش جۇرتى ۇلىبريتانيا جاڭا شتاممىنا ۇقساس وزىمىزدە دە جاڭا ءتۇر پايدا بولمادى ما ەكەن دەگەن دە قاۋىپ ايتقانىمەن اۋرۋلاردى باقىلاۋ جانە الدىن الۋ ورتالىعى (CDC) بۇل جورامالدى جوققا شىعاردى.

وتكەن اپتادا امەريكالىق بەلگىلى ينفەكتسيونيست ەنتوني فاۋچي « ۇلىبريتانيالىق شتاممنىڭ اقش -تاعى تارالۋى انىقتالۋىنان دا جىلدام جۇرۋدە» دەگەن بولاتىن.

جاڭا شتاممنىڭ قارقىنى جايىندا اڭگىمە قاۋلاپ تۇرعاندا شىعىستان تاعى ءبىر قاۋىپ ايتىلىپ جاتىر. توكيوعا برازيليادان 2 قاڭتاردا كەلگەن 4 تۋريستەن انىقتالعان اۋرۋ شتاممى ۇلىبريتانيالىق مۋتاتسيادان وزگەشە بولىپ شىققان. ول جايىندا جاپونيا ۇلتتىق ينفەكتسيالىق اۋرۋلار ينستيتۋتىنىڭ باس ديرەكتورى تاكاي ۋاكيتا جاريا ەتتى. «الايدا ۆيرۋستىڭ جاڭا شتاممى بۇرىنعىسىنا قاراعاندا جۇقپالىراق دەيتىن نەگىز جوق. قازىر ءتورت پاتسيەنت تە كارانتيندە. ال دەمالىسى قيىنداعان 40 جاسار ەر ادام اۋرۋحاناعا جەتكىزىلدى» دەگەن تاكاي مىرزا.

ونىڭ مالىمدەۋىنە قاراعاندا ەكى پاتسيەنتتىڭ باسى مەن تاماعى اۋىرادى جانە دەنە قىزۋلارى كوتەرىلگەن، ال ءتورتىنشى ۆيرۋس جۇقتىرعان جاسوسپىرىمدە ەشقانداي اۋرۋ بەلگىسى بايقالماعان.