ايماقتار • 10 قاڭتار، 2021

اتىراۋدا ۆاحتاداعى 35 370 جۇمىسشى قالاي داۋىس بەرەدى؟

71 رەت كورسەتىلدى

اتىراۋ وبلىستىق اۋماقتىق سايلاۋ كوميسسياسىنىڭ مالىمەتىنشە، ۆاحتالىق ادىسپەن جۇمىس ​ىستەيتىن 35​ 370 جۇمىسشىعا داۋىس بەرۋ ۇيىمداستىرىلۋدا. ونىڭ ىشىندە اتىراۋ وبلىسىندا تۇراتىن 17​ 203 ادام بار، دەپ حابارلايدى Egemen.kz

جىلىوي اۋدانىنداعى تەڭىز كەن ورنىندا 30​ 449، ماقات اۋدانى اۋماعىنداعى قاراباتان ەلدى مەكەنى تۇسىنداعى نىسانداردا 2600، «قاشاعان» كەن ورنىدا​ 437 ادام جۇمىس ىستەيدى. ال «ەمبىمۇنايگاز» اق-نىڭ جىلىوي، ماقات، يساتاي جانە قىزىلقوعا اۋداندارىنداعى ءوندىرىس ورنىندا 1884 ادام ەڭبەك ەتىپ جاتىر.

«سايلاۋ ۋچاسكەلەرى قۇرىلماعان، جول قاتىناسى قيىن اۋماقتاردا سايلاۋشىلاردىڭ ءوتىنىشى نەگىزىندە داۋىس بەرۋ ۇيىمداستىرىلادى. داۋىس بەرۋشىلەر بۇل ءۇشىن ۋچاسكەلىك سايلاۋ كوميسسياسىنا 10 قاڭتار، ساعات 12.00-گە دەيىن جازباشا ءوتىنىش قالدىرۋى ءتيىس. وسى قۇقىقتى جەكەلەگەن سايلاۋشىلار دەنساۋلىق جاعدايىنا بايلانىستى پايدالانا الادى. بۇل جاعدايدا سايلاۋشىلاردىڭ تۇرعان جەرىندە داۋىس بەرۋ ۇيىمداستىرىلادى. «قاشاعان» كەن ورنىنا ارنايى تىكۇشاق جىبەرىلەدى»، حابارلادى وبلىستىق اۋماقتىق سايلاۋ كوميسسياسىنان.

اتىراۋ وبلىسىنىڭ كوروناۆيرۋستىق ينفەكتسيانىڭ تارالۋى بويىنشا «قىزىل ايماققا» ەنۋىنە بايلانىستى ءوندىرىس مەكەمەلەرىندە قاتاڭ سانيتاريالىق شەكتەۋلەر ەنگىزىلىپ وتىر. وسىعان وراي وبەكتىگە كىرگەن جانە شىققان ازاماتتارعا كارانتيندىك تالاپتاردى قاتاڭ ۇستانۋ مىندەتتەلىپ وتىر. سونىمەن قاتار داۋىس بەرۋشىدە مىندەتتى تۇردە پتر سىناماسىنىڭ تەرىس قورىتىندىسى بولۋى ءتيىس.

سوڭعى جاڭالىقتار

شىڭعىستاۋدىڭ شاكىرى

ادەبيەت • كەشە

جانى ىزگى جۋرناليست

ەگەمەن قازاقستان • كەشە

ۇقساس جاڭالىقتار