ەكونوميكا • 07 قاڭتار، 2021

قازاقستان قاي ايدا مۇناي ءوندىرۋدى ارتتىراتىنى بەلگىلى بولدى

13 رەت كورسەتىلدى

ەنەرگەتيكا مينيسترلىگى ءباسپاسوز قىزمەتىنىڭ حابارلاۋىنشا، وپەك+ كەلىسىمى اياسىندا قازاقستان اقپان جانە ناۋرىز ايلارىندا مۇناي ءوندىرىسىن ارتتىرادى، دەپ حابارلايدى Egemen.kz

5 قاڭتار كۇنى قاتىسۋشى ەلدەردىڭ ۆيدەوكونفەرەنتسيا فورماتىندا بولعان جيىنىندا 2021 جىلدىڭ اقپان جانە ناۋرىز ايلارىندا مۇناي ءوندىرىسىن قىسقارتۋدىڭ قازىرگى دەڭگەيىن جالعاستىرۋ تۋرالى شەشىم قابىلدانعان.

«قازاقستان جانە رەسەي ءۇشىن اتالعان مەرزىمدە مۇناي ءوندىرىسىن تاۋلىگىنە 10 جانە 65 مىڭ باررەلگە دەيىن ارتتىرۋ تۋرالى جەكە جاعدايلار قاراستىرىلعان. وسىلايشا، وپەك+ اياسىندا اقپان جانە ناۋرىز ايلارىنداعى قازاقستاننىڭ مىندەتتەمەسى تاۋلىگىنە 1،427 ملن جانە 1،437 ملن باررەلدى قۇرايدى» دەلىنگەن مينيسترلىك مالىمەتىندە.

ەنەرگەتيكا ءمينيسترى نۇرلان نوعاەۆتىڭ ايتۋىنشا، وپەك+ ەلدەرىنىڭ مۇناي ءوندىرىسىن قىسقارتۋ تۋرالى 2020 جىلعى كەلىسىمى الەمدىك مۇناي نارىعىنداعى باعانى تۇراقتاندىرۋعا سەپتىگىن تيگىزگەن. «قازىرگى كەزدە اتالعان كەلىسىم مۇناي يندۋسترياسى ءۇشىن جاعىمدى سەرپىن بەرۋىن جالعاستىرۋدا» دەيدى ۆەدومستۆو باسشىسى.

ەسكە سالساق، بىلتىر ناۋرىز ايىندا وپەك+ ەلدەرى ۇزاق ۋاقىتقا دەيىن ءوزارا ۋاعدا جاساي الماي، ناتيجەسىندە مۇناي باعاسى كۇرت قۇلدىراپ كەتكەن ەدى. مەملەكەتتەر تەك مامىر ايىنان عانا باستاپ مامىلەگە كەلىپ، ءوندىرىستى ءۇش اي بويى تاۋلىگىنە 9،7 ميلليون باررەلگە قىسقارتۋعا كەلىستى. تامىز ايىنان باستاپ تاۋلىگىنە 7،7 ملن باررەلگە قىسقارتتى. بۇل كەلىسىم جىل سوڭىنا دەيىن ساقتالدى. 2021 جىلدىڭ قاڭتار ايىنا جۇكتەلگەن مىندەت – ءوندىرىستى تاۋلىگىنە 7،2 ملن باررەلگە دەيىن ازايتۋ. وپەك+ نارىق سۇرانىسىنا بايلانىستى ءوندىرىس كولەمىن ۇلعايتۋعا قارسى ەمەس. الايدا ول ايىنا 500 مىڭ باررەلدەن اسپاۋى ءتيىس.

  

 

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ۇقساس جاڭالىقتار