اتالعان ماقالادا تاۋەلسىزدىكتىڭ نەگىزگى تىرەگى ءتىل ەكەنى اشىق ايتىلدى. انا ءتىلدىڭ اينالاسىنا كۇش بىرىكتىرمەسەك, ىنتىماقتاسپاساق, ىمىرالاسپاساق سىرتتان كوز الارتقان كوپ دۇشپان تارپا باس سالۋى ابدەن مۇمكىن. «ەلىمىزدىڭ باستى نىشاندارىنىڭ ءبىرى – مەملەكەتتىك ءتىل. قازاقستاننىڭ مەملەكەتتىك ءتىلى قازاق ءتىلى ەكەنى اتا زاڭىمىزدا 90-جىلدارداعى كۇردەلى كەزەڭنىڭ وزىندە ناقتى جازىلعان. ءبىز تاۋەلسىزدىك داۋىرىندە انا ءتىلىمىزدى دامىتۋ ءۇشىن بارلىق جاعدايدى جاسادىق», دەدى پرەزيدەنت.
تەك قانا ءتىل ەمەس, تاريحىمىزدى, ادەبيەتىمىز بەن مادەنيەتىمىزدى دە جاڭا ۇرپاق كوزىمەن قايتا قاراپ, ازات رۋحتىڭ التىن قالامىمەن قازاق ءجۇرىپ وتكەن جولدى قايتا تاڭبالاۋىمىز كەرەك. كوك تۇرىكتەردىڭ كونە داۋىرىنەن تامىر تارتاتىن تەرەڭدەگى باي تاريحىمىزدى قايتا سارالاۋىمىز قاجەت. ءبىزدىڭ شەكارامىز – ءبىزدىڭ تاريحىمىز. وسىناۋ وتىز جىلدىڭ وڭ قادامدارى ءبىزدى جاڭا بەلەسكە شىعاردى.
پرەزيدەنت مىرزا ءسوز باسىندا كينو جايلى دا بەكەر ايتپاعانى بەلگىلى. سەبەبى بۇگىنگى ۇرپاق كوبىنە اقپاراتتار اعىنىن سول كوگىلدىر ەكراننان كورەدى. عالامتوردىڭ عالامات كۇشىنىڭ الدىندا كەز كەلگەن ۇلت قاۋقارسىز ەكەنىن كورسەتىپ وتىر. ارينە, ونىڭ وڭ اسەرىن يگىلىككە جۇمساساق دۇرىس. كينەماتوگرافيا ارقىلى ۇلتتىق يدەولوگيانى قالىپتاستىرۋمىز كەرەك. بۇگىندە الەمدى اۋزىنا قاراتىپ وتىرعان جويىتتار الدەقاشان ءولىپ قالعان يۆريت ءتىلىن ءتىرىلتىپ الدى. بۇل جولدا ولار ەڭ الدىمەن جويىلىپ بارا جاتقان جويىت تراگەدياسىن كينو سالاسىندا الدىعا شىعارا وتىرىپ, ۇلكەن جوسپارلى جۇمىستاردى اسا ءبىر قاجىت-قايراتپەن كوتەرىپ شىقتى.
قۇلازىپ, قۇلدىرايتىن كەز بۇل ەمەس. توم-توم تاريحىمىز بار, باي, قۇنارلى ءتىلىمىز ءتىرى, شەگەندەلگەن شەكارامىز بايتاق. بۇل – ءتاڭىردىڭ بىزگە بەرگەن باستى سىيى, تاۋەلسىزدىكتىڭ جەمىسى. وسى قۇندىلىقتاردى قۇلدىراتپاي جۇمىلا جۇمىس ىستەۋمىز كەرەك. ءبىزدىڭ كەزەڭ توتاليتارلىق جۇيەنىڭ تاپتاۋىندا ءوتتى. ال بۇگىنگى جاس بۋىن ونداي وزبىرلىقتان ادا, ساناسى ەركىن ۇرپاق. كەمەل كەلەشەكتەن ۇلكەن قادام كۇتەمىز.
ماقالاداعى مىنا سۇراقتار شىنىمەن ءبىزدى قاتتى ويلاندىرىپ تاستادى. بۇل سۇراقتار جانە ءار قازاقتىڭ جۇرەك ءسوزى بولۋعا ءتيىس. «ازاتتىعىمىزدىڭ ايشىقتى بەلەسىنە شىققاندا, ءاربىر سانالى ازاماتتى «وتىز جىلدا ءبىز قانداي جەتىستىكتەرگە جەتتىك؟», «كەلەر ۇرپاققا قانداي ەلدى اماناتتايمىز؟», «مەملەكەتتىگىمىزدى نىعايتا ءتۇسۋ ءۇشىن تاعى نە ىستەيمىز؟» دەگەن ساۋالدار تولعاندىرارى انىق. وسى تۇرعىدان العاندا, بۇل – ارمان-ماقساتتارىمىزدى توعىستىرىپ, بولاشاققا تىڭ سەرپىنمەن قادام باسۋ ءۇشىن وتكەنگە تاعى ءبىر مارتە ورالاتىن, جەتىستىكتەرىمىز بەن كەمشىلىكتەرىمىزدى وي ەلەگىنەن وتكىزەتىن ماڭىزدى مەزەت».
مىنە, كەلەر ۇرپاققا قانداي ەلدى اماناتتايمىز دەگەن ءسوزدىڭ استارىندا نەندەي اۋىر جۇكتىڭ تۇرعانىن سەزىنەر كەز جەتتى دەپ ويلايمىن. بۇل – امانات جۇگىن ارقالاعان ۇلكەن ءسوز. ازاتتىقتىڭ وتىز جىلدىعىنىڭ العاشقى كۇندەرىندە وقىعان وزىق ماقالاعا ويىمىزدى ءالى دە قوسا جاتامىز. الاش اتاۋىن ايتۋدىڭ زور ءمانى بار. ۇلت ارداعى ءاليحان بوكەيحاننىڭ «قازاق توپىراعىنداعى ءار اسىل تاس قازاقتىڭ وڭىرىنە تۇيمە بولىپ تاعىلۋى كەرەك» دەگەن سيپاتتاعى ۇلاعاتتى ءسوزى بار. مەملەكەت باسشىسىنىڭ بۇگىنگى ماقالاسىنان دا وسى ادىلەت جولىن انىق سەزەمىز. «قازاق ءۇشىن توقىمداي جەردىڭ ءوزى قىمبات, ءبىر ۋىس توپىراقتىڭ ءوزى التىن. بىراق ءبىز سونى باعالاي بىلەمىز بە؟! جەر قادىرىن ءبىلۋ جالاڭ ۇرانمەن ولشەنبەيدى», دەدى ق.توقاەۆ.
ماقالانىڭ ءون بويىندا اباي رۋحىمەن سۋعارىلعان ۇلتتىق مۇددە انداعايلاپ تۇر.
سەرىك اقسۇڭقار ۇلى,
اقىن, اباي اتىنداعى مەملەكەتتىك سىيلىقتىڭ لاۋرەاتى
