قوعام • 06 قاڭتار، 2021

باقىتجان ساعىنتاەۆ قۇرىلىسشىلاردى الماتىنىڭ تاريحي ورتالىعىندا قۇرىلىس جۇرگىزۋدى توقتاتۋعا شاقىردى

18 رەت كورسەتىلدى

الماتى اكىمى باقىتجان ساعىنتاەۆ ونلاين-كەزدەسۋ بارىسىندا قۇرىلىس كومپانيالارىنىڭ، كاسىبي قاۋىمداستىقتار مەن قارجى ۇيىمدارىنىڭ وكىلدەرىمەن بىرگە الماتىداعى قۇرىلىس نارىعىنىڭ دامۋ پەرسپەكتيۆالارىن تالقىلادى، دەپ حابارلايدى Egemen.kz.

كەزدەسۋ بارىسىندا تۇرعىن ءۇي قۇرىلىسىنىڭ ساپاسى، بىلىكتى كادرلاردى دايارلاۋ، قۇرىلىس ماتەريالدارىن ءوندىرۋ، الەۋمەتتىك تۇرعىن ءۇي قۇرىلىسىنىڭ قارقىنى جانە ينجەنەرلىك ينفراقۇرىلىمداردى جۇرگىزۋ ماسەلەلەرى قارالدى. سونىمەن قاتار، كەڭەسكە قاتىسۋشىلار تۇرعىن ءۇي قورىن جاڭارتۋ باعدارلاماسىن ىسكە اسىرۋ تەتىكتەرىن جەتىلدىرۋ، بوس جەر ۋچاسكەلەرىنىڭ تاپشىلىعى تاقىرىپتارىن تالقىلادى.

وسىعان وراي، ساعىنتاەۆ تاريحي ورتالىقتا، سونداي-اق تۇرعىن ۇيلەردىڭ اۋلالارىندا نۇكتەلى قۇرىلىستاردى جۇرگىزۋگە تىيىم سالىناتىنىن اتاپ ءوتتى. بۇدان وزگە، ۇيلەردىڭ اراسىنا «كىرىستىرىپ» قۇرىلىس جۇرگىزۋگە دە تىيىم سالىناتىن بولادى. ايتا كەتەرلىگى، ەسكى ۇيلەردىڭ ورنىنا جاڭا ۇيلەردى تۇرعىزعاندا ولاردىڭ بۇرىنعى بيىكتىگىن ساقتاۋعا رۇقسات ەتىلەدى.

«مەن قۇرىلىس جۇرگىزۋگە قاتىستى ەرەجەلەردى ازىرلەۋدى تاپسىردىم، ونىڭ نەگىزىندە تاريحي ورتالىقتا، اۋلا اۋماقتارىندا بوس جاتقان جەرلەرگە نۇكتەلى قۇرىلىس سالۋعا، جالپى قۇرىلىس جۇرگىزۋگە تىيىم سالىنادى. باستى مىندەت – قالانىڭ بۇرىننان قالىپتاسقان تاريحي كەلبەتىن ساقتاپ قالۋ. جوعالتىپ العاندارىمىزدى قايتا جاڭعىرتىپ، اسەم الماتىنىڭ ەجەلگى داڭقى مەن قايتالانباس كوركىن قالپىنا كەلتىرۋ»-، دەدى قالا اكىمى ب.ساعىنتاەۆ.

ونىڭ ايتۋىنشا، ەرەجەلەردە تاريحي ورتالىقتاعى جەر ۋچاسكەلەرىنىڭ يەلەرى تۇرعىنداردىڭ قالاۋى بويىنشا بالالار الاڭدارىن نەمەسە قوعامدىق ورىنداردى سالىپ، ولاردىڭ اينالاسىن اباتتاندىرا الاتىندىعى كورىنىس تابادى. ەڭ باستىسى - قالىپتاسقان ارحيتەكتۋرالىق ءيميدجدى بۇزباۋ. بۇلاي ەتپەگەن جاعدايدا قۇرىلىستى جۇرگىزەتىندەردەن جەر تەلىمدەرى ساتىپ الىنىپ، قالا مەنشىگىنە بەرىلەدى.

ەرەجەگە قاتىستى تاريحي ورتالىقتىڭ، سونداي-اق قالانىڭ باسقا اۋداندارىنداعى جەكە اۋماقتار – ىقشاماۋدانداردىڭ، تىنىش اۋدانداردىڭ شەكارالارى انىقتالادى.

تاريحي ماڭىزى بار نىسانداردى انىقتاۋ قاراستىرىلۋدا، ولاردىڭ جانىنان كەز-كەلگەن قۇرىلىستى جۇرگىزۋ قوعامدىق تالقىلاۋدان وتكەننەن كەيىن عانا مۇمكىن بولادى.

ەرەجەلەردە قالا قۇرىلىسىن رەتكە كەلتىرۋ جونىندەگى ەرەكشە اۋماقتاردا قۇرىلىستىڭ تىعىزدىعى مەن سالىناتىن عيماراتتاردىڭ بيىكتىگى ەسەپكە الىنادى. بۇدان وزگە، اەراتسيا رەجيمىن جاقسارتۋ، كوگالداندىرۋ، قالالىق قورشاعان ورتانى ساقتاۋ جانە جايلىلىقتى كەڭەيتۋ، قالانىڭ تاريحي كەلبەتىن ساقتاۋ ءۇشىن قاسبەتتەردى بەزەندىرۋ تالاپتارى دا جازىلاتىن بولادى.

قۇرىلىس جۇرگىزۋگە قاتىستى ەرەجەلەر قاڭتار ايىندا ازىرلەنىپ، اقپان ايىندا ساراپشىلار قاۋىمداستىعى مەن قوعامنىڭ كەڭىنەن تالقىلاۋىنا ۇسىنىلادى. قۇجات ناۋرىز ايىندا قابىلدانادى دەپ جوسپارلانۋدا.

قۇرىلىسشىلار قاۋىمداستىعىنا جوسپارلارعا تۇزەتۋلەر ەنگىزۋ جانە قارقىندى دامىپ كەلە جاتقان جاڭا الماتى ايماعىنا نازار اۋدارۋ ۇسىنىلدى. مىسالى، الاتاۋ اۋدانى، مۇندا تۇرعىن ءۇي مەن الەۋمەتتىك نىسانداردىڭ قۇرىلىستارى قاتار ءجۇرىپ جاتىر.

جالپى، الماتى اكىمى ب.ساعىنتاەۆ تۇرعىن ۇيمەن قاتار الەۋمەتتىك نىساندار - مەكتەپتەر، اۋرۋحانالار، سپورت نىساندارى مەن كەشەندەردىڭ قۇرىلىستارى قارقىن العانىن اتاپ ءوتتى. جۇمىس جالعاساتىن بولادى.

بۇرىن حابارلانعانىنداي، 2020 جىلى 1 586 مىڭ شارشى مەتر تۇرعىن ءۇي نەمەسە كوممەرتسيالىق تۇرعىن ءۇيدىڭ 16879 پاتەرى سالىندى. مەملەكەتتىك باعدارلامالار اياسىندا 289،5 مىڭ شارشى مەتر تۇرعىن ءۇي نەمەسە 3902 پاتەر ىسكە قوسىلدى. اعىمداعى 2021 جىلى 1716 مىڭ شارشى مەتر كوممەرتسيالىق تۇرعىن ءۇي نەمەسە 12 مىڭ پاتەر سالۋ جوسپارلانۋدا. مەملەكەتتىك باعدارلامالار بويىنشا - 328،8 مىڭ شارشى مەتر تۇرعىن ءۇي نەمەسە 4470 پاتەر سالىناتىن بولادى.

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

ۇقساس جاڭالىقتار