«...كەلەر ۇرپاققا قانداي ەلدى اماناتتايمىز؟», «مەملەكەتتىگىمىزدى نىعايتا ءتۇسۋ ءۇشىن تاعى نە ىستەيمىز؟» دەگەن ساۋالدار پرەزيدەنتتى مازالايتىنىن بىلەمىز.
حالىقارالىق جاعدايدا الدىنا جان سالمايتىن تەرەڭ ساياساتكەر قاسىم-جومارت كەمەل ۇلى توقاەۆتاي تۇلعانى مازالايتىن وي كوپ بولار. ودان شىعار جولدى تاباتىنىنا دا بەك سەنەمىن. قازىر مەملەكەتتەر اراسىنداعى ءتىل تابىسپاۋ قاراپايىم حالىقتى باقىتسىزدىققا اپارىپ جاتقانىن بىلەمىز. ءار مەملەكەتپەن ءتىل تابىسۋ ءۇشىن سول مەملەكەتتىڭ ءتىلىن, تاريحىن, مىنەزىن بىلەتىن بىلىمدىلىك قاجەت. ال بۇل جاعىنان كەلگەندە مۇنداي باسشى دامىعان ەلدەردە دە كوپ ەمەس. ءبىزدىڭ ەلىمىز ەڭ قيىن جاعدايلاردا تاۋەلسىزدىكتىڭ تۋىن بەرىك ۇستادى.
ماقالادا وتىز جىلدا ەلباسىمىزبەن بىرگە قانداي جەتىستىكتەرگە جەتكەنىمىزدى, ەندى مەملەكەتتىگىمىزدى نىعايتا ءتۇسۋ ءۇشىن نە جاساۋ كەرەكتىگىمىزگە توقتالعان ەكەن. ايتىلعان ويى دا, الداعى ۇستانىم-باعىتتارى دا كوڭىلىمنەن شىقتى. مەملەكەت الدىنا دا, ۇلتتىڭ الدىنا دا جاڭا مىندەت پەن جاۋاپكەرشىلىك جۇكتەلىپ وتىر. اسىرەسە شەتەلدە ءبىلىم الىپ, ءوز تالانتتارىمەن الپاۋىت كومپانيالاردا جۇمىس ىستەپ جۇرگەن قازاقتىڭ تالاپتى ۇل-قىزدارىن كوزدەن دە, كوڭىلدەن دە تاسا قىلماي, ەلدىڭ ماقساتىنا, مەملەكەتتىڭ دامۋىنا ولاردىڭ دا اتسالىسىپ ەڭبەك ەتۋىنە مۇمكىندىك جاسايمىن دەگەنى ۇنادى. «...جىراقتا جۇرگەن جاستارىمىزدان ايىرىلىپ قالامىز دەپ ۋايىمداۋدىڭ ءجونى جوق. ءبىزدىڭ مىندەتىمىز – ولاردىڭ بويىنا مەملەكەتشىلدىك رۋحىن ءسىڭىرىپ, قاي جەردە جۇرسە دە تۋعان ەلدىڭ يگىلىگىنە قىزمەت ەتۋگە جۇمىلدىرۋ. مىسالى, الەمنىڭ ەڭ دامىعان ەلدەرىندە ءوز كاسىپتەرىن باستاعان جانە الپاۋىت كومپانيالاردا جۇمىس ىستەپ جۇرگەن ازاماتتارىمىزدىڭ وسىنداعى زامانداستارىمەن بايلانىسىن نىعايتىپ, تالىمگەرلىك ەتۋىنە جاعداي جاساۋىمىز كەرەك», دەپتى ەل پرەزيدەنتى.
قاسىم-جومارت كەمەل ۇلى 16 جاسىندا ماسكەۋگە وقۋعا كەتىپ, 40 جاسىندا ەلىنە ورالدى. بۇكىل ءبىلىمىن, كۇش-جىگەرىن, جيناعان تاجىريبەسىن تاۋەلسىز قازاقستاننىڭ دامۋىنا ارناپ, سول جولدا بار جىگەرىن جۇمساپ, ەلباسىمەن بىرگە ادال ەڭبەك ەتكەنىن بىلەمىز. كورشى ەلدەر وداقتىڭ كەزىندە-اق جەر مەن سۋعا داۋ تۋعىزىپ وتىراتىن. ال قازىرگى جاعدايدا كوپتەگەن ماسەلەنىڭ تاتۋ تۇردە وڭتايىن تاۋىپ, ۇلت ءۇشىن دۇرىس شەشىم قابىلداپ, ءوزارا كەلىسىممەن ءتىل تابىسىپ وتىرۋ دا وڭاي ەمەس.
مەن مەملەكەت باسشىسىنىڭ ءار قادامىن, حالىققا جاساپ جاتقان مول مۇمكىنشىلىگىن كورىپ, تىڭداپ, وقىپ وتىرامىن. پرەزيدەنتىمىز «تاۋەلسىزدىك بارىنەن قىمبات» دەپ وتىر. تاۋەلسىز ەلىمىزدىڭ ماڭگىلىك ەل بولۋىنا ءبارىمىز ارالاسۋىمىز كەرەك دەپ ويلايمىن. مەنىڭ اتا-انامنان كەيىنگى ەكى ۇستازىم بولدى. ءبىرى – ءومىر جولىنىڭ قيىندىعىنا توزگەن, سوعىستى باستان كەشكەن, تاعدىرىنىڭ اۋىرتپالىعىنا مويىماعان, وتانشىل, دەتەكتيۆ جانرىنىڭ نەگىزىن قالاۋشى كەمەل اعا توقاەۆ ەدى. ەكىنشىسى – قازاق ادەبيەتىنىڭ كورنەكتى كلاسسيگى عابيت اعا مۇسىرەپوۆ بولاتىن. وسى ەكى الىپ تۇلعادان كوپ ۇيرەندىم, ءتالىم تاربيەلەرىن كوردىم. مەنى تاربيەلەگەن, ماعان اكە بولعان ۇلى تۇلعالار ەدى.
مەن قازىرگى پرەزيدەنتتىڭ ساياساتكەرلىگىمەن قوسا, ونىڭ كەز كەلگەن الەمدىك تريبۋنالاردا ءوز حالقىنىڭ مۇددەسىن تاپتاتۋعا جول بەرمەيتىن وجەتتىگىنە, شەشەندىگىنە قايران قالىپ وتىرامىن. امان بولسىن!!!
اكىم تارازي,
جازۋشى, دراماتۋرگ, مەملەكەتتىك سىيلىقتىڭ لاۋرەاتى
