كوللاجدى جاساعان زاۋرەش سماعۇل, «EQ»
بۇل تۋرالى جۋىردا پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتى ديرەكتورىنىڭ ورىنباسارى گۇلنار سارسەنباەۆا مالىمدەدى. «ەرەجەدە ەمدەلۋگە بىرجولعى زەينەتاقى تولەمدەرىن الۋ ءتارتىبى جانە بىرجولعى زەينەتاقى تولەمدەرى ەسەبىنەن تولەنەتىن مەديتسينالىق قىزمەت تۇرلەرىنىڭ ءتىزىمى ايقىندالعان», دەدى گ.سارسەنباەۆا.
تىزبەگە سايكەس قازاقستاندىقتار ۋاكىلەتتى ورگان بەكىتكەن ءتىزىم بويىنشا ورفاندىق اۋرۋلارعا قىمبات ەم قابىلدايدى, ءدارى-دارمەكپەن قامتاماسىز ەتۋ, سونداي-اق ەمدەۋ تاكتيكاسىن ايقىنداۋ ءۇشىن دياگنوستيكالىق زەرتتەۋلەر, قازاقستان رەسپۋبليكاسىنىڭ مەديتسينالىق ۇيىمدارىندا كورسەتىلەتىن ستوماتولوگيالىق قىزمەتتەردى, وپەراتسيادان كەيىنگى تىرتىقتار مەن تۋا بىتكەن اقاۋلاردى, راديونۋكليدتىك جانە راديويودتەراپيانى تالاپ ەتەتىن اۋرۋلاردى تۇزەتۋ ماقساتىندا رەكونسترۋكتسيالاۋ جانە قالپىنا كەلتىرۋ (پلاستيكالىق) وپەراتسيالارىن الا الادى, راديوحيرۋرگيالىق ەمدەۋ (گامما-پىشاق, كيبەر پىشاق), پروتوندىق تەراپيا, وتاندىق مەديتسينالىق ۇيىمداردا, ونىڭ ىشىندە قازاقستان رەسپۋبليكاسىنىڭ اۋماعىندا ورنالاسقان ساناتوري-كۋرورتتىق جاعدايلاردا مەديتسينالىق وڭالتۋ, وفتالمولوگيالىق قىزمەتتەر (كورۋ قابىلەتىن لازەرمەن تۇزەتۋ, مۋلتيفوكالدى لينزالاردى پايدالانا وتىرىپ كاتاراكتانى ەمدەۋ, انگيوگەنەز تەجەگىشتەرىن ءينتراۆيتريالدى ينەكتسيالار) كورسەتىلەدى.
ەمدەلۋگە بەرىلەتىن بىرجولعى زەينەتاقى تولەمى جەتكىلىكتى بولعان جاعدايدا, ازامات مەديتسينالىق قىزمەت تۇرلەرىنىڭ تىزبەسىنە سايكەس بىرجولعى زەينەتاقى تولەمدەرى ەسەبىنەن ەمدەلۋگە جىبەرۋ تۋرالى دارىگەرلىك كوميسسيانىڭ قورىتىندىسىن الۋ ءۇشىن ءوزى تىركەلگەن جەردەگى مەديتسينالىق ۇيىمعا جۇگىنەدى. قالاۋى بويىنشا شەتەلدىك, وتاندىق مەديتسينالىق ۇيىمدى تاڭدايدى جانە ەمدەۋ تۋرالى شارت جاساسادى. ەتسق كومەگىمەن ۋاكىلەتتى وپەراتوردىڭ ينتەرنەت-رەسۋرسىندا اۆتوريزاتسيالانادى جانە ءوزىنىڭ جەكە كابينەتىن اشادى. جەكە كابينەتتە سوماسىن (بىراق قاراجاتتى الۋعا رۇقسات ەتىلەتىننەن اسپايتىن), پايدالانۋ ماقساتىن كورسەتە وتىرىپ, بىرجولعى زەينەتاقى تولەمىنە ارنالعان ەلەكتروندىق ءوتىنىشتى تولتىرادى, دارىگەرلىك كوميسسيا قورىتىندىسىنىڭ سكانەرلەنگەن كوشىرمەلەرىن, مەديتسينالىق ۇيىممەن ەمدەۋ تۋرالى شارتتى تىركەيدى جانە ءوزىنىڭ ەتسق-مەن كۋالاندىرادى.
ۋاكىلەتتى وپەراتور الۋشى ۇسىنعان بىرجولعى زەينەتاقى تولەمدەرىنىڭ نىسانالى ماقساتى بويىنشا قۇجاتتاردى تەكسەرگەننەن كەيىن جانە سايكەس كەلگەن جاعدايدا ولاردى العان كۇننەن باستاپ 5 جۇمىس كۇنى ىشىندە ازاماتتىڭ تاڭداعان مەديتسينالىق ۇيىمى بويىنشا قاراجاتتى اۋدارادى. سونداي-اق ەرەجەدە ەمدەۋ ءۇشىن جۇبايىنىڭ (زايىبىنىڭ), جاقىن تۋىستارىنىڭ بىرجولعى زەينەتاقى تولەمدەرىن پايدالانۋعا رۇقسات ەتىلەدى. مۇنداي جاعدايدا تاراپتار جەكە كابينەتتە تۋىستىق قاتىناستاردى راستايتىن قۇجاتتاردى قوسا بەرەدى, ولاردىڭ ەتسق-مەن كۋالاندىرىلاتىن بىرجولعى زەينەتاقى تولەمدەرىن بەرۋ تۋرالى كەلىسىم جاساسادى.
