سۋرەتتى تۇسىرگەن ەرلان ومار, «ەQ»
ەلىمىز وسى شيرەك عاسىردان ءسال اساتىن قىسقا مەرزىمدە ۇلى دالانىڭ زەڭگىر كوگىندەي كوك تۋىمىزدى كوككە كوتەرىپ, ەلدىكتىڭ كوشىن تۇزەپ, جۇزجىلدىقتاردىڭ ەنشىسىندەگى تاريحي ۇدەرىستەردى ابىرويمەن وتكەردى. تاۋەلسىزدىكتىڭ ءاربىر تاڭىن قۋانا قارسى الىپ, ءار كۇنىن قاجىرلى ەڭبەكپەن, ەڭسەلى ەرلىكپەن ورنەكتەگەن قازاقستان جاھان جۇرتشىلىعىنا الۋان ۇلىستى ءبىر شاڭىراقتا ۇيىتقان جەرۇيىق مەكەن رەتىندە تانىلدى.
بۇگىن مىنە ىنتىماق, بىرلىك, تاتۋلىق سالتانات قۇرعان ەلدىڭ مارتەبەلى بيىگىندە, مەرەيلى بەلەسىندە تۇرمىز. وسى جىلدار بەدەرىندە تاعىلىمى مول, تامىرى تەرەڭ ءداستۇرىمىز جاڭعىرىپ, كۇللى الەمدى اۋزىنا قاراتقان, كۇن تۇبىنە جورتقان بابالاردىڭ ۇرپاعى رەتىندە قازاق حاندىعىنان التىن ورداعا, كوك تۇرككە ۇلاساتىن ۇلى تاريحىمىز ۇلىقتالدى. بارشا تۇركى جۇرتىنىڭ كيەسى – كۇلتەگىن التىن ايدارلى استانا تورىنە قوندى. ءارالۋان مادەنيەتىن بايلىعىنا بالاعان, تاتۋلىعىمەن تۋ العان جاسامپاز قوعام قالىپتاستى. ءداۋىر داعدارىستارىن ەڭسەرە ءجۇرىپ, ەلدىگىمىز شىڭدالدى, مەملەكەتىمىز نىعايدى. سان ءتۇرلى سىناقتان بىلەككە بىلەك قوسىپ وتكەن حالقىمىز توننىڭ ىشكى باۋىنداي تۇتاسا ءتۇستى. سىرت ەلدە قالعان قاراكوز قانداستارىن اتامەكەنگە جيناپ, باۋىرىنا تارتتى. الەۋەتتى ەلدەرمەن ىنتىماقتاستىق ورناتىپ, بارشا الەمگە بەيبىت باستامالارمەن تانىلدى.
ۇلى دالا ەلىنىڭ تورىندە تورتكۇل دۇنيەگە تورەلىك ايتقان, تامام ەلدى تاتۋلىققا شاقىرعان القالى جيىندار, كەلەلى كەلىسسوزدەر ءوتتى. قوڭسى قونعان باۋىر جۇرتتىڭ بىرلىگى ىدىراپ, بەرەكەسى كەتكەندە ابدىراعان اعايىنعا دا پانا بولدى. اۋمالى-توكپەلى زامان سىناعىنا ۇشىراپ, توقىراۋعا تۇسكەن ەلدەرگە دە قول ۇشىن سوزدى.
بىرلىگىن بەرىك ۇستاعان قازاق ەلى بيلىكتىڭ بەيبىت اۋىسۋىنىڭ دا ەرەك ۇلگىسىن كورسەتتى. ەلدىكتىڭ ەڭسەسىن تىكتەگەن ەلباسى جۇزەگە اسىرعان سارابدال ساياساتتىڭ ساباقتاستىعىن حالىق سايلاعان پرەزيدەنت قاسىم-جومارت توقاەۆ تىڭ سەرپىنمەن جالعاستىرىپ, سوڭعى جىلداردىڭ ۇلەسىنە تيگەن سىناقتاردى دا ابىرويمەن ەڭسەرە بىلدىك. مەملەكەت باسشىسى جاھاندىق جاڭا احۋال جاعدايىنداعى جۇرەر جولىمىزدى, بارار باعدارىمىزدى بەلگىلەدى. حالىقتىق رەفورمالار ارقىلى جاڭا دەڭگەيدەگى مەملەكەتكە اينالۋدى كوزدەيتىن ىلكىمدى باستامالار ىسكە اسىرىلا باستادى.
توتەننەن كەلگەن توسىن ىندەتكە قارسى كۇرەس تە جۇيەلى جۇرىسىنە ءتۇستى. بۇل تۇستا دا حالقىمىزدىڭ وزگەنىڭ قايعىسى دەپ بولمەيتىن ىزگىلىگى, قايىرىمدىلىعى سىندى ەجەلدەن قانىندا بار قاسيەتتەرى ايرىقشا ايشىقتالىپ, بىلەككە بىلەك قوسقاندا ەڭسەرىلمەيتىن قيىندىق جوق ەكەنىن كورسەتتى.
وكىنىشكە قاراي, الەمدى جايلاعان پاندەميا ءالى جالعاسۋدا. بىراق الەۋەتى بۇگىنگىدەن الدەقايدا از بولعان زاماندا دا ەگەمەندىك تۋىن ەڭكەيتپەگەن قابىرعالى حالقىمىز بۇل كەزەڭنەن دە ابىرويمەن وتەرىنە بەك سەنەمىز. باسقا قونعان باعىن باعالايتىن ەل بايلىعىن ەسەلەي وتىرىپ, تەك العا ۇمتىلادى.
ءبىزدىڭ باستى بايلىعىمىز – پەيىلى دالاداي دارحان, بىرلىگى بولاتتاي بەرىك, الاتاۋداي الىپ حالقىمىز! تامىرى تەرەڭ, قازىعى بەرىك وسىنداي ەلى بار مەملەكەتتىڭ تاۋەلسىزدىگى دە باياندى بولادى. مەملەكەتىمىز ماڭگىلىك جاساي بەرسىن! جاڭا جىلدا – تاۋەلسىزدىكتىڭ
30 جىلدىعىندا الار اسۋلارىمىز كوپ بولعاي!
