«كارانتينگە بايلانىستى ءبىز بالالاردى جيناپ, شىرشا مەرەكەسىن وتكىزە المادىق. الايدا كوپ بالالى اسكەري قىزمەتشىلەردىڭ وتباسىنداعى 30-دان استام بالانىڭ ۇيىنە بارىپ, ارنايى قۇتتىقتادىق. ولارعا ءتاتتى سىيلىق, ازىق-ت ۇلىك جيىنتىعىن جەتكىزدىك. بۇل بالالار – ەرتەڭگى مەملەكەتتىك قىزمەتكەرلەر, عارىشكەرلەر, ارتىستەر, دارىگەرلەر, اسكەري قىزمەتكەرلەر عوي. سوندىقتان جاس ۇرپاق ءۇشىن بارلىق جاعدايدى جاساۋ ءبىزدىڭ, ەرەسەكتەردىڭ باستى مىندەتى», دەيدى 5517 اسكەري ءبولىمىنىڭ كومانديرى پودپولكوۆنيك ەربول انتاي.
اسكەر كيىمىن كيگەن كومەكشىلەرىن ەرتكەن اياز اتا مەن اقشاقاردى بۇلدىرشىندەر قۋانا قارسى الدى. جاتتاپ العان تاقپاقتارى مەن ولەڭدەرىن جارىسا ايتىپ, اياز اتانىڭ قورجىنىنان شىققان سىيلىققا ءماز بولىستى.
– جاڭا جىل قارساڭىندا اسكەري قىزمەتشىلەردىڭ بالالاردى قۇتتىقتاۋى – ءبىزدىڭ بولىمدە جىل سايىن قايتالاناتىن داستۇرگە اينالعان. بۇعان بالالار دا, ولاردىڭ اتا-انالارى دا ەرەكشە قۋانادى. كەلە جاتقان جاڭا جىلدىڭ قۋانىشتى جانە باقىتتى ساتتەرى كوپ بولسىن! – دەيدى 5517 اسكەري بولىمدەگى ايەلدەر كەڭەسىنىڭ ءتورايىمى سەرجانت زىيحا ورازاەۆا.
