وتىرىستا وسك توراعاسىنىڭ ورىنباسارى كونستانتين پەتروۆ Cايلاۋ تۋرالى زاڭعا سايكەس ءاربىر ازامات سايلاۋشىلار تىزىمىندەگى ءوزى تۋرالى دەرەكتەردى تەكسەرۋگە جانە تىزىمگە ەنگىزىلمەگەنى, دۇرىس ەنگىزىلمەگەنى نەمەسە تىزىمنەن شىعارىلعانى تۋرالى, سونداي-اق تىزىمدەگى سايلاۋشى تۋرالى دەرەكتەردە جىبەرىلگەن دالسىزدىكتەر تۋرالى شاعىمدانۋعا قۇقىلى ەكەنىن حابارلادى.
ازاماتتى ناقتى سايلاۋ ۋچاسكەسىندەگى سايلاۋشىلار تىزىمىنە ەنگىزۋ ءۇشىن ونىڭ سول سايلاۋ ۋچاسكەسىنىڭ اۋماعىندا تۇرعىلىقتى جەرى بويىنشا تىركەۋ قاجەت. 2019 جىلعى 1 قاراشادان باستاپ قازاقستاندا مەكەنجاي انىقتاماسىن ۇسىنۋ جونىندەگى مەملەكەتتىك قىزمەتتىڭ كۇشىن جويعانىن ەسكەرە وتىرىپ, ورتالىق سايلاۋ كوميسسياسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, E-gov پورتالىندا ازاماتتاردىڭ تىركەلگەن جەرى بويىنشا مالىمەتتەردى تەكسەرۋدىڭ ونلاين-سەرۆيسىن ىسكە اسىرۋ ماسەلەسىن پىسىقتادى.
وسك مۇشەسى ەرلان داۋىلباەۆ سايلاۋ الدىنداعى ۇگىت كەزەڭىندە كوميسسياعا كەلىپ تۇسكەن وتىنىشتەردى قاراۋ پروتسەسى تۋرالى باياندادى. 10 جانە 28 جەلتوقسان ارالىعىندا وسك-عا 29 ءوتىنىش كەلىپ تۇسكەن, ونىڭ ىشىندە 12 ءوتىنىش – زاڭدى تۇلعالاردان, 3-ەۋى – بۇقارالىق اقپارات قۇرالدارىنان, 14-ءى – جەكە تۇلعالاردان. وتىنىشتەردىڭ كوبى سايلاۋ زاڭناماسىن ءتۇسىندىرۋ تۋرالى بولعان. ودان بولەك 22 قازان مەن 28 جەلتوقسان ارالىعىنداعى كەزەڭدە وسك-عا 11 زاڭدى تۇلعادان قوعامدىق پىكىرگە سۇراۋ سالۋ تۋرالى حابارلامالار كەلىپ ءتۇستى. جەكە جانە زاڭدى تۇلعالاردىڭ وتىنىشتەرىنىڭ باسىم كوپشىلىگى سايلاۋ زاڭناماسىن ءتۇسىندىرۋ ماسەلەلەرىنە قاتىستى ەكەنىن ەسكەرە وتىرىپ, ادىلەت مينيسترلىگى 10 جەلتوقساننان باستاپ حالىققا, ۇيىمدارعا 119 ءنومىرى بويىنشا سall-ورتالىق ارقىلى قۇقىقتىق كونسۋلتاتسيالار بەرىپ كەلەدى.
شەتەلدىك بايقاۋشىلارعا كەلەر بولساق, 22 قازاندا سايلاۋدى حالىقارالىق باقىلاۋ ينستيتۋتى اشىلعاننان بەرى وسك 6 حالىقارالىق ۇيىم مەن 18 شەت مەملەكەتتەن 276 بايقاۋشىنى تىركەگەن. 29 جەلتوقسانداعى جاعداي بويىنشا سىرتقى ىستەر مينيسترلىگىنەن تاعى 7 حالىقارالىق ۇيىم مەن 11 شەت مەملەكەتتەن 98 بايقاۋشى اككرەديتتەۋگە ۇسىنىلدى.
سايلاۋ ناۋقانى باستالعاننان بەرى بارلىعى 9 حالىقارالىق ۇيىمنان 374 بايقاۋشى اككرەديتتەلدى (تمد پاا – 48, تمد يك – 177, يىۇ – 4, ەقىۇ – 39, ەقىۇ/ دياقب پا – 9, شىۇ – 15, تمىك – 7, ۇقشۇ پا – 6, تۇركپا – 9 جانە 26 شەت مەملەكەت (يوردانيا, قىرعىزستان, مالديۆ ارالدارى, مولدوۆا, تۇركيا, ازەربايجان, ارمەنيا, يندونەزيا, وزبەكستان, رۋمىنيا, ءۇندىستان, فيليپپين, ۆەنگريا, يسپانيا, نورۆەگيا, فرانتسيا, شۆەيتساريا, پولشا, رەسەي, چەحيا, يتاليا, ەستونيا, ۋكراينا, گەرمانيا, بەلگيا, پالەستينا). سايلاۋ تۋرالى كونستيتۋتسيالىق زاڭعا سايكەس شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ داۋىس بەرۋ كۇنىنەن بەس كۇن بۇرىن, ياعني 2021 جىلعى 4 قاڭتار كۇنگى ساعات 18.00-دە اياقتالادى.
سايلاۋ كۇنگى قاۋىپسىزدىك شارالارى بويىنشا دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتارلىق دارىگەرى ەرلان قياسوۆ ءسوز سويلەدى. حالىق اراسىندا COVID-19 كوروناۆيرۋستىق ينفەكتسياسىنىڭ تارالۋىنىڭ الدىن الۋ ماقساتىندا داۋىس بەرۋ كۇنى سايلاۋ پروتسەسىنىڭ بارلىق قاتىسۋشىلارى ۋچاسكەگە كەلگەن كەزدە ماسكا تاعىپ, قولعاپ كيۋى قاجەت. سونداي-اق قولدى دەزينفەكتسيالاۋعا ارنالعان سانيتايزەرلەردى پايدالانۋى, ءبىر-بىرىنەن كەمىندە 1,5-2 مەتر الەۋمەتتىك قاشىقتىقتى ساقتاۋى, قول الىسۋدان نەمەسە تىكەلەي بايلانىستىڭ باسقا تۇرلەرىنەن اۋلاق بولىپ, جەكە قالام پايدالانۋى شارت.
ىندەتتىڭ تارالۋى بويىنشا قىزىل جانە سارى ايماقتاردا ورنالاسقان وڭىرلەردە سايلاۋ كوميسسيالارىنىڭ بارلىق مۇشەلەرى, سەنىم بىلدىرىلگەن ادامدار, بايقاۋشىلار داۋىس بەرۋ كۇنى سايلاۋ وتكىزۋ باستالعانعا دەيىن 5 تاۋلىكتەن ەرتە ەمەس ۋاقىتتا پتر-تالداۋ ادىسىمەن زەرتحانالىق تەكسەرۋدەن ءوتۋى ءتيىس. وتىرىستا سونىمەن قاتار ساياسي پارتيالار تۋرالى اقپاراتتىڭ بىرىڭعاي فورماتى بەلگىلەندى.
