– ىشكى ىستەر ورگاندارىنا رەنىشىم دە, كۇدىگىم دە بار. بۇگىن پوليتسيادان ءبىر كىسى كەلدى, اشۋ ۇستىندە ول كىسىگە دە: «ورگاننىڭ ىشىندە ۇرىلارمەن سىبايلاسقان ادامدار بار», – دەپ ايتىپ تاستادىم. ول كىسى: «ورىنسىز جالا جاپپاڭىز, بۇلاي دەۋگە قانداي قۇقىڭىز بار؟ دالەلىڭىز جوق», – دەيدى. سول دالەلىم بولماعان سوڭ جۇرە الماي وتىرمىن عوي. دالەلىم بولسا, مەن بۇلاي وتىرماس ەدىم. وسى وڭىردە جىل سايىن تابىن-تابىن جىلقى ءىز-ءتۇزسىز كەتەدى. نە جىلقى تابىلمايدى, نە ۇرى ۇستالمايدى. جالاقور جان ەمەسپىن, جانىمدى جەگىدەي جەپ, كوڭىلدە كولكىپ تۇرىپ العان كۇدىگىمدى ايتىپ وتىرمىن. ويتكەنى بۇل جاقتا جىل سايىن جۇزدەپ جىلقى جوعالىپ جاتادى. سونىڭ بىرەۋى دە تابىلعان ەمەس. وسى توڭىرەكتەگى ەلدىڭ ءبارى بىلەدى, سوڭعى ەكى-ءۇش جىلدىڭ ىشىندە كيەۆ اۋىلىنان 100 باسقا جۋىق, سۋۆوروۆ اۋىلىنان 50 باس جىلقى ۇشتى-كۇيلى جوعالدى. ەشكىم كورمەيدى, ەشكىم بىلمەيدى. جەردىڭ استىنان ءوتىپ كەتپەسە, تابىنداعان جىلقىنى ۇشىپ بارا جاتسا دا بىرەۋ-مىرەۋ كورەدى عوي, – دەيدى اشىنعان انا.
حاليدا بايمۇراتوۆا – جەتى بالا تاربيەلەپ وتىرعان كوپ بالالى انا. 2018 جىلى مەملەكەتتىك باعدارلاما بويىنشا جىلدىق ءوسىمپ ۇلى 4 پايىزدىق 2 ملن 600 تەڭگە جەڭىلدەتىلگەن نەسيە الىپ, قىمىز ءوندىرىسىن قولعا الۋ ماقساتىندا 12 باس جىلقى ساتىپ العان. بيىل كۇزدە قولىنداعى قامبار اتا ءتولىنىڭ ۇزىن سانىن 32-گە جەتكىزدى. مۇنىڭ سىرتىندا, اۋىل تۇرعىندارى اقىسىن تولەپ, باعىپ بەر دەپ تابىنعا قوسقان 10 شاقتى جىلقى تاعى بار. نەسيەدەن قۇتىلىپ, نەسىبەمە جەتسەم ەكەن دەپ وتىرعان كوپ بالالى وتباسى ءبىر تۇندە 42 باس جىلقىدان تۇگەل ايىرىلىپ, اۋىل تۇرعىندارىنا دا, بانككە دە قارىز بولىپ قالدى. اۋىل تۇرعىندارى ازىرشە جىلقىلارىن سۇراپ وتىرعان جوق, بىراق اماناتتاپ تاپسىرعان مالدى ۇرى السا دا, قاسقىر جەسە دە, قۇنىن ءتۇبى يەسىنە قايتارىپ بەرۋ كەرەك.
– جىلقىلاردى كۇن سايىن كەشكىلىك قاماپ جۇرەتىنبىز. 30 قىركۇيەك كۇنى جولداسىم جۇمىستان كەش كەلىپ, تابا الماي قالدى. ءسويتىپ, سايعا تۇسكەن شىعار, قاراڭعىدا ءبارىبىر تاپتىرمايدى عوي, تاڭەرتەڭ ىزدەرمىن دەپ ۇيگە كەلدى. ەرتەسى كۇنى تاڭەرتەڭنەن باستاپ 4 كۇن بويى ىزدەدىك, تابىلماعان سوڭ 5 قىركۇيەك كۇنى پوليتسياعا حابار بەردىك. ءالى ناتيجە جوق. كۇن ساناپ ءۇمىت كەمىپ, كۇدىك كۇشەيىپ بارادى. ءوزىڭىز ويلاپ كورىڭىزشى, ماسەلەن, مەن ءبىر جەردەن 10 جىلقى ۇرلاپ اكەلدىم دەيىك. ارتىمدى بىرەۋ جاۋىپ وتىرماسا, مەن ول جىلقىنى قايدا تىعىپ, قايدا ساتىپ ۇلگەرەمىن. ۇيدە ۇستاي المايسىڭ, بازارعا اپارا المايسىڭ. بۇل جەردە ۇرىلاردىڭ ارتىن جاۋىپ وتىرعان ءبىر كۇش بار. پوليتسيا مەنىڭ قالتامداعى اقشا تاۋسىلعانشا عانا ىزدەدى. العاشقى ءۇش كۇن پوليتسيا ءوز كۇشىمەن ىزدەدى. ودان كەيىن پوليتسيانىڭ كولىگىنە ءوزىمىز بەنزين قۇيىپ بەرىپ وتىردىق. ەكى ايدان سوڭ اقشا دا ءبىتتى, ىزدەۋ دە توقتادى, – دەيدى جوق ىزدەگەن انا.
ءىستىڭ ءمان-جايىن وبلىستىق پوليتسيا دەپارتامەنتىنەن سۇراپ كورىپ ەدىك, ءباسپاسوز قىزمەتىنىڭ باسشىسى يرينا بەجەنار: «ۇزىنكول اۋدانى نوۆوپوكروۆ اۋىلىنىڭ 39 جاستاعى تۇرعىنى اۋداندىق پوليتسيا بولىمىنە 2020 جىلدىڭ 5 قازانىندا شاعىم ءتۇسىرىپ, 42 باس جىلقىسىنىڭ جوعالعانى تۋرالى حابارلاعان. شاعىمدانۋشىنىڭ سوزىنشە, جىلقى 29 قىركۇيەك كۇنى ۆوسكرەسەنوۆ اۋىلىنىڭ ماڭىندا ەركىن جايىلىپ جۇرگەن جەرىنەن جوعالعان. مال يەسى 5 كۇن بويى ءوز بەتىنشە ىزدەپ, تابا الماعان. جوقشى مال جوعالعان كۇنى بىردەن پوليتسياعا حابارلاعاندا, مۇلدە باسقاشا بولار ما ەدى. اتالمىش فاكتى بويىنشا قىلمىستىق كودەكستىڭ 188-1-بابىنىڭ 4-ءبولىمى, 2-تارماعى بويىنشا قىلمىستىق ءىس قوزعالدى. ىزدەستىرۋ شارالارىنا ارنايى ءموبيلدى توپتار تارتىلىپ, ولار ۇزىنكول, سارىكول اۋداندارىنداعى ەگىستىك جانە ورماندى القاپتاردى تەگىس ءسۇزىپ شىقتى. اۋەدەن ىزدەيتىن ارنايى دروندار پايدالانىلدى. وبلىستىڭ بارلىق پوليتسيا بولىمدەرىنە, سونداي-اق ىرگەدەگى سولتۇستىك قازاقستان وبلىسىنىڭ جامبىل اۋداندىق پوليتسيا بولىمىنە, شەكارالاس جاتقان قورعان وبلىسىنا قاراستى زۆەرينوگولوۆ, پولوۆين اۋداندارىنىڭ پوليتسيا بولىمشەلەرىنە حابار جىبەرىلدى. تەرگەۋ ءالى ءجۇرىپ جاتىر. جابىرلەنۋشىگە كەلگەن زيان كولەمى 15 ملن تەڭگە», – دەدى.
مال يەسىنىڭ ەسەبىنشە, ۇرلانعان جىلقىنىڭ جالپى قۇنى 22 ملن تەڭگەگە جاقىندايدى. حاليدا بايمۇراتوۆا ەندى بانككە بەرەشەك 1 ملن تەڭگەدەن استام قارجىنى قايدان تابارىن بىلمەي دال. اۋدان اكىمى مۇرات ساندىباەۆقا جولىعىپ جاعدايىن ايتىپ, بانك بەرەشەگىن ءبىر جىلعا كەيىنگە شەگەرۋگە كومەكتەسۋىن وتىنگەن ەكەن, ول كىسى كاسىپكەرلەر پالاتاسىنداعى زاڭگەر ماماندارمەن اقىلداسىپ كورەيىك, قولدان كەلگەنشە كومەكتەسەمىن دەگەن ۋادە بەرىپتى.
ال ءىز-ءتۇزسىز كەتكەن جىلقىدان ءالى حابار جوق. حاليدانىڭ ايتۋىنشا, نوۆوپوكروۆتان جەتى شاقىرىم جەردە جاتقان ۆوسكرەسەنوۆ اۋىلىندا تۇراتىن ايەل جوعالعان جىلقىنى 30 قىركۇيەك كۇنى كەشكە تامان جەرگىلىكتى تابىنشىنىڭ كولىكپەن قايىرىپ جۇرگەنىن كورىپتى. بىراق بۇل كۋاگەردىڭ سوزىنە پوليتسيا سەنبەي وتىرعان كورىنەدى.
قوستاناي وبلىسى
