جىل سوڭىنا دەيىن سوزىلاتىن ءىس-شارالار بارىسىندا پوليتسيا مەن قالالىق ءبىلىم بەرۋ مەكەمەلەرى قىزمەتكەرلەرىنەن قۇرالعان توپ تىركەۋدە تۇرعان قولايسىز وتباسىلار, پوليتسيا ەسەبىنە الىنعان كامەلەتكە تولماعان جاسوسپىرىمدەرمەن جەكە-دارا جۇمىس جۇرگىزەدى. قالالىق ءبىلىم بەرۋ مەكەمەلەرىنىڭ قىزمەتكەرلەرى مەن مەكتەپتەردىڭ الەۋمەتتىك پەداگوگتەرىنەن قۇرالعان توپ وگەي بالا تاربيەلەپ وتىرعان وتباسىلاردىڭ ۇيلەرىن ارالاۋدى دا جوسپارعا ەنگىزدى.
ايتا كەتۋ كەرەك, اقتوبە وبلىسىندا 186 قولايسىز وتباسى, قۇقىق بۇزۋشىلىققا بەيىمدىگى ءۇشىن پوليتسيا ەسەبىنە الىنعان 150 كامەلەتكە تولماعان ءجاسوسپىرىم تىركەۋدە تۇر. سونىمەن قاتار 350 وتباسىندا 600-گە جۋىق وگەي بالا تاربيەلەنىپ جاتىر. بيىلعى كۇز-قىس مەزگىلىندە جاسوسپىرىمدەردىڭ تۇنگى ۋاقىتتا اتا-انالارىنىڭ قاراۋىنسىز كوشەدە ءجۇرۋ دەرەكتەرى جيىلەپ كەتتى. ونىڭ ۇستىنە, قاشىقتان وقىتۋعا بايلانىستى مەكتەپ مۇعالىمدەرى وقۋشىلاردى بۇرىنعىداي جەتكىلىكتى دەڭگەيدە باقىلاي الماي وتىر. بالا ءتارتىبى مەن تاربيەسى ءۇشىن ەڭ الدىمەن اتا-اناسى جاۋاپتى بولسا دا, جاعدايدى باقىلاۋدان شىعارىپ العان اتا-انالار قاتارى كوبەيىپ بارا جاتقانى الاڭداتادى. سونىڭ ءبىر دالەلى, وسى جىلدىڭ سوڭعى توقسانىندا اتا-انالىق مىندەتىن تولىق ورىنداماعان 7 اتا-انا اقبتك-ءنىڭ 127-بابى بويىنشا اكىمشىلىك جاۋاپكەرشىلىككە تارتىلىپ, 11 تۇرمىسى ناشار وتباسى ەسەپكە قويىلدى. مۇنىمەن بىرگە كامەلەتكە تولماعانداردىڭ قۇقىقتارىن قورعاۋ جونىندەگى كوميسسيا قاراۋىنا 23 ءىس جىبەرىلدى. وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى جاڭا جىل مەرەكەسى مەن وقۋشىلاردىڭ قىسقى كانيكۋلى كەزىندە مەكتەپ پەن كوللەدج وقۋشىلارى اراسىنداعى قۇقىقبۇزۋشىلىقتىڭ الدىن الۋ ماقساتىندا جەدەل-پروفيلاكتيكالىق ءىس-شارالاردى كۇشەيتۋدى جوسپارلاپ وتىر.
اقتوبە وبلىسى
