«ماحاببات سۋسىنى» – يتاليالىق سازگەردىڭ شىعارماشىلىق زور تابىسىنىڭ ءبىرى. فرانتسۋز قويۋشىسى ارنو بەرنار رەجيسسەرلىك ەمەس, ءداستۇرلى وپەرا جولىن ۇستانىپ, سپەكتاكلدى وتكەن داۋىرگە تولىقتاي لايىقتاپ جاسادى. دەگەنمەن, وپەرا جانرى شارتتى دۇنيە, سوندىقتان بۇل كلاسسيكالىق قويىلىم ارنو بەرناردىڭ قىزىقتى وي-پايىمدارىمەن ارلەنە ءتۇستى, اتاپ ايتقاندا, كەيىپكەرلەر ساحنا كەڭىستىگىنىڭ استىنان پايدا بولىپ, ال الاياق دۋلكامارا سپەكتاكلدىڭ سوڭىندا اۋە شارىمەن ۇشىپ كەتسە دە, وسىنىڭ ءبارى زاماناۋي شىندىق تۇرعىسىنان وتە ۇيلەسىمدى كورىندى ءارى كومپوزيتوردىڭ ۇلى تۋىندىسىن جاڭا زامان كورەرمەنىنىڭ قابىلداۋىنا ءبىر تابان جاقىنداتا ءتۇستى.
الەمنىڭ كوپتەگەن ەلدەرىنە تانىلعان قويۋشى ديريجەر الان بورىباەۆ پەن رەجيسسەر ارنو بەرناردىڭ, زامانىمىزدىڭ كورنەكتى ستسەنوگرافى ەتسيو فريدجەريو مەن كوستيۋمدەر بويىنشا سۋرەتشى, «وسكار» سىيلىعىنىڭ لاۋرەاتى فرانكا سكۋارچاپينونىڭ جۇيەلى جۇمىسىنىڭ ارقاسىندا وتكەن عاسىردا ورىن العان قاراپايىم حيكايادان جاستىقتىڭ جالىنى مەن ومىرگە دەگەن قۇشتارلىق ەسىپ تۇردى.
باس كەيىپكەر نەمورينو (جان تاپين, دامير سادۋاقاسوۆ) داۋلەتتى ارۋ اديناعا (سالتانات احمەتوۆا, الفيا كاريموۆا) عاشىق, بىراق سەزىمىن بىلدىرۋدەن قورقاقتايدى. ادينا دا سەرجانت بەلكورەگە (تالعات مۇساباەۆ, تالعات عالەەۆ) تۇرمىسقا شىعا جازداعانىنا قاراماستان, شىن مانىندە نەمورينونى جاقسى كورەدى. جاعدايدىڭ ءتۇيىنىن دۇمشە ەمشى دۋلكاراما (باۋىرجان اندەرجانوۆ, ەۆگەني چاينيكوۆ) شەشەدى.
بارلىق ارتىستەر كەيىپكەرلەرىنىڭ بەينەسىن تولىقتاي اشا ءبىلدى.
