جالپى, قاۋىپتى دەرتتىڭ تارالۋى كەزىندە ەل-جۇرتتىڭ دەنساۋلىعى عانا ەمەس, بەكەم بىرلىگى دە سىنعا ءتۇستى. قۇدايعا شۇكىر, قازاق قوعامى ءبىر ەل, ءبىر حالىق بولىپ بۇل سىنعا توتەپ بەرە ءبىلدى. بيىل جاستارىمىزدى جاناشىرلىققا, جاۋاپكەرشىلىك پەن قامقورلىق جاساي بىلۋگە ۇندەدى. ادامگەرشىلىك قۇندىلىقتاردى جوعارى باعالايتىن قوعام ەكەنىمىز انىق بايقالدى. مۇقتاج جاندارعا قول ۇشىن بەرىپ, ءتۇرلى قيىندىقتارمەن بىرگە كۇرەسىپ, «الىپتىڭ قۋاتى – حالىقتا, حالىقتىڭ قۋاتى – بىرلىكتە» ەكەنى سوزبەن عانا ەمەس, ىسپەن دە دالەلدەندى.
دەرەكتەرگە سۇيەنسەك, بيىل ۆولونتەرلىكپەن اينالىسقاندار سانى 100 مىڭنان اسىپتى. جۇرەگى كەڭ مەيىربان جانداردىڭ وسىنشالىقتى كوپتىگى كوڭىل قۋانتادى. جاناشىر ازاماتتارى كوپ مەملەكەتتىڭ بولاشاعى دا جارقىن. بۇل – وزگەرمەيتىن اكسيوما. قازىرگى تاڭدا الەمنىڭ دامىعان ەلدەرىندە ۆولونتەرلىك ءۇردىسى قارقىندى قانات جايىپ كەلەدى. ماسەلەن, اقش-تا ءاربىر ءتورتىنشى ادام ءبىر رەت بولسا دە قوعامدىق شارالارعا قاتىسقان ەكەن. ەندى سول ۆولونتەرلەردىڭ ەڭبەگىن اقشاعا باعالاساق, ءبىر جىلدا امەريكالىقتار قوعامعا قۇنى 193 ميلليارد دوللارداي پايدا اكەلەتىن كورىنەدى.
ۆولونتەرلىكتىڭ تاعى ءبىر ەرەكشەلىگى, شارۋانى جاپپاي اتقارۋ وعان جۇمىسشى جالداعاننان الدەقايدا جەڭىل. بۇۇ ۆولونتەرلەرى كەلتىرگەن دەرەكتەرگە ساي, 1 ميلليارد ۆولونتەر تولىق مەرزىمدە جۇمىس ىستەيتىن 109 ميلليون ادامدى الماستىرا الادى ەكەن. ياعني ۆولونتەرلىكتىڭ تيىمدىلىگى مول. باسقالاي ايتقاندا, ۆولونتەرلەر قىزمەتى بارشا ازاماتتارىمىزعا ۇلگى بولىپ, ۇلتتىڭ جاڭا ساپاسىن قالىپتاستىرۋعا جول اشادى.
ءبىزدىڭ ەلدە ۆولونتەرلىك قىزمەتى بىرتىندەپ ءورىسىن كەڭەيتىپ كەلەدى. اسىرەسە 2020 جىلدىڭ «ۆولونتەر جىلى» دەپ جاريالانۋى بۇل سالاعا تىڭ سەرپىن بەرگەنى انىق. قازاقستان وزگەنىڭ ماسەلەسىن ءوز ىسىندەي كورەتىن جۇرەگى كەڭ, نيەتى دۇرىس ازاماتتاردان كەندە ەمەس. بيىل بارلىق ايماقتا اشىلعان ۆولونتەرلەردىڭ فرونت-وفيستەرىندە كوتەرىلگەن ماڭىزدى باستامالار وسىنىڭ دالەلى.
ماسەلەن, «Birgemiz» جالپىۇلتتىق باستاماسى از عانا ۋاقىتتا كوپتەگەن جاناشىر وتانداسىمىزدى ورتاق ىسكە جۇدىرىقتاي جۇمىلدىردى. جوباعا قاتىسۋشىلار الەمدى جايلاعان ىندەتكە قاراماستان, قيىن جاعدايعا تاپ بولعان مۇقتاج جاندارعا بارىنشا كومەكتەستى. وسى باستاما اياسىندا «Qamqor», «Saulyq», «Sabaqtastyq» جوبالارى جۇزەگە اسىرىلىپ, ءجۇز مىڭداعان تۇرعىنعا كومەك كورسەتىلدى.
بۇگىندە تازالىق ماسەلەسى وتە وزەكتى. اسىرەسە پوليەتيلەن قوقىستار ءار جەردە شاشىلىپ, قورشاعان ورتانى لاستاپ جاتقاندا ونىمەن كۇرەسۋدىڭ ماڭىزى ارتا تۇسەدى. ەكوبەلسەندىلىك – ءسان قۋ ەمەس, شىنايى قاجەتتىلىك, ءومىر قاعيداتى. ەلىمىزدەگى ۆولونتەرلەر وسى باعىتتا دا اۋقىمدى جۇمىس اتقاردى. وزەندەردى, ورمانداردى تازالاۋ, اعاش ەگۋ, قوقىستى سۇرىپتاۋ جونىندەگى «Taza Alem» ۆولونتەرلىك قوزعالىسىنىڭ قىزمەتى دە كوپشىلىكتىڭ قولداۋىنا يە بولدى. سونىڭ ناتيجەسىندە تابيعات مىڭداعان توننا قوقىستان تازارتىلىپ, كەڭ تىنىس الدى.
بۇدان بولەك, ۆولونتەرلەر تۇرعىنداردىڭ قۇقىقتىق ساۋاتىن اشۋ ماقساتىندا ونلاين قۇقىقتىق كومەك كورسەتتى. جان-جانۋارلاردى قورعاۋ بويىنشا دا كەلەلى جەتىستىكتەرگە قول جەتكىزدى. وسى باعىتتاعى جۇمىستى جۇيەلى جۇرگىزۋ ماقساتىندا الداعى ۋاقىتتا جان-جانۋاردى قورعاۋعا قاتىستى زاڭدا ەرىكتىلەردى جۇمىلدىرۋ قاراستىرىلماق. سونداي-اق قايىرىمدىلىق تۋرالى زاڭ جوباسى ازىرلەنىپ جاتىر.
ەرىكتىلەردى جۇمىلدىرعان تاعى ءبىر ەرەكشە جوبا جامبىل وبلىسىندا جۇزەگە استى. وبلىس اكىمى بەردىبەك ساپارباەۆتىڭ ۇيىتقى بولۋىمەن ىسكە قوسىلعان «اسارلاتىپ ءۇي سالۋ» باستاماسى اياسىندا وڭىردەگى ءار اۋىلدا ءبىر-بىردەن ءۇي سالىنىپ, مۇقتاج وتباسىلارعا بەرىلدى. جوبانىڭ ەرەكشەلىگى سول, وعان وبلىس بيۋدجەتىنەن قاراجات بولىنگەن جوق. ءۇي سالۋعا قاجەتتى بۇكىل شىعىندى اۋىل تۇرعىندارىنىڭ وزدەرى كوتەردى.
قىسقاسى, ۆولونتەر جىلىندا اتقارىلعان شارۋا از ەمەس. ەرىكتى بولۋ ەرەن ەڭبەك پەن قاجىماس قايراتتى تالاپ ەتەتىن سالا. ەندىگى ماڭىزدى ماسەلە – 2020 جىلدىڭ اياقتالۋىمەن ناۋقانشىلدىققا سالىنىپ, ۆولونتەرلىكتى توقتاتپاي, كەلەشەكتە بۇل سالانى ودان ءارى وركەندەتە ءتۇسۋ. ەلدىكتىڭ بەلگىسى يگى ءىستى جالعاستىرۋدان كورىنەدى.
