جاۋىنگەرلىك تەحنيكانى تاپسىرۋ سالتاناتىنا وراي ۇيىمداستىرىلعان ءىس-شاراعا قورعانىس ءمينيسترى, گەنەرال-لەيتەنانت نۇرلان ەرمەكباەۆ, اۋە قورعانىسى كۇشتەرىنىڭ باس قولباسشىسى, اۆياتسيا گەنەرال-لەيتەنانتى نۇرلان ورمانبەتوۆ جانە قاراعاندى وبلىسىنىڭ اكىمى جەڭىس قاسىمبەك قاتىستى.
قورعانىس ءمينيسترى جاڭا اۆياتسيالىق تەحنيكانىڭ قازاقستان قارۋلى كۇشتەرىن قايتا جاراقتاندىرۋ جوسپارىنا سايكەس اسكەري-اۋە كۇشتەرىنىڭ قاراماعىنا كەلىپ تۇسكەنىن ءمالىم ەتتى.
– مانەۆرلىگى اسا جوعارى, كوپ ماقساتتى «سۋ-30سم» جويعىشتارى اسكەر مەن نىسانداردى اۋە شابۋىلىنان قورعاۋ, اۋە جانە جەردەگى نىسانالاردى انىقتاۋ مەن جويۋ مۇمكىندىگىن ەداۋىر ارتتىرادى. بۇل ۇشاقتاردىڭ ارقاسىندا قارۋلى كۇشتەردىڭ جاۋىنگەرلىك الەۋەتى ارتادى, – دەپ اتاپ ءوتتى ن.ەرمەكباەۆ.
اتالعان ۇشاقتار كۇن دەمەي, ءتۇن دەمەي, كەز كەلگەن اۋا رايىندا ارەكەت ەتە الاتىن, جاۋدىڭ ۇشاقتارىن اتىپ ءتۇسىرىپ, جەردەگى نىسانداردى جويىپ قانا قويماي, اۋە بارلاۋىن جۇرگىزىپ, باسقا ۇشاقتارعا ماقساتتى نۇسقاۋ بەرە الاتىن, 4++ دەپ تاڭبالاناتىن جاڭا بۋىننىڭ اۆياتسيالىق تەحنيكاسى. بۇدان بولەك, «سۋ-30سم» جويعىشتارى ۇزاق قاشىقتىققا ۇشادى جانە ولارعا اۋادا جانارماي قۇيۋعا بولادى.
رەسەيلىك اسكەري ماماندار بۇل جويعىشتاردىڭ الەمدەگى ەڭ ءتيىمدى اسكەري ۇشاقتاردىڭ ءبىرى ەكەنىن ايتادى. مىسالى, رەسەيلىك سىناق ۇشقىشى ماكسيم كوليۋشين «سۋ-30سم» جويعىشىمەن 2012 جىلدان باستاپ ۇشادى ەكەن. ونىڭ ايتۋىنشا, اتالعان ۇشاق – الەمدەگى ەڭ ۇزدىك اسكەري-اۆياتسيالىق تەحنيكانىڭ ءبىرى.
رەسەيدەن كەلگەن جاڭا ۇشاقتاردىڭ قۇلاعىندا ويناۋ ءۇشىن قاراعاندى اۆياتسيالىق بازاسىنىڭ ۇشۋ جانە ينجەنەرلىك-تەحنيكالىق قۇرامى تالدىقورعان قالاسىندا جانە يركۋتسك اۆياتسيالىق زاۋىتىندا تولىق قايتا وقىتۋدان وتكەن. بۇگىنگى كۇندە ولاردىڭ بۇل ۇشاقتارمەن ۇشۋعا, ولاردى پايدالانۋعا جانە قىزمەت كورسەتۋگە ءتيىستى رۇقساتتارى بار. جالپى, ءبىزدىڭ تاراپتىڭ «يركۋتسك» اۆياتسيالىق زاۋىتىمەن ىنتىماقتاستىعى بۇدان بەس جىل بۇرىن باستالعان ەكەن.
تەوريا مەن تاجىريبەدەن تۇراتىن ەكى كەزەڭدىك قايتا وقىتۋدان وتكەن ۇشقىشتىڭ ءبىرى تەمىرلان بايمەنوۆ. ول ءوزىنىڭ الداعى ۋاقىتتا زاماناۋي «سۋ-30سم» جويعىشىمەن ۇشاتىنىنا وتە قۋانىشتى ەكەنىن جەتكىزدى. جاس ۇشقىش اتالعان اۆياتسيالىق تەحنيكانىڭ ارقاسىندا اۋە كەڭىستىگىمىزدىڭ قورعانىسى نىعايا تۇسەتىنىن سەنىمدى تۇردە ايتتى.
ال وبلىس اكىمى جەڭىس قاسىمبەك اسكەريلەرگە قويىلعان مىندەتتەردى ويداعىداي اتقارىپ شىعاتىنىنا سەنىم ءبىلدىردى جانە ولاردى وسى ماڭىزدى وقيعامەن قۇتتىقتادى.
قاراعاندى وبلىسى
