ونىڭ ايتۋىنشا, سالىمشىلار مەن الۋشىلاردىڭ ءوز جيناعىنا قىزىعۋشىلىعى ارتتى. وسى ورايدا جەكە زەينەتاقى شوتىنان ءۇزىندى-كوشىرمە الۋعا سۇرانىس سانى كوبەيگەن. ياعني, قابىلدانعان زاڭنامالىق وزگەرىستەردىڭ جاعىمدى جاعىنىڭ ءبىرى – زەينەتاقى الۋعا دا, اعىمداعى قاجەتتىلىككە دە پايدالانۋعا مۇمكىندىك بەرەتىن زەينەتاقى جيناعىنا دەگەن قىزىعۋشىلىقتى ارتتىرۋ. زەينەتاقى جيناعىن پايدالانۋ ءۇشىن ولاردى قالىپتاستىرۋ قاجەت.
ال ول ءۇشىن ەڭبەك ەتكەن ۋاقىت ىشىندە زەينەتاقى جارنالارى تۇراقتى جانە تولىق كولەمدە اۋدارىلىپ وتىرعانى ءجون. وسىلايشا, سالىمشىلاردىڭ قۇقىعى كەڭەيتىلىپ, ولاردىڭ ءوز جيناعىن قالىپتاستىرۋعا دەگەن قىزىعۋشىلىعىن, ەڭبەك تابىسىنىڭ اشىقتىعىن, باسقارۋدىڭ تيىمدىلىگىن ارتتىرۋى ءتيىس تەتىكتەر ىسكە قوسىلدى.
2020 جىلعى 1 جەلتوقسانداعى جاعداي بويىنشا مىناداي سانداردى كەلتىرۋگە بولادى: 761 مىڭنان استام ادام مەرزىمىنەن بۇرىن پايدالانۋ قۇقىعىن قولدانا الادى, ولاردىڭ شوتتارىندا 2,4 ترلن تەڭگەدەن استام قاراجات بار.
«زەينەتاقى جيناقتارىنىڭ ءبىر بولىگىن پايدالانۋ قۇقىعىن ىسكە اسىرۋ ءۇشىن ازاماتتار, ەڭ الدىمەن, ءوز جيناعىن تەكسەرىپ, جەتكىلىكتىلىك شەگىنەن اساتىن قاجەتتى سومانىڭ بار ەكەنىنە كوز جەتكىزۋى ءتيىس. بجزق قوردىڭ سايتى نەمەسە ۇيالى قوسىمشاسى ارقىلى ءۇزىندى-كوشىرمە الۋدىڭ قولجەتىمدى جانە جەدەل تاسىلدەرىن ۇسىنادى. زەينەتاقى شوتىنىڭ جاي-كۇيىن egov.kz پورتالى ارقىلى دا تەكسەرۋگە بولادى. زەينەتاقى جيناقتارىن الۋ تۋرالى شەشىم قابىلداعان ادامدار تۇرعىن ءۇي ساتىپ الۋ جانە ەمدەلۋ ماسەلەلەرى جونىندەگى ۋاكىلەتتى وپەراتورعا (وتباسى بانك) جۇگىنە الادى. ۋاكىلەتتى وپەراتوردان حابارلاما العاننان كەيىن بجزق زەينەتاقى جيناقتارىن ۋاكىلەتتى وپەراتوردىڭ ارنايى شوتتارىنا سالۋ ءۇشىن اۋدارۋدى جۇزەگە اسىرادى», دەدى ج.قۇرمانوۆ.
ونىڭ سوزىنە قاراعاندا, سالىمشى زەينەتاقى جيناعىن ماقساتتى قاجەتتىلىكتەرگە العان كەزدە جەكە تابىس سالىعىن تولەۋ ءتاسىلىن تاڭداۋ قۇقىعىنا يە بولادى (جارنالار اۋدارىلعان كەزدە جتس الىنباعانىن ەسكەرتەمىز).
ياعني ازاماتتار جتس تولەۋدى كەيىنگە قالدىرۋدى تاڭداسا بولادى نەمەسە تۇرعىن ءۇي جاعدايىن جاقسارتۋ جانە ەمدەلۋگە اقى تولەۋگە ارنالعان جيناقتارىن العان كەزىندە جتس-تى تولىق كولەمدە وتەي الادى. ەسكە سالا كەتەيىك, پارلامەنت زەينەتاقى جيناعىنىڭ ءبىر بولىگىن العان كەزدە تابىس سالىعىنا قاتىستى تۇزەتۋلەردى قابىلدادى.
