ءبىلىمدى ترانسفورماتسيالاۋ, مەكتەپتەگى تسيفرلى ورتا, وقۋشى بەلسەندىلىگىن ارتتىرۋ, زاماناۋي مۇعالىمگە قويىلاتىن جاڭا تالاپ سەكىلدى ماسەلەلەردى تالقىلاعان جيىنعا وتاندىق جانە شەتەلدىك ماماندار ونلاين رەجىمدە قاتىستى.
«بۇل فورۋم قاشىقتان وقىتۋ كەزىندە مۇعالىمدەردى قولداۋ بويىنشا جۇيەلى جۇمىس ناتيجەسىن كورسەتتى. ونىڭ ۇستىنە ءبىزدىڭ مەكتەپ باستاماسىمەن جۇزەگە اسقان «جاڭا زامان مۇعالىمىنە ارنالعان تسيفرلى گايد» جوباسى كەزەڭدەرىنىڭ ءبىرى بولدى. تسيفرلى قۇرالدار پەداگوگتەر ءۇشىن وقۋ پروتسەسىن ءتيىمدى ۇيىمداستىرۋ جانە وقۋشىلاردىڭ بويىندا ءححى عاسىر داعدىلارىن دامىتۋدىڭ زاماناۋي ادىسىنە اينالىپ وتىر», دەيدى مەكتەپ ديرەكتورى ايداربەك ايتپۋكەشەۆ.
فورۋمدا «نازارباەۆ قورىنىڭ» ءبىلىم بەرۋ سالاسىنداعى باس ساراپشىسى ءنازيپا ايۋباەۆا قاشىقتان وقىتۋ كەزەڭىندە مۇعالىمنىڭ رەفلەكسيالىق پراكتيكاسىنىڭ ماڭىزىن اتاپ ءوتتى. سونىمەن قاتار پەداگوگتەردىڭ مەكتەپ ىشىندەگى كاسىبي دامۋى وقۋشىلاردىڭ ءبىلىم الۋىنا ءتيىمدى اسەر ەتەتىنىن جەتكىزدى. EdCrunch University نيتۋ «ميسيس» ورتالىعىنىڭ ديرەكتورى نۇرلان قياسوۆ تسيفرلى الشاقتىقتى قايتا قاراستىرۋ, تەحنولوگيانى پاسسيۆ قولدانۋدان بەلسەندى پايدالانۋعا كوشۋ جانە مەكتەپتەگى تسيفرلى ءبىلىم بەرۋ ورتاسىن قالىپتاستىرۋ ەرەكشەلىكتەرىن ەسكەرۋگە شاقىردى.
ءبىلىم بەرۋدى ترانسفورماتسيالاۋ تاقىرىبىنداعى پانەلدى پىكىرتالاستا قازان قالاسىنداعى ا.ن.تۋپولەۆ اتىنداعى قۇزتۋ جانىنداعى ينجەنەرلىك ليتسەي ديرەكتورىنىڭ ورىنباسارى يندير حاليكوۆ, ورالداعى پەداگوگيكالىق شەبەرلىك ورتالىعى مەنەدجەر-ادىسكەرى گۇلنارا ەسماعۇلوۆا جانە جاھانشا دوسمۇحامەدوۆ اتىنداعى جوعارى پەداگوگيكالىق كوللەدج ديرەكتورىنىڭ ورىنباسارى زينۋر مۇحتار بايانداما جاسادى. فورۋمعا قاتىسۋشىلار ءارتۇرلى زاماناۋي رەسۋرستاردىڭ ىشىنەن ءتيىمدى تسيفرلى قۇرالدى قالاي تاڭداۋعا بولادى, ەڭبەك نارىعى الداعى جىلداردا قالاي وزگەرەدى, ۆيرتۋالدى الەم شىنايى الەمگە قالاي اسەر ەتەدى, تابىستى وفلاين جوبانى تابىستى ونلاينعا قالاي اينالدىرۋعا بولادى جانە قازىرگى تاڭداعى مۇعالىمدەردىڭ پراكتيكاسىنداعى باسقا دا وزەكتى ماسەلەلەردى تالقىلادى.
«تسيفرلى گايد» لايفحاكتار پاۆيلونىندا زياتكەرلىك مەكتەپتىڭ ۇزدىك مۇعالىمدەرى Pear Deck, LINOIT ونلاين تاقتاسى, CLASSTIME, WORDWALL, Mindmeister سەرۆيستەرى سياقتى ونلاين-پلاتفورمالار, پايدالى ۆەب-سايتتار, لايفحاكتار مەن ۇتىمدى شەشىمدەردى تانىستىرىپ, ولاردىڭ ساباقتا ءتيىمدى قولدانىلۋىن كورسەتتى. «ساندىق ساباق» سەسسياسىندا وبلىستىق جالپى ورتا مەكتەپ مۇعالىمدەرى پوستەر تۇرىندە زەرتتەۋلەرىن ۇسىندى.
فورۋم سوڭىندا NIS مۇعالىمدەرىنىڭ اكت داعدىلارىن دامىتۋ, قاشىقتان وقىتۋدىڭ وزىق تاجىريبەسىن تاراتۋ جانە مۇعالىمدەردىڭ شىعارماشىلىق باستاماسىن دامىتۋ ماقساتىندا ۇيىمداستىرىلعان «ۇزدىك ونلاين-ساباق» كاسىبي شەبەرلىك بايقاۋىنىڭ قورىتىندىسى بەلگىلى بولدى.
«قازىرگى زامان ساباعى – مۇعالىمنىڭ مونولوگى ەمەس, پىكىرتالاس, زەرتتەۋ مەن تاجىريبە الاڭى. مۇعالىم جەتەكشىلىك ەتەدى, ىنتالاندىرادى, بەلسەندى وقۋعا جاعداي جاسايدى. سول سەبەپتى مۇعالىمدەردىڭ كاسىبيلىگىنە قويىلاتىن تالاپتار دا ارتىپ كەلەدى. سوندىقتان ولار زاماناۋي وقىتۋ ادىستەرىن قولدانا ءبىلۋى كەرەك. بۇگىنگى فورۋمعا قاتىسۋشىلار وسىنداي ورتاق پىكىرگە كەلدى», دەيدى ورال قالاسىنداعى نازارباەۆ زياتكەرلىك مەكتەبىنىڭ وكىلى ايدانا حاميدۋللينا.
