تاراپتار بۇكىل ىنتىماقتاستىق اۋقىمى بويىنشا كەڭ كولەمدەگى ماسەلەلەردى تالقىلاپ, شەكارا ماڭىنداعى ءوزارا ءىس-قيمىلعا ەرەكشە نازار اۋداردى.
ي. بابۋشكين قازاقستاندى استراحان وبلىسىنىڭ نەگىزگى شەتەلدىك سەرىكتەستەرىنىڭ ءبىرى دەپ اتادى. قازىرگى ۋاقىتتا ىنتىماقتاستىق سان الۋان باعىتتاردا: ساۋدا, ونەركاسىپ, كولىك, لوگيستيكا, مادەنيەت, تۋريزم, مەديتسينا جانە ءبىلىم بەرۋ بويىنشا جۇرگىزىلەدى.
گۋبەرناتور سونىمەن قاتار استراحان وبلىسىندا وسى وڭىردە عاسىرلار تۇرىپ كەلە جاتقان ۇلت وكىلدەرىنىڭ اراسىنداعى بەيبىتشىلىكتى, كەلىسىم مەن ءوزارا تۇسىنۋشىلىكتى دامىتۋعا كوپ كوڭىل بولىنەتىنىن ەسكە سالىپ ءوتتى. قازاقتار ءاسا ىرى ەتنيكالىق قاۋىم بولىپ تابىلادى جانە رەسەيدەگى قازاقتاردىڭ باسقا وڭىرلىك قاۋىمدارى اراسىندا سان جاعىنان ءبىرىنشى ورىندا.
كەزدەسۋگە قاتىسۋشىلار ەكىجاقتى بايلانىستاردىڭ الەۋەتى ءالى دە سارقىلماعانىن جانە ولاردى ارتتىرۋ ءۇشىن جاقسى مۇمكىندىكتەردىڭ بار ەكەندىگىن اتاپ ءوتتى. كەلەشەگى مول باعىتتاردىڭ اراسىندا – استراحاندا شەكارا ماڭىنداعى ساۋدا ورتالىعىن قۇرۋ, ءوزارا ءونىم جەتكىزۋدى ارتتىرۋ, قازاقستاننان كەمە قۇرىلىسىنا تاپسىرىستار تارتۋ, كاسپيدە جاڭا كرۋيزدىك باعىتتار اشۋ.
گۋبەرناتور وڭىردە كەمەجايلىق ەرەكشە ەكونوميكالىق ايماق قۇرۋ, «سولتۇستىك – وڭتۇستىك» كولىك ءدالىزىن دامىتۋ تۋرالى ايتىپ بەردى جانە قازاقستاندىق بيزنەسكە جوباعا بەلسەندى تۇردە قاتىسۋدى ۇسىندى.
ەلشى پاندەميا كەزىندە كورسەتىلگەن كومەك ءۇشىن ءوڭىر باسشىسىنا العىس ءبىلدىردى. ول استراحان وبلىسى ءبىرىنشى بولىپ كومەك ۇسىنىپ, تەك قورعانىش قۇرالدارى مەن ءدارى-دارمەك قانا ەمەس, سونىمەن قاتار تاجىريبەلى دارىگەرلەردى دە جىبەرگەنىن اتاپ ءوتتى. ەلشى سونىمەن قاتار گۋبەرناتورعا ۇسىنىلعان تاياۋداعى ۋاقىتتاردا قازاقستانعا كەلۋگە شاقىرۋدى راستادى.
بيىل COVID-19 پاندەمياسى سالدارىنان قازاقستان مەن رەسەيدىڭ وڭىرارالىق ىنتىماقتاستىق فورۋمىنىڭ اۋىستىرىلعانىنا قاراماستان, كەزدەسۋگە قاتىسۋشىلار تۋىنداعان مىندەتتەردى اعىمداعى فورس-ماجورلىق جاعدايلاردىڭ وزىندە شەشۋ قاجەتتىگىن جانە ولاردى شەشۋ جولدارىن بىرلەسىپ ىزدەۋ كەرەكتىگىن اتاپ ءوتتى.
استراحانداعى جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەرمەن كەزدەسۋدىڭ بارىسىندا ەلشى ولاردىڭ پاندەميا جاعدايلارىندا رەسەيدە بولۋى مەن ءبىلىم الۋلارىنىڭ ءارتۇرلى اسپەكتىلەرىن تالقىلاپ, وتانداستارىمىزدىڭ سۇراقتارىنا جاۋاپ بەردى. قازىرگى ۋاقىتتا وڭىردەگى جوعارى وقۋ ورىندارىندا 1800-گە جۋىق قازاقستان ازاماتى وقيدى.
ساپار شەڭبەرىندە ەلشى سونىمەن قاتار استراحان قالاسىنىڭ باۋىرلاستار باعىنداعى «ماڭگىلىك الاۋ» مەموريالىنا گۇل قويدى. ول نەمىس فاشيستەرىنىڭ باسقىنشىلىعىنا قارسى بىرلەسكەن كۇرەستى ەستە ساقتاۋدىڭ جانە جاستاردى اتا-بابا ەرلىكتەرىنىڭ ۇلگىسىندە تاربيەلەۋدىڭ ماڭىزدىلىعىن اتاپ ءوتتى.
