سونىمەن قاتار سالتاناتتى شاراعا مادەنيەت جانە سپورت ۆيتسە-ءمينيسترى نۇرعيسا داۋەشوۆ, اقىن, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان, ءانشى, كومپوزيتور قازاقستاننىڭ حالىق ءارتىسى التىنبەك قورازباەۆ, حالىقارالىق «الاش» سىيلىعىنىڭ يەگەرى, «جالىن» جۋرنالىنىڭ باس رەداكتورى عالىم جايلىباي جانە ايتىسكەر اقىن باۋىرجان حاليوللا قاتىستى.
نۇرعيسا داۋەشوۆ مادەنيەت جانە سپورت ءمينيسترى اقتوتى رايىمقۇلوۆانىڭ لەبىزىن جەتكىزسە, ءجۇرسىن ەرمان, التىنبەك قورازباەۆ, عالىم جايلىباي تالاي دودادا توپ جارعان دارىندى ۇلعا جەرلەستەرى كورسەتكەن قۇرمەتكە ريزالىق تانىتتى. وسى سىيلىقتى ءۇشىنشى مارتە يەلەنىپ, سىردىڭ مەرەيىن وسىرگەن مۇحتار نيازوۆ قولىنا تيگەن «التىن دومبىرانى» ءوڭىر رۋحانياتىنا كورسەتكەن قولداۋىنا العىس ايتا وتىرىپ ايماق باسشىسىنا تابىستادى.
گۇلشارا ابدىقالىقوۆا «التىن دومبىرانىڭ» سىر جۇرتى ءۇشىن ەرەكشە ماقتانىش ەكەنىن جەتكىزدى.
- بايىرعى بابالاردىڭ ىزىندەي, قازاقتىڭ ايتىس ونەرىنىڭ بار قۇدىرەتىن بويىنا سىڭىرگەن مۇحتار – ەلىمىزگە تانىمال دارىندارىمىزدىڭ ءبىرى. وسى «التىن دومبىرا» رەسپۋبليكالىق ايتىسى باستالعان 2012 جىلعى العاشقى «التىن دومبىرا» يەگەرى اتانىپ, قۋانتىپ ەدى. ودان كەيىن دە ەكى مارتە وسى ايتىستا توپ جارىپ, سىر جۇرتىنا ۇلكەن سىي جاسادى, - دەدى وبلىس اكىمى.
وبلىس باسشىسى اتىنا ءوڭىرىمىزدىڭ بيزنەس قاۋىمداستىعىنىڭ وكىلدەرى, اعايىندى مۇرات, مارات سارسەنباەۆتاردىڭ ايتىس اقتاڭگەرىنە اۆتوكولىك مىنگىزۋ جايلى ۇسىنىس بىلدىرگەنىن اتاپ ءوتىپ, كاسىپكەر ازاماتتارعا سىر جۇرتشىلىعى اتىنان العىس ايتتى. مۇحتار نيازوۆقا ەڭ سوڭعى ۇلگىدەگى «Toyota Camri 70» اۆتوكولىگىنىڭ كىلتىن تارتۋ ەتتى.
سىرعا جەتكەن «التىن دومبىرا» وبلىستىق تاريحي-ولكەتانۋ مۋزەيىنىڭ «مادەنيەت جانە ونەر» زالىنا قويىلدى.
