پەتروپاۆل قالاسىنىڭ تۇرعىنى ەكى ۇلىنىڭ جوعالعانىن ايتىپ, 102 ارناسىنا جۇگىنگەن. التى جانە جەتى جاسار بالالار مەكتەپتەن ءوز بەتتەرىمەن كەتىپ قالعان.
«مازاسىزدانعان ايەل پوليتسياعا حابارلاسىپ, دابىل قاققان. ىزدەۋگە پوليتسەيلەر جەدەل كىرىسىپ, مەكتەپكە بارادى. ابىرجىعان انا مەن مۇعالىمى پاترۋلدىك پوليتسەيلەرمەن بىرلەسە وبلىس ورتالىعى كوشەلەرىنە ىزدەۋگە شىعادى. اعالى-ءىنىلىنى ماياكوۆسكي كوشەسى بويىنداعى جەر ۇيلەردىڭ ماڭايىندا انىقتادى. بالالار شوشىپ قالعان, جىلاعان. انالارىن كورگەن ولاردىڭ قۋانىشتارىندا شەك بولمادى. ابىروي بولعاندا, بارلىعى جاقسى اياقتالدى», – دەيدى پەتروپاۆل قالاسى پب پاترۋلدىك پوليتسيا باتالونىنىڭ ينسپەكتورى شىمبولات ۋايسوۆ.
پوليتسەيلەر مۇنداي وقيعالار ءجيى ورىن الاتىنىن ايتادى. قازان ايىندا سەگىز جاستاعى قىز دۇربەلەڭگە سالدى. تاڭەرتەڭ دۇكەنگە شىعىپ, ءوز بەتىمەن ۇيىنە قايتپاعان. ونى ىزدەۋگە پوليتسەيلەر مەن ەرىكتىلەر تارتىلدى. قىزمەتكەرلەر قىز بالانى ۇيىنەن الىس جەردەن تاپتى.
«بالالار دوستارىنا ويناۋعا كەتىپ, قولدارىندا تەلەفوندارى بولماي, اتا-انالارىن ەسكەرتۋگە ۇمىتىپ جاتاتىن جاعدايلار دا كەزدەسەدى. بيىلعى وقۋ جىلىنىڭ باسىنان بارلىعى 25 بالا ىزدەپ تابىلدى. نەگىزىنەن جاسوسپىرىمدەر. ولاردىڭ بارلىعى كەزەكشى تاۋلىكتە ۇيلەرىنە قايتارىلدى», – دەيدى سقو پد كريمينالدىق پوليتسيا باسقارماسى.
