ءبىر اي بۇرىن نۇر-سۇلتان قالاسىنداعى نازارباەۆ زياتكەرلىك مەكتەبىنىڭ حيميا ءپانىنىڭ ساراپشى مۇعالىمى دينارا بەيسەمباەۆا «قازاقستان مۇعالىمى– 2020» ۇلتتىق سىيلىعىنىڭ ۇزدىك وندىعىن باستاپ, باس جۇلدە يەگەرى اتانعان بولاتىن.
اتالمىش بەدەلدى سىيلىق ۇزدىك وتاندىق پەداگوگتارعا بيىل ەكىنشى مارتە تابىستالدى. 2019 جىلى Global Teacher Prize» رەسمي وكىلى بولىپ تابىلاتىن اليا نازارباەۆانىڭ قوعامدىق ماڭىزدى باستامالار قورى «قازاقستان مۇعالىمى» ۇلتتىق سىيلىعىنا باستاما جاسادى.
بۇگىندە دينارا بەيسەمباەۆا قازاقستانداعى «Global Teacher Prize» امباسسادورى:
– جاھاندىق سىيلىقتىڭ باستى قاعيداتى – قوعامعا قىزمەت ەتۋ. ساۋالناما تولتىرۋ كەزەڭىندە-اق, جۇلدە قورىن قايدا جاراتار ەدىڭىز دەگەن سۇراققا اۋىل مەكتەبىنە قولداۋ كورەسەتەر ەدىم دەپ جاۋاپ بەرگەنمىن.
نۇرا اۋدانىنىڭ احمەت اۋىلى ساكەن سەيفۋللين اتىنداعى مەكتەپكە «Global Teacher Prize» امباسسادورىمەن بىرگە ونىڭ تۋعان مەكتەبىنەن قولداۋشىلار توبى: ديرەكتور سابىرجان سادۋاقاسوۆ, مۇعالىمدەر گۇلميرا ابيشەۆا مەن رينات قۇدايبەرگەن, جوعارى سىنىپ ەرىكتىلەرى – جانيا كەڭەس, جاڭگىر مۇرات, دىنمۇحاممەد جۇماعۇل كەلدى.
جاسىل وسكىن – NIS بەلگىسى بار قوراپشالاردا دينارا توكتاركانوۆنا جۇلدە قورىنىڭ ءبىر بولىگىنە العان حيميا كابينەتىنىڭ زەرتحانالىق جابدىقتارى بار.
دينارا بەيسەمباەۆانىڭ باستاماسىنا نازارباەۆ زياتكەرلىك مەكتەپتەرى قولداۋ ءبىلدىرۋدى ۇيعارىپ, جينالعان قارجىعا اۋىل وقۋشىلارىنا ناعىز جاڭاجىلدىق سىيلىق بولعان كومپيۋتەر مەن پروەكتور الىندى.
دينارا بەيسەمباەۆانىڭ اۋىلداعى ارىپتەستەرىنە ادىستەمەلىك قولداۋ كورسەتۋ بويىنشا ۇلكەن جوسپارلارى بار. «ساندىق عىلىم ۇيدە» ەلەكتيۆتى كۋرسىنىڭ اۆتورى رەتىندە ول حيميا جانە بيولوگيا پاندەرىنىڭ مۇعالىمدەرىمەن تاجىريبەسىمەن بولىسپەكشى, سونداي-اق, زەرتتەۋدى ساندىق فورماتتا ۇيىمداستىرۋ بويىنشا ەلەكتيۆتى كۋرس باعدارلاماسىن ازىرلەۋدە.
الەۋمەتتىك جەلىلەردە ۇلكەن جۇمىس جۇرگىزۋدى جالعاستىرۋدا, بۇگىندە فەيسبۋكتەگى «حيميا ءپانىنىڭ مۇعالىمدەرى» توبى پەداگوگيكالىق شەبەرلىكتىڭ جاڭا الاڭىنا اينالىپ وتىر. س.سەيفۋللين اتىنداعى ورتا مەكتەپتەگى ءپان بويىنشا ارىپتەستەرىمەن ىنتىماقتاستىق ورناتۋ جايى تالقىلانۋدا.
– ەلىمىزدەگى جۇزدەگەن اۋىلددىڭ ىشىنەن مۇمكىندىك تۋىپ جاھاندىق سىيلىقتىڭ امباسسادورىمەن كەزدەسۋ ءبىز ءۇشىن ۇلكەن مارتەبە, سونىڭ ناتيجەسىندە زياتكەرلىك مەكتەپتەرمەن دوستاسىپ جاتىرمىز, – دەپ ساكەن سەيفۋللين اتىنداعى ورتا مەكتەپتىڭ ديرەكتورى اتىمتاي بالابيەۆ اعىنان جارىلدى.
– بۇگىندە نازارباەۆ زياتكەرلىك مەكتەپتەرى جالپى پەداگوگتاردىڭ, ەڭ الدىمەن اۋىل مۇعالىمدەرىنىڭ كاسىبي دامۋى بويىنشا ۇلكەن جۇمىس اتقارۋدا. قاڭتار ايىنان باستاپ ءبىز ۇلتتىڭ ۇلى ۇستازى, اعارتۋشىسى, جازۋشىسى ىبىراي ءالتىنساريننىڭ 180 جىلدىعىنا ارنالعان پەداگوگيكالىق شەبەرلىكتىڭ ونلاين الاڭى جوباسىن باستاماقپىز, – دەيدى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا.
«قازاقستان مۇعالىمى– 2020» ۇلتتىق سىيلىعىنىڭ جەڭىمپازى, پەتروپاۆل قالاسىنداعى نازارباەۆ زياتكەرلىك مەكتەبىنىڭ فيزيكا ءپانى مۇعالىمى دينا قۇداباەۆانىڭ باستاماسىمەن وبلىستىق وقۋشىلار سارايىندا ەرەكشە ءبىلىم بەرۋ قاجەتتىلىگى بار بالالاردىڭ بوس ۋاقىتىن ءتيىمدى وتكىزۋگە ارنالعان كابينەت اشىلماق.
