تۇراقتى بىرىنشىلىكتىڭ جارىس كەستەسىندە ءتورتىنشى ورىندا تۇرعان بوب ءحارتليدىڭ شاكىرتتەرىنە قارسى كەزدەسۋدە «بارىس» بارىن سالدى. باسەكە باستالعان بەتتە رومان ستارچەنكو ەسەپ اشسا, 8-مينۋتتا كيريلل سەمەنوۆ تارازى باسىن تەڭەستىردى. بۇل گولداردىڭ ەكەۋى دە كوماندالاردىڭ ءبىر ويىنشىسى ارتىق كەزدە سوعىلدى. ەكىنشى كەزەڭدە الما-كەزەك شابۋىلدار جالعاستى. تەك ۇزىلىسكە ساناۋلى سەكۋندتار عانا قالعاندا تاعى سان باسىمدىعىن ۇتىمدى پايدالانعان ياكوب ليليا قوناقتاردى العا شىعاردى. ءۇشىنشى كەزەڭ دە ءدال سول ستسەناري بويىنشا ءوربىدى. ەكى كوماندادا دا جاقسى مۇمكىندىكتەر بولعانىمەن, ۇزاققا دەيىن تابلوداعى ەسەپ وزگەرگەن جوق. دەسەك تە شەشۋشى تۇستا شيراق قيمىلداعان قازاقستاندىق حوككەيشىلەر تاعى ءبىر شايبانى قاقپاعا ەنگىزىپ, باسەكەنىڭ سوڭعى نۇكتەسىن كويدى. بۇل گولدىڭ اۆتورى – فيليپ ۆارونە. ەسەپ – 3:1. ءسويتىپ «بارىس» كەيىنگى 9 ويىنىنىڭ 8-ىندە جەڭىسكە جەتتى.
وسىلايشا, قاتارىنان ءتورتىنشى كەزدەسۋدە جەڭىسكە جەتكەن «بارىس» جارىس كەستەسىندەگى جاعدايىن ءبىراز جاقسارتىپ, ءوز كورەرمەندەرىن قۋانتتى. قازىر ولار تۇراقتى بىرىنشىلىكتە 15-ورىندا كەلەدى. قورجىنىمىزدا 41 ۇپاي بار. ەندى جەرلەستەرىمىز 26 جەلتوقساندا حاباروۆسكىنىڭ «امۋرىن» قابىلدايدى.
