دەنساۋلىق ساقتاۋ ءمينيسترى وڭىردەگى ەپيدەميولوگيالىق جاعدايمەن تانىستى, سونداي-اق 2020 جىلعى 1 قىركۇيەكتە پرەزيدەنت قاسىم-جومارت توقاەۆتىڭ قازاقستان حالقىنا جولداۋىنىڭ نەگىزگى باعىتتارىن جانە قر ۇكىمەتىنىڭ دەنساۋلىق ساقتاۋ جۇيەسىنىڭ الدىنا قويعان مىندەتتەرىن ءتۇسىندىرۋ ءۇشىن بىرقاتار كەزدەسۋ وتكىزدى.
مينيستر شىعىس قازاقستان وبلىستىق اۋرۋحاناسىنىڭ كونسۋلتاتيۆتىك-دياگنوستيكالىق ورتالىعىندا بولدى, سونداي-اق وڭىردەگى اكتيۆتەرمەن كەزدەسۋ وتكىزدى, مەديتسينا قىزمەتكەرلەرىن قولداۋ ماقساتىندا قابىلدانىپ جاتقان شارالار تۋرالى - كوروناۆيرۋس ينفەكتسياسىنا قارسى كۇرەسكە تارتىلعان ماماندارعا ارنالعان ۇستەماقى جايلى ايتتى.
ا.تسوي دارىگەرلەر مەن سانيتارلىق-ەپيدەميولوگيالىق قىزمەت قىزمەتكەرلەرىنىڭ جالاقىسىن كەزەڭ-كەزەڭىمەن ارتتىرۋ جونىندەگى مىندەتتى ىسكە اسىرۋ ءۇشىن 2021-2023 جىلدارعا ارنالعان رەسپۋبليكالىق بيۋدجەت جوباسىندا شامامەن 1,1 ترلن تەڭگە قاراستىرىلعانىن ەسكە سالدى.
قازاقستاندا پرەزيدەنت قاسىم-جومارت توقاەۆتىڭ تاپسىرماسى بويىنشا العاشقى مەديتسينالىق كومەكتى ۇيىمداستىرۋ تاسىلدەرىن تۇبەگەيلى قايتا قاراۋ بويىنشا جۇمىستار جۇرگىزىلۋدە. مينيسترلىك قازاقستان حالقىنىڭ قاجەتتىلىكتەرىنە جانە شەتەلدىك پراكتيكانىڭ وزىق جەتىستىكتەرىنە جاۋاپ بەرەتىن مساك-تى دامىتۋدىڭ ۇزاق مەرزىمدى ستراتەگياسىن قالىپتاستىرۋ بويىنشا جۇمىس ىستەۋدە.
ول ءۇشىن امبۋلاتوريالىق-ەمحانالىق كومەكتىڭ قولجەتىمدىلىگىن جاقسارتۋ بويىنشا 2021-2023 جىلدارعا ارنالعان شارالار كەشەنىنىڭ جوباسى قالىپتاستىرىلۋدا, ول ەلدىڭ بۇكىل حالقىن پروفيلاكتيكالىق تەكسەرۋمەن قامتۋدى جانە «اۋىل – ەل بەسىگى» ارنايى جوباسىن ەسكەرە وتىرىپ, دەنساۋلىق ساقتاۋ ينفراقۇرىلىمىن دامىتۋدىڭ وڭىرلىك پەرسپەكتيۆالىق جوسپارلارىنا سايكەس كەمىندە 300 مساك وبەكتىسىن اشۋدى, مساك جۇمىسىن حالىقتىڭ مەديتسينالىق قىزمەتتەر كورسەتۋ جونىندەگى قاجەتتىلىكتەرىنە باعدارلاۋدى قامتيدى.
«مەديتسينالىق كومەكتىڭ قول جەتىمدىلىگىن جاقسارتۋ ء ۇشىن بارىنشا كولىكتەگى مەديتسينانى دامىتۋ قاجەت. قاجەتتى جابدىقتارمەن, ءوجج اپپاراتىمەن تولىق جابدىقتالعان 100 جىلجىمالى مەديتسينالىق كەشەن ساتىپ الىپ, وڭىرلەرگە تاراتتىق. مۇنىڭ بارلىعى ەلىمىزدىڭ تۇكپىر-تۇكپىرىندەگى حالىققا ساپالى كومەك كورسەتۋگە مۇمكىندىك بەرەدى», - دەدى ا.تسوي.
سونىمەن قاتار, پرەزيدەنتتىڭ تاپسىرماسىن ورىنداۋ اياسىندا دەنساۋلىق ساقتاۋ سالاسىنداعى كادر ساياساتىنىڭ ۇزاق مەرزىمدى بولجامى ازىرلەندى, سونداي-اق تاپشى مەديتسينالىق ماماندىقتاردى: ەپيدەميولوگ, ينفەكتسيونيست, رەانيماتولوگ, پۋلمونولوگ, كارديولوگتاردى دايارلاۋ ۇلعايتىلدى.
«اڭساعان ءسابي» باعدارلاماسى اياسىندا 2021 جىلدان باستاپ ەكۇ بويىنشا كۆوتا سانى 7 ەسەگە ارتادى.
