– ۆولونتەرلەر توتەنشە جاعداي كەزىندە ءدارى-دارمەكتەن باسقا, مۇقتاج ادامدارعا قاجەتتى ازىق-ت ۇلىكتى جەتكىزۋگە كومەكتەستى. قاۋىپسىزدىك ماقساتىندا تاسىمالداۋ كەزىندە بارلىق ەرىكتىلەر بەتپەردە, قولعاپ جانە قورعانىس كوستيۋمدەرىمەن قامتاماسىز ەتىلدى. ۆولونتەرلەر قوزعالىسىنىڭ بارلىق وكىلىنە بىرلەسكەن جۇمىسى ءۇشىن العىس ايتامىن, – دەدى وبلىس اكىمى ا.مۇحامبەتوۆ.
بۇگىندە ايماقتا 90 ۆولونتەرلىك ۇيىم بار. Qazvolunteer.kz سايتىندا قوستاناي وبلىسىندا ءبىلىم الىپ جاتقان 1125 ستۋدەنت جانە 60 ۇيىم تىركەلگەن. وبلىس ورتالىعىندا ۆولونتەرلەر قوزعالىسىن ۇيلەستىرىپ, باعىتتاپ وتىراتىن فرونت-وفيس جۇمىس ىستەيدى. وفيس قىزمەتكەرلەرى ءوزارا كومەك كورسەتۋ ماقساتىندا جاساعان vlo.kz ونلاين-سەرۆيسى سايتى ارقىلى وبلىس تۇرعىندارىنىڭ قانداي دا ءبىر كومەك الۋىنا نەمەسە كومەك ۇسىنۋىنا مۇمكىندىك قاراستىرىلعان.
ايماق باسشىسى جەرگىلىكتى ۆولونتەرلەردىڭ بيىلعى قاتاڭ كارانتين جاعدايىندا, اسىرەسە, اۋرۋحانالار مەن الەۋمەتتىك مەكەمەلەرگە كوپ كومەك كورسەتكەنىن ەرەكشە اتاپ ءوتتى. پاندەميا كەزىندە ەرىكتىلەر وبلىس ورتالىعىنداعى 5 ەمحانادان 6 مىڭ مەكەنجايعا ءدارى-دارمەك جەتكىزگەن. 200-دەن استام ۆولونتەر پروۆيزورلىق ستاتسيونارلارعا اكەلىنگەن وتتەگى باللوندارى مەن وكپەگە جاساندى جولمەن اۋا جىبەرەتىن اپپاراتتاردى ءتۇسىرۋ, عيماراتقا كىرگىزۋ جۇمىستارىن اتقارعان.
– ۆولونتەرلەر 2 مىڭنان استام وتتەگى باللونى مەن 100 توننانىڭ ۇستىندە گۋمانيتارلىق كومەككە كەلگەن زاتتاردى ءتۇسىردى. مەديتسينا قىزمەتكەرلەرىن قولداۋ ماقساتىندا «مىڭ العىس» اكتسياسى ۇيىمداستىرىلىپ, شارا اياسىندا 600-دەن استام مەديتسينا قىزمەتكەرىنە ازىق-ت ۇلىك تۇرىندە كومەك كورسەتىلدى. وبلىستا جىل باسىنان بەرى 800-دەن استام ءتۇرلى سيپاتتاعى قولداۋ شاراسى ۇيىمداستىرىلىپ, وعان 6 مىڭداي ۆولونتەر اتسالىستى, – دەدى وبلىس اكىمى.
سالتاناتتى جيىن بارىسىندا وبلىستىق جاستار ساياساتى باسقارماسىنىڭ باسشىسى مارات جۇرقاباەۆ ايماقتاعى ۆولونتەرلىك قوزعالىستىڭ 2025 جىلعا دەيىنگى دامۋ تۇجىرىمداماسى ازىرلەنەتىنىن ايتتى.
– بۇگىندە ەلىمىزدە ۆولونتەرلىك قوزعالىس تولىققاندى قالىپتاستى. الايدا ەرىكتىلەرگە قارجىلاندىرۋ, عيماراتپەن قامتاماسىز ەتۋ سياقتى جۇيەلى قولداۋ كورسەتىلۋ كەرەك. سوندىقتان 2021 جىلى وبلىستاعى ۆولونتەرلىك قوزعالىستى دامىتۋدىڭ تۇجىرىمداماسى ازىرلەنۋى ءتيىس, – دەدى مارات جۇرقاباەۆ.
ۆولونتەرلەردىڭ ەل ءۇشىن ەتكەن ەلەۋلى ەڭبەگى ەسكەرۋسىز قالعان ەمەس. بۇعان دەيىن قوستانايلىق 122 ۆولونتەر تۇڭعىش پرەزيدەنت نۇرسۇلتان نازارباەۆتىڭ العىس حاتىنا يە بولعان. ال ۆولونتەر جىلىنىڭ جابىلۋىنا ارنالعان سالتاناتتى جيىندا «كورپوراتيۆتىك ۆولونتەرلىك كوشباسشىسى» اتالىمى بويىنشا «جىل ۆولونتەرى» حالىقارالىق سىيلىعىنا جانگەلدين اۋدانىنىڭ «جالىن» جاستار ۇيىمى, «جىل مەتسەناتتارى» نوميناتسياسى بويىنشا «جومارت جۇرەك» سىيلىعىن بوريس كنيازەۆ يەلەندى. «جىلدىڭ ۇزدىك ۇيىمى» اتالىمىندا «ولجا-اگرو» جشس, «ەرەن ەرلىك» اتالىمى بويىنشا جانسەيىت قۇرمانعاليەۆ ماراپاتتالدى.
قوستاناي وبلىسى
