ەۋرازيالىق ينتەگراتسيا ينستيتۋتىنىڭ ۇيىمداستىرۋىمەن وتكەن ءىس-شاراعا جينالعان وتاندىق عالىمدار مەن ساراپشىلار دۇنيە جۇزىنە اۋىرتپالىعىمەن كەلگەن كۇردەلى جىلدا بولعان باستى وقيعالاردى ساراپتادى. جيىن مودەراتورى ساياساتتانۋشى, ساياسي عىلىمدار كانديداتى ەرلان سايروۆ تۇراقسىز الەمدەگى تۇراقتىلىقتى ساقتاۋدىڭ العىشارتتارىن ايتا كەلە, ەلىمىزدىڭ قوعامدىق-ساياسي ومىرىندەگى باستى وقيعالارعا بيلىكتىڭ بەرگەن جاۋابى مەن ارەكەتىنە تولىعىراق توقتالدى. تالقىلاۋ ساياسي باعىتتىڭ ساباقتاستىعى, ساياسي, ەكونوميكالىق, الەۋمەتتىك رەفورمالاردى جۇرگىزۋ, ءتيىمدى داعدارىستىق مەنەدجمەنت, قوعام مەن مەملەكەت اراسىنداعى ءوزارا سەنىم راديۋسىن كەڭەيتۋ سەكىلدى باعىتتاردا ءوربىدى.
«پرەزيدەنتتىڭ 2020 جىلعى كۇن تارتىبىندەگى نەگىزگى باعىتتاردىڭ ءبىرى – داعدارىسقا قارسى ساياسات پەن دامۋدىڭ جاڭا جاعدايلارىنا بەيىمدەلۋدىڭ ءبىر بولىگى بولىپ تابىلاتىن رەفورمالار بولدى. ۇلتتىق قوعامدىق سەنىم كەڭەسى قۇرىلىپ, ساياسي رەفورمالاردىڭ ءبىرىنشى پاكەتى دايىندالدى. «حالىق ۇنىنە قۇلاق اساتىن مەملەكەت» قۇرۋعا, ادىلەتتىلىك پەن تەڭ مۇمكىندىكتەر قاعيداتتارىن ىلگەرىلەتۋگە جانە بەكىتۋگە باعىتتالعان ەلىمىزدەگى دەموكراتيالىق وزگەرىستەرگە تىڭ سەرپىن بەرەتىن رەفورمالاردىڭ جاڭا پاكەتى دايىندالۋدا», دەپ اتاپ ءوتتى ە.سايروۆ.
بەلگىلى ساراپشى عالىم بايتۇق بيىلعى جىلدىڭ ايتۋلى وقيعالارعا تولى بولعانىن ەسكەرە كەلە, سايلاۋ ماسەلەسىنە ەرەكشە توقتالدى. ول ەلدە وتكەن پرايمەريز كەزىندە ساياسي ساحنادا بۇرىن بەلگىلى بولماعان, بەلسەندى ازاماتتاردىڭ پايدا بولعانىن ۇلكەن جەتىستىككە تەڭەدى. ونىڭ ايتۋىنشا, بۇل سايلاۋ ناۋقانىن قىزدىرا تۇسەدى جانە دارىندى, بىلىكتى مامانداردىڭ ەل الدىنا شىعىپ, ءوز كۇشتەرىن سىناۋىنا تاپتىرماس مۇمكىندىك. ودان بولەك ع.بايتۇق قازاقستاندا ۆولونتەرلەر قوزعالىسىنىڭ جاڭا سەرپىن الىپ ودان ءارى دامۋىن, قوعامدا يگى ىسىمەن كوپكە ۇلگى بولار تۇلعالاردىڭ قاتارى كوبەيگەنىن دە جەتىستىككە تەڭەدى.
ساياساتتانۋشى باۋىرجان تولەگەنوۆ بيىلعى جىلدىڭ باستى قيىندىقتارىن اتاپ ءوتتى. «بيىل ەل بيلىگى بەتپە-بەت كەلگەن سىن-تەگەۋرىندەر كوپ بولدى. ولاردىڭ قاتارىنا مۇناي باعاسىنىڭ تاريحي تومەندەۋىن, كوروناۆيرۋس پاندەمياسى مەن ونىڭ سالدارىنان تۋىنداعان ەكونوميكالىق داعدارىستى جاتقىزۋعا بولادى. قازاقستان بيلىگى ەڭ الدىمەن حالىقتىڭ دەنساۋلىعىن قورعاۋ, ەكونوميكالىق جانە الەۋمەتتىك تۇراقتىلىقتى قامتاماسىز ەتۋ باعىتىندا داعدارىسقا قارسى جەدەل جوسپار قۇرۋعا باسا نازار اۋداردى», دەدى مامان.
ساياسي كەڭەسشى دينا ايكەنوۆا مەملەكەت پەن بيلىك اراسىنداعى كەرى بايلانىستى ورناتۋ مەن ونىڭ ناتيجەلەرىن ساراپتادى. ونىڭ ايتۋىنشا, 2020 جىلدىڭ نەگىزگى باعىتتارىنىڭ ءبىرى – مەملەكەت پەن بيلىكتىڭ قوعامدىق ساۋالدارعا دەن قويۋى بولدى. وسى تۇرعىدا مەملەكەت باسشىسى حالىقپەن كەرى بايلانىس ورناتۋ, پىكىرلەر پليۋراليزمىنە جاعداي جاساۋ ارقىلى قوعام مەن مەملەكەت اراسىنداعى ءوزارا سەنىم راديۋسىن كەڭەيتۋگە باعىتتالعان «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدى جالعاستىردى. ساراپشى ازاماتتاردىڭ قۇقىعىن قورعاۋ مەن جەكە ادامعا قارسى جازالاردى قاتاڭداتۋ باعىتىندا ۇلكەن جۇمىس جۇرگىزىلگەنىن باسا ايتتى.
ءىس-شاراعا قاتىسقان قوعام قايراتكەرلەرى, ساراپشىلار مەن عالىمدار بيلىك پەن قوعام ءۇشىن ءتۇرلى سىناققا تولى جىلدا ەلدە بولعان باستى وقيعالاردى تۇيىندەي كەلە, جوعالتقانىمىزدى تۇگەندەپ قانا قويماي, اتقارىلعان يگى ىستەر مەن ۇزاق مەرزىمدە ناتيجە بەرەر ۇتىمدى شەشىمدەردىڭ كوپتىگىنە ءبىراۋىزدان كەلىستى.
