وندا كەڭەس وداعىنىڭ باتىرى, اكادەميك-جازۋشى مالىك عابدۋللين ەسىمى ۇلى جەڭىستىڭ 75 جىلدىعىنا وراي قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنىڭ كوكشەتاۋ تەحنيكالىق ينستيتۋتىنا بەرىلسە, ەجەلدەن ەرلىكتى مۇرات تۇتاتىن الاش بالاسى ءۇشىن اق تۇيەنىڭ قارنى جارىلار ەدى دەگەن بازىنا ايتىلعان بولاتىن. شىن مانىندە بۇل ماسەلە سوڭعى ءۇش جىلدان بەرى ساعىزداي سوزىلىپ كەلگەن ەدى.
ماقالا گازەت بەتىندە جارىق كورگەننەن كەيىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتى كارىباي مۇسىرمان ىشكى ىستەر ءمينيسترى ەرلان تۇرعىمباەۆقا دەپۋتاتتىق ساۋال جولداپ, ماسەلەنىڭ ورىندى كوتەرىلىپ وتىرعاندىعىن ايتىپ, قولداعان بولاتىن. تاياۋدا كوكشەگە ءسۇيىنشى حابار جەتتى. قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق ونوماستيكالىق كوميسسياسىنىڭ بيىلعى 4 جەلتوقسانداعى شەشىمىنىڭ قورىتىندىسى تۋرالى اقپارات تەحنيكالىق ينستيتۋتقا جولدانىپتى. وندا «قازاقستان رەسپۋبليكاسى توتەنشە جاعدايلار مينيسترلىگىنىڭ كوكشەتاۋ تەحنيكالىق ينستيتۋتى» رەسپۋبليكالىق مەملەكەتتىك مەكەمەسىنە مالىك عابدۋلليننىڭ ەسىمى بەرىلسىن دەلىنگەن.
قۋانىشتى حاباردى ەستىگەن كوكشەتاۋلىقتار ءبىر جەلپىنىپ قالدى. باتىر ەسىمى كەيىنگى ۇرپاقتى ەرلىككە باۋلىپ, ەلدىككە ۇيىتىپ, بىلىمگە باعىتتاپ, ومىرشەڭ ونەگە بولاتىن بولدى.
– ينستيتۋتقا حالقىمىزدىڭ اياۋلى پەرزەنتى كەڭەس وداعىنىڭ باتىرى, زاپاستاعى گۆارديا پولكوۆنيگى, كسرو عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور مالىك عابدۋلليننىڭ ەسىمى بەرىلۋى ەڭ الدىمەن ەلدىكتىڭ بەلگىسى بولدى, – دەيدى ينستيتۋت باسشىسى, ازاماتتىق قورعانىس پولكوۆنيگى سىرىم ءشارىپحانوۆ. – گۋمانيزم مەن ازاماتتىقتىڭ ادەمى ۇلگىسىندەي بولعان قازاق حالقىنىڭ كورنەكتى ۇلى ءۇش مارتە كسرو جوعارعى كەڭەسىنىڭ دەپۋتاتى بولىپ سايلانعان, پەداگوگتەردىڭ تالىمگەرى اتانعان مەملەكەتتىك قايراتكەر. ءبىزدىڭ ينستيتۋت تۇلەكتەرى باتىر اتىنداعى وقۋ ورنىنىڭ ابىرويىن اسقاقتاتپاق. وسى ماسەلە كوپتەن بەرى شەشىمىن تاپپاي كەلە جاتىر ەدى. قيىن ءتۇيىننىڭ شەشىلۋىنە اتسالىسقان ەل گازەتى – «ەگەمەنگە» مىڭ دا ءبىر راحمەت!
ءسوز قادىرى ءبوز قادىرىنەن ارزانداپ كەتكەن زاماندا اعا گازەتتىڭ ايتقان ءۋاجى ەسكەرىلىپ, حالىقتىڭ كوكەيىندە جۇرگەن سوقتالى ماسەلەنىڭ وڭىنان شەشىلگەنى قانداي جاقسى!
اقمولا وبلىسى
