سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ادامداردىڭ حابار-وشارسىز كەتۋىنىڭ ەكى سەبەبى بار. ەڭ ءبىرىنشىسى – ماسكۇنەمدىك. اراققا سالىنعان ادام ءوزى سياقتى سپيرتتىك ىشىمدىك ىشەتىندەردى جاعالايدى. ولار ءۇشىن وتباسى, تۋعان-تۋىس ەكىنشى ورىندا.
«تاعى ءبىر ءجيى كەزدەسەتىن ستسەناري – ادامدار جاقىندارىن ەسكەرتپەي, تابىس تابۋعا كەتەدى. بۇل – جاۋاپسىزدىق. ونى اتا-اناسى, تۋعان-تۋىستارى ىزدەپ, الاڭدايتىنىنا ءمان بەرمەيدى», دەيدى سقو پوليتسيا دەپارتامەنتى كريمينالدىق پوليتسيا باسقارماسىنىڭ باستىعى پەتر كليموۆ.
پوليتسەيلەردىڭ ايتۋىنشا, ماسكۇنەمدىككە سالىنىپ, جوعالاتىنداردىڭ قاتارىندا ايەلدەر دە بار. جاقىندا ءتارتىپ ساقشىلارى عابيت مۇسىرەپوۆ اتىنداعى اۋدان تۇرعىنىنىڭ ءوتىنىشى بويىنشا وتباسىن تاستاپ كەتكەن ايەلدى ىزدەستىردى. 27 جاستاعى كەلىنشەك قوستاناي وبلىسىنان تابىلدى. ول بۇرىن الكوگولدىك ىشىمدىك ىشكەنى ءۇشىن اكىمشىلىك جاۋاپقا تارتىلعان ەكەن.
ء«ىز-ءتۇزسىز جوعالعانداردى ىزدەستىرۋ – كريمينالدىق پوليتسيا جۇمىسىنىڭ ءبىر باعىتى. ىزدەستىرۋ ءىس-شاراسىنا كوپ ادام تارتىلادى: جەدەل ۋاكىلدەر, ۆولونتەرلەر ۇيىمدارىمەن بىرلەسە فاكتىلەردى تەكسەرەدى. 11 ايدىڭ ىشىندە سقو-دا حابار-وشارسىز كەتكەن 90 ادام ىزدەستىرىلدى. ونىڭ 67-ءسىنىڭ جۇرگەن جەرى انىقتالدى», دەيدى پەتر كليموۆ.
