مەملەكەت باسشىسى ءوزىنىڭ 2019 جىلعى 2 قىركۇيەكتەگى قازاقستان حالقىنا ارناعان جولداۋىندا پارلامەنت جانىنان زاڭداردىڭ ساپاسىن ارتتىرۋعا ىقپال ەتەتىن ءتيىستى قۇرىلىم قۇرۋدى تاپسىردى.
ۇكىمەت پارلامەنتپەن بىرلەسىپ پارلامەنتاريزم ينستيتۋتىن قۇرۋ ءۇشىن قاجەتتى شارالار قابىلدادى.
جاڭا قۇرىلىم قىزمەتىنىڭ نەگىزگى نىساناسى – زاڭنامانىڭ تيىمدىلىگىن تالداۋدى (نورماتيۆتىك قۇقىقتىق اكتىلەردى تالداۋ) قامتاماسىز ەتۋ, قازاقستان رەسپۋبليكاسىنىڭ زاڭناماسىن دامىتۋدىڭ عىلىمي تۇجىرىمدامالارىن ازىرلەۋ ارقىلى قازاقستان رەسپۋبليكاسىندا پارلامەنتاريزمدى دامىتۋ جانە ونىڭ تيىمدىلىگىن ارتتىرۋ.
وسىنداي ينستيتۋتتار بىرقاتار دامىعان ەلدەردىڭ زاڭ شىعارۋشى ورگاندارىنىڭ جانىندا جۇمىس ىستەيدى. ولاردىڭ جۇمىسى قابىلداناتىن زاڭداردىڭ ساپاسىن قامتاماسىز ەتۋ قاجەتتىلىگىنە تىكەلەي بايلانىستى. زاڭ جوبالارىن مۇقيات پىسىقتاۋ ناقتى سالالاردا ارنايى ءبىلىمدى تالاپ ەتەدى.
پارلامەنتاريزم ينستيتۋتى دەپۋتاتتارعا زاڭناماعا وزگەرىستەر ەنگىزۋ قاجەتتىلىگىن عىلىمي نەگىزدەۋدى, جاڭا نورمالاردى ەنگىزۋدى, زاڭ جوبالارىنىڭ ءوزىن ازىرلەۋدى جانە قاجەت بولعان جاعدايدا قارجىلىق-ەكونوميكالىق ەسەپتەردى دايىنداۋدى, سونداي-اق زاڭداردى ىسكە اسىرۋدىڭ ىقتيمال ەكونوميكالىق, الەۋمەتتىك, زاڭدىق, ەكولوگيالىق سالدارلارىنىڭ بولجامدارىن ازىرلەۋدى قوسا العاندا, ولاردىڭ زاڭ شىعارۋ باستاماسى قۇقىعىن ىسكە اسىرۋ بويىنشا جاردەمدەسەتىن بولادى. مۇندا دەپۋتاتتىق كورپۋسپەن بىرگە ۇكىمەتتىك نۇسقالارعا بالامالى زاڭنامالىق نورمالار ازىرلەنەتىن بولادى. بۇل قابىلداناتىن زاڭداردىڭ ساپالى پىسىقتالۋىنا ىقپال ەتەدى.
بۇدان باسقا, جاڭا قۇرىلىم مەملەكەتتىك باسقارۋدىڭ تيىمدىلىگىن ارتتىرۋدىڭ قۇقىقتىق تاسىلدەرىن زەردەلەۋمەن, ەكونوميكالىق جانە قوعامدىق ءومىر سالالارىن زاڭنامالىق رەتتەۋدى وڭتايلاندىرۋ جونىندە ۇسىنىستار ازىرلەۋمەن, سونداي-اق قولدانىستاعى زاڭنامانىڭ تيىمدىلىگىن تالداۋمەن اينالىسادى.
سونداي-اق, ينستيتۋت زاڭنامانى جەتىلدىرۋ بويىنشا ۇسىنىستار ازىرلەۋ, دامىعان شەت ەلدەر پارلامەنتشىلەرىنىڭ تاجىريبەسىن زەردەلەۋ ءۇشىن قوعامدا الەۋمەتتىك جانە ساراپتامالىق ساۋالنامالار جۇرگىزەتىن بولادى.
الداعى كەزەڭدە جاڭا قۇرىلىم مەملەكەتتىك تىركەۋ راسىمىنەن ءوتىپ, ونىڭ جارعىسى بەكىتىلەدى.
ينستيتۋتتىڭ قىزمەتى قوسىمشا قارجىلىق شىعىنداردى تالاپ ەتپەيدى, ويتكەنى ول كوزدەلگەن بيۋدجەتتىك شىعىستار شەڭبەرىندە جۇزەگە اسىرىلادى.
