زاڭ جوباسىنىڭ نەگىزگى باعىتتارى: ۋاكىلەتتى ورگاننىڭ قۇزىرەتىن كەڭەيتۋ, جەرگىلىكتى اتقارۋشى ورگانداردىڭ قۇزىرەتىن كەڭەيتۋ, سپورتتىق ينفراقۇرىلىمىنىڭ قولجەتىمدىلىگى, ءبىلىم بەرۋ سالاسىنداعى جاڭالىقتار. مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا, ۋاكىلەتتى ورگاننىڭ قۇزىرەتى ۇلتتىق سپورت تۇرلەرىنىڭ تىزبەسىن بەكىتۋ, بالالارعا ارنالعان سپورت سەكتسيالارى مەن شىعارماشىلىق ۇيىرمەلەرگە مەملەكەتتىك سپورتتىق جانە شىعارماشىلىق تاپسىرىستى ورنالاستىرۋ قاعيدالارىن بەكىتۋ, سونداي-اق مەملەكەتتىك سپورتتىق جانە شىعارماشىلىق تاپسىرىستى قارجىلاندىرۋدىڭ جان باسىنا شاققانداعى ءنورماتيۆىن بەكىتۋ بويىنشا ءتيىستى فۋنكتسيالارمەن تولىقتىرىلدى. «جەرگىلىكتى اتقارۋشى ورگانداردىڭ قۇزىرەتى كەلەسى قىزمەتتەرمەن تولىقتىرىلدى: دارىگەرلىك-دەنە شىنىقتىرۋ ديسپانسەرلەرىنىڭ سانىن ارتتىرۋ, حالىقپەن جۇمىس ىستەۋ ءۇشىن دەنە شىنىقتىرۋ جانە سپورت نۇسقاۋشىلارىمەن قامتاماسىز ەتۋ, مەملەكەتتىك سپورتتىق ءارى شىعارماشىلىق تاپسىرىستى بەكىتۋ جانە ورنالاستىرۋ, بالالار-جاسوسپىرىمدەر دەنە شىنىقتىرۋ دايارلىعى كلۋبتار جەلىسىن كەڭەيتۋ», دەدى مينيستر.
سپورت ينفراقۇرىلىمىنىڭ قولجەتىمدىلىگى مىنالاردى قاراستىرادى: - مۇگەدەكتەر مەن حالىقتىڭ ءجۇرىپ-تۇرۋى شەكتەۋلى توپتارىن قوسا العاندا, ولاردىڭ تۇرعىلىقتى جەرى بويىنشا جانە كوپشىلىك دەمالاتىن ورىنداردا سپورت وبەكتىلەرىنىڭ قولجەتىمدىلىگىن قامتاماسىز ەتۋ;
- تۇرعىن ءۇي كەشەندەرىن سالۋ كەزىندە مۇگەدەكتەر مەن حالىقتىڭ ءجۇرىپ-تۇرۋى شەكتەۋلى توپتارىنىڭ قولجەتىمدىلىگىن ەسكەرە وتىرىپ, سپورت الاڭدارىمەن قامتاماسىز ەتۋ قاجەتتىلىگى. جالپى وتىرىس بارىسىندا سەنات توراعاسى ماۋلەن اشىمباەۆ بۇل قۇجات بالالاردىڭ جان-جاقتى دامۋىنا ىقپال ەتەتىن سپورت جانە شىعارماشىلىق باعىتتاعى مەملەكەتتىك تاپسىرىستاردى ءتيىمدى ۇيىمداستىرۋعا مۇمكىندىك بەرەتىنىن اتاپ ءوتتى.
«بۇدان بىلاي مەملەكەت قارجىلاندىراتىن سپورتتىق جانە شىعارماشىلىق ۇيىرمەلەر مەملەكەتتىك ساتىپ الۋدىڭ قورىتىندىسىنا بايلانىستى ەمەس, ولاردىڭ رەيتينگىنە, سونداي-اق, حالىقتىڭ سۇرانىسىنا قاراي انىقتالادى. وسى زاڭعا مۇمكىندىگى شەكتەۋلى جاندار ءۇشىن تۇرعىلىقتى جەردە جانە دەمالىس ورىندارىندا سپورتپەن شۇعىلدانۋعا جاعداي جاساۋ نورمالارى دا ەنگىزىلدى. سوعان سايكەس بۇل جۇمىس ەندى جەرگىلىكتى اتقارۋشى ورگانداردىڭ مىندەتى بولىپ ەسەپتەلەدى. سونىمەن قاتار بۇل قۇجاتتا ۇلتتىق سپورت تۇرلەرىن دامىتۋ, ولاردى جاس بۋىنعا مەكتەپ كەزىنەن باستاپ ناسيحاتتاۋ ماسەلەلەرىنە دە ەرەكشە نازار اۋدارىلعان», دەدى م. اشىمباەۆ.
