مەملەكەت باسشىسى بيىلعى جولداۋىندا بۇقارالىق سپورتقا جانە دەنە تاربيەسىنە باسىمدىق بەرۋ قاجەت ەكەنىن ەرەكشە اتاپ وتكەن بولاتىن. سوعان سايكەس دەپۋتاتتار بۇگىنگى وتىرىس بارىسىندا «مادەنيەت, دەنە شىنىقتىرۋ جانە سپورت ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ قابىلدادى.
«بۇل زاڭ بالالاردىڭ جان-جاقتى دامۋىنا ىقپال ەتەتىن سپورت جانە شىعارماشىلىق باعىتتاعى مەملەكەتتىك تاپسىرىستاردى ءتيىمدى ۇيىمداستىرۋعا مۇمكىندىك بەرەدى. بۇدان بىلاي مەملەكەت قارجىلاندىراتىن سپورتتىق جانە شىعارماشىلىق ۇيىرمەلەر مەملەكەتتىك ساتىپ الۋدىڭ قورىتىندىسىنا بايلانىستى ەمەس, ولاردىڭ رەيتينگىنە, سونداي-اق, حالىقتىڭ سۇرانىسىنا قاراي انىقتالادى. وسى زاڭعا مۇمكىندىگى شەكتەۋلى جاندار ءۇشىن تۇرعىلىقتى جەردە جانە دەمالىس ورىندارىندا سپورتپەن شۇعىلدانۋعا جاعداي جاساۋ نورمالارى دا ەنگىزىلدى. سوعان سايكەس بۇل جۇمىس ەندى جەرگىلىكتى اتقارۋشى ورگانداردىڭ مىندەتى بولىپ ەسەپتەلەدى. سونىمەن قاتار بۇل قۇجاتتا ۇلتتىق سپورت تۇرلەرىن دامىتۋ, ولاردى جاس بۋىنعا مەكتەپ كەزىنەن باستاپ ناسيحاتتاۋ ماسەلەلەرىنە دە ەرەكشە نازار اۋدارىلعان», دەدى ماۋلەن اشىمباەۆ.
وتىرىس كەزىندە سەناتورلار «تەحنيكالىق رەتتەۋ تۋرالى» زاڭدى قابىلدادى. بۇل قۇجات وتاندىق تاۋار وندىرۋشىلەردىڭ باسەكەلەستىك باسىمدىعىن ىسكە اسىرۋعا ارنالعان. سونداي-اق دەپۋتاتتار «تەحنيكالىق رەتتەۋ, كاسىپكەرلىك, مەملەكەتتىك باسقارۋ جۇيەسىن جەتىلدىرۋ جانە تولەمدەر ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قاراپ, قابىلدادى.
«ىشكى نارىقتىڭ قاۋىپسىزدىگىن قامتاماسىز ەتۋ ءۇشىن ۇلتتىق سەرتيفيكاتتاۋ جۇيەسىن دامىتۋ قاجەت. ۇلتتىق ستاندارتتاردىڭ بەدەلى مەن ولارعا دەگەن سەنىمدى ارتتىرۋ ماسەلەسى دە ماڭىزدى. بۇگىن قابىلدانعان زاڭدار وسى ماقساتتاردى جۇزەگە اسىرۋعا باعىتتالعان. ولار تەحنيكالىق رەتتەۋ سالاسىنداعى باقىلاۋ-قاداعالاۋ قىزمەتىنىڭ اشىقتىعى مەن تيىمدىلىگىن قامتاماسىز ەتەدى. سول ارقىلى ءونىمنىڭ ءتيىستى ساپاسىنا جانە ونىڭ تۇتىنۋشىلار ءۇشىن قاۋىپسىز بولۋىنا ىقپال ەتەدى», دەدى سەنات توراعاسى.
ودان بولەك, سەنات دەپۋتاتتارى «كەدەندىك رەتتەۋ جانە كاسىپكەرلىك قىزمەت ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قاراپ, قابىلدادى. بۇل زاڭعا پارلامەنت دەپۋتاتتارى باستاماشى بولعانىن اتاپ وتكەن ءجون. سەنات سپيكەرىنىڭ ايتۋىنشا, قابىلدانعان زاڭ كەدەندىك راسىمدەردى وتكىزۋ مەرزىمدەرى مەن ءتارتىبىن وڭتايلاندىرۋعا, كەدەندىك رەتتەۋدى جەتىلدىرۋگە جانە بيزنەس احۋالدى جاقسارتۋعا باعىتتالعان.
«وسى زاڭ ادامنىڭ قاتىسۋىن بارىنشا ازايتىپ, سىبايلاس جەمقورلىق تاۋەكەلدەرىن تومەندەتۋگە جانە قۇجات اينالىمىن ازايتۋ ءۇشىن كەدەندىك اقپاراتتىق بازانىڭ قىزمەتى مەن «بىرىڭعاي تەرەزە» جۇيەسى جەتىلدىرۋگە مۇمكىندىك بەرەدى. سونداي-اق سىرتقى ەكونوميكالىق قىزمەتكە قاتىسۋشىلاردىڭ وتىنىشتەرىن قاراۋ جانە سول بويىنشا شەشىم قابىلداۋ مەرزىمدەرىن قىسقارتۋعا جاعداي جاسايدى. سونىمەن قاتار كامەرالىق جانە كوشپەلى كەدەندىك تەكسەرىس جۇرگىزۋ ءراسىمى قايتا قارالادى. الداعى ۋاقىتتا زاڭ كەدەندىك رەتتەۋدى جەتىلدىرۋگە ۇلەسىن قوسادى دەپ سەنەمىز», دەدى پالاتا سپيكەرى.
سونىمەن قاتار بۇگىن دەپۋتاتتار «قازاقستان رەسپۋبليكاسىنىڭ ۇكىمەتى مەن بىرىككەن اراب امىرلىكتەرىنىڭ ۇكىمەتى اراسىنداعى قازاقستان رەسپۋبليكاسىنىڭ بىرىككەن اراب امىرلىكتەرىندەگى ەلشىلىگىنىڭ جانە بىرىككەن اراب امىرلىكتەرىنىڭ قازاقستان رەسپۋبليكاسىنداعى ەلشىلىگىنىڭ قاجەتتىلىكتەرىنە استانا قالاسىندا جانە ءابۋ دابي قالاسىندا جەر ۋچاسكەلەرىن وتەۋسىز پايدالانۋعا ءوزارا بەرۋ تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى.
ال «قوعامدىق كەڭەستەردىڭ قىزمەتى ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەناتورلار تۇزەتۋلەر ەنگىزىپ, ماجىلىسكە جىبەردى.
