قالالىق تسيفرلاندىرۋ باسقارماسى تاراپىنان بايلانىس ساپاسىن ارتتىرۋ ءۇشىن تالداۋ جۇمىستارى جۇرگىزىلىپ, ينتەرنەت جىلدامدىعى تومەن بىرقاتار شاعىناۋدان مەن تۇرعىن الاپتار انىقتالدى.
وسىعان وراي قاراتاۋ اۋدانىنا قاراستى «سولتۇستىك-باتىس» شاعىناۋدانىندا بازالىق ستانتسيا ورناتۋ جۇمىستارى قولعا الىنعان ەدى. ساپالى ينتەرنەتپەن قامتۋعا قاجەتتى قۇرىلعىنىڭ بارلىعى الىنىپ, مونتاجداۋ جۇمىستارى باستالدى. ءموبيلدى وپەراتورلاردىڭ WCDMA(3G) جانە LTE (4G) تەحنولوگيالار ارقىلى جۇمىس جاسايتىن بازالىق ستانتسيالارىن ورناتۋ ءۇشىن ارنايى انتەننالار قويىلدى.
تسيفرلاندىرۋ باسقارماسىنىڭ مالىمەتىنشە, اپتا سوڭىنا دەيىن تۇرعىندار ساپالى ينتەرنەتپەن قامتاماسىز ەتىلەدى.
