نۇر-سۇلتان قالاسىندا ورنالاسقان كارديوحيرۋرگيا ورتالىعىنا ناۋقاستار قازاقستاننىڭ كەز كەلگەن ايماعىنان پورتال, كۆوتا ارقىلى تۇسە الادى. وعان ەشقانداي شەكتەۋ جوق. وتا كەزەگىندە تۇرعان ناۋقاستار اسا كوپ ەمەس دەۋگە بولادى, شامامەن 1 ايداي عانا كۇتەدى.
ء«مامس اياسىندا وتا جاساتقىسى كەلەتىن ناۋقاستارعا مىندەتتى تۇردە ەكگ, ەحوكگ, حولتەر مونيتور ەكگ, جەدەل جاردەم كەزىندەگى ەكگ قاجەت. وسى تەكسەرۋلەردەن كەين ءبىزدىڭ ورتالىقتا اريتمولوگتىڭ كەڭەسى قاجەت. مامان كەڭەسىن الۋ ءۇشىن بايلانىس ورتالىعىنا حابارلاسىپ, الدىن الا جازىلۋ كەرەك», دەيدى ۇلتتىق عىلىمي كارديوحيرۋرگيا ورتالىعىنىڭ ينتەرۆەنتسيالىق اريتمولوگيا بولىمشەسىنىڭ مەڭگەرۋشىسى, مەديتسينا عىلىمدارىنىڭ دوكتورى, قاۋىمداستىرىلعان پروفەسسور, قازاق اريتمولوگتار قوعامىنىڭ پرەزيدەنتى ايان سۇلەيمەن ۇلى ءابدىراحمانوۆ.
ءبىراز ۋاقىت بۇرىن گيپەرتروفيالىق كارديوميوپاتيا دياگنوزىمەن تۇسكەن ناۋقاسقا كارديوحيرۋرگيا ورتالىعىنىڭ دارىگەرلەرى قازاقستاندا جانە ورتا ازيادا العاشقى رەت تەرى استىنا قويىلاتىن كارديوۆەرتەر-دەفيبريللياتور اپپاراتىن قويدى (S-ICD - subcutaneous implantable cardioverter-defibrillator). بۇل اپپاراتتىڭ ەرەكشەلىگى مۇلدەم قان-تامىر جۇيەسىنە ەڭگىزىلمەيدى, سونىمەن قاتار تەرى استىندا تۇرىپ كەنەتتەن بولاتىن جۇرەك ولىمىنەن قۇتقارادى. جاڭا جوعارى تەحنولوگيالىق قىزمەت تۇرىنە جاتاتىن بۇل وتا كارديوحيرۋرگيا ورتالىعىنىڭ كۇشىمەن جاسالدى.
«تاعى ءبىر ەرەكشە مىسال: ناۋقاس 36 جاستا, دياگنوزى - تولىق 3 ساناتتى اۆ-بلوكادا. بىرنەشە رەت ەلەكتروكارديوستيمۋلياتور اۋىستىرىلعان, بىراق قان-تامىر مەن جۇرەك ىشىندەگى ەلەكترودتارى قالا بەرگەن. ءبىزدىڭ ورتالىققا تۇسكەندە ستيمۋلياتوردىڭ ورنى ىرىڭدەپ, سەپسيس بولعان. بۇل جاعدايدا بارلىق ىشتەگى يمپلانتتاردى الۋ قاجەت, ىشتەگى ەلەكترودتار تامىرمەن - جۇرەكپەن ءبىتىپ كەتكەن. ولاردى الۋ ناۋقاستىڭ ومىرىنە وتە كۇردەلى, الماسقا امال جوق. ىشتەگى ەلەكترودتاردىڭ ءبارىن الىپ, ورنىنا تمد مەملەكەتتەرى ىشىندە العاشقى بولىپ 2017 جىلدىڭ 22 تامىزىندا ەلەكترودسىز دۇنيە جۇزىندەگى ەڭ كىشكەنتاي Micra ستيمۋلياتورىن ورناتتىق. قازىر ناۋقاستىڭ جاعدايى جاقسى, جىلىنا 1 رەت باقىلاۋعا كەلىپ تۇرادى» دەپ ەسكە الادى ا.ءابدىراحمانوۆ.
قازىرگى جاعدايدا كارديوحيرۋرگيا ورتالىعىندا جۇرەك ىرعاعىنىڭ بۇزىلۋىنا قاتىستى جوعارعى تەحنولوگيالىق زاماناۋي بارلىق وتالار جاساۋعا مۇمكىنشىلىك بار. بىلىكتى دارىگەرلەر ءۇشىن ءتىپتى جاڭا تۋعان نارەستەلەرگە دە وتا جاساۋ - قالىپتى جايت.
«جۇرەك ىرعاعىنىڭ بۇزىلۋى كوبىنە جۇرەك اقاۋى, يشەميا, قان قىسىمىنىڭ كوتەرىلۋى, ت.ب. جۇرەك اۋرۋلارىنىڭ سەبەبىنەن بولادى. سوندىقتان, مۇمكىندىگىنشە سپورتپەن اينالىسۋ, ديەتا ۇستانۋ, مايلى تاماقتان تەجەلۋ, ارتىق سالماقتان ارىلۋدىڭ جولىن ىزدەۋ قاجەت. جۇرەك اۋرۋلارىنىڭ الدىن الۋ – سالاۋاتتى ءومىر سۇرۋگە بايلانىستى», دەپ كەڭەس بەرەدى مامان.
