جاقىپ اسانوۆ سوت جۇيەسىن 2021 جىلدىڭ شىلدە ايىنان باستاپ كۇشىنە ەنەتىن جاڭا اكىمشىلىك راسىمدىك-پروتسەستىك كودەكسىنە دايىنداۋ بارىسى تۋرالى ايتتى.
قاسىم-جومارت توقاەۆ ءاربىر سوت زاڭ ۇستەمدىگىن قامتاماسىز ەتۋدەگى ءوزىنىڭ ءرولىن تەرەڭ ءتۇسىنۋى كەرەك ەكەنىنە باسا ءمان بەردى. مەملەكەت باسشىسىنىڭ پىكىرىنشە, بۇل ازاماتتاردىڭ قۇقىعى مەن ەركىندىگىن قورعاۋ, قولايلى ينۆەستيتسيالىق كليمات قالىپتاستىرۋ, كاسىپكەرلىكتى جانە تۇتاس ەكونوميكانى دامىتۋ بويىنشا ماڭىزدى مىندەت.
قازاقستان پرەزيدەنتى سوتتاردىڭ كاسىبيلىگى مەن ادالدىعى ەڭ باستى قۇندىلىق بولۋى كەرەك ەكەنىن اتاپ ءوتتى. سەبەبى الداعى ۋاقىتتا ىسكە اساتىن رەفورمانىڭ تابىستى بولۋى وسىعان تىكەلەي بايلانىستى.
