الماتى قالاسىنداعى «جاس وتاۋ» نەكە سارايىنىڭ ديرەكتورىنا, ەسەپشىسى مەن باس مامانىنا قاتىستى سوت وتىرىسى كەيىنگە قالدىرىلدى. بۇل تۋرالى «استانا» تەلەارناسى حابارلادى.
ولارعا «157 ميلليون تەڭگەنى جىمقىردى» دەگەن ايىپ تاعىلعان ەدى. اتالعان ىسكە نۇكتە قويىلۋى كەرەك بولاتىن. سوتقا كەلگەن بۇرىنعى ەسەپشى نازىم مامىرحانوۆانىڭ قورعاۋشىسى تەرگەۋ بارىسىندا قارجى پوليتسياسىنىڭ قىزمەتكەرلەرى شىعىن كولەمىن بولجاممەن عانا انىقتادى دەپ وتىر. «جاس وتاۋ» نەكە سارايىنىڭ قىزمەتكەرلەرى 2010-2012 جىلدار ارالىعىندا 2 مىڭنان اسا جۇپتىڭ نەكە قيۋ قارجىسىن قالتاعا باسقان كورىنەدى. «الايدا, ول ۋاقىت ارالىعىندا قانشا وتباسى شاڭىراق كوتەرگەنى تەكسەرىلمەدى», - دەيدى قورعاۋشىنىڭ ءبىرى. ال سوڭعى جۇرگىزىلگەن ساراپتامادا نەكە سارايىنان 157 ملن.ەمەس, 16 ملن. تەڭگەنىڭ جوعالعانى كورسەتىلگەن. ەستەرىڭىزدە بولسا, وتكەن جىلدىڭ قازانىندا قارجى پوليتسياسى «جاس وتاۋ» نەكە سارايىنىڭ قىزمەتكەرلەرىنە «قارجى جىمقىردى" دەگەن ايىپ تاعىپ, قىلمىستىق ءىس قوزعاعان بولاتىن. «ايىپتاۋشى تاراپ سوت پروتسەسىنە كۋاگەرلەردى قاتىستىردى. ولاردىڭ بارلىعى تىڭدالدى. بارلىعى ايىپتالىپ وتىرعاندارعا قارسى ەش نارسە ايتپادى. ولار اقشالارىن تەك كاسساعا عانا وتكىزگەن. ءبىز ەندى زاڭدى شەشىمدى كۇتەمىز»,-دەيدى ن.مامىرحانوۆانىڭ قورعاۋشىسى ايان كارىمحانوۆ.
باقىتبەك كەنەش ۇلى.
دەرەككوز: «استانا» تەلەارناسى
