«وپپوزيتسيا وكىلدەرىنىڭ بيلىكتى باسىپ الۋ ارەكەتتەرى زاڭسىز ءارى كونستيتۋتسياعا ساي ەمەس», – دەدى ۋكراينانىڭ ايماقتىق پارتيا دەپۋتاتى ۆلاديمير ولينىك. بۇل تۋرالى Obozrevatel.com حابارلادى.
«وپپوزيتسيا عيماراتتاردى باسۋ ارقىلى كونستيتۋتسياعا قايشى ارەكەت جاساۋدا. بۇل تارتىپسىزدىكتەردى توقتاتپاساق ەرتەڭ ولار تۇرعىن ۇيلەرگە كىرە باستايدى», – دەدى دەپۋتات. ول سونداي-اق وپپوزيتسيونەرلەردىڭ بيلىككە قول جەتكىزۋ ماقساتىندا بولشەۆيكتىك ءتاسىل قولدانىپ جاتقاندارىن العا تارتتى.
ۋكراينادا جاپپاي نارازىلىق اكتسياسى 21 قاراشادا ۇكىمەتتىڭ ەۋروپا وداعىمەن قاۋىمداستىق قۇرۋ جونىندەگى كەلىسىمگە دايىندىقتى توقتاتۋىنان كەيىن باستالدى. ۆيلنيۋستە وتكەن «شىعىس ارىپتەستىگى» سامميتىندە اتالمىش كەلىسىمگە قول قويىلادى دەپ كۇتىلگەن. الايدا, سامميت بارىسىندا ەۋروپا وداعىنىڭ باسشىلارى ۋكراينا پرەزيدەنتى ۆيكتور يانۋكوۆيچتى قاۋىمداستىق جونىندەگى كەلىسىمگە قول قويۋعا كوندىرە المادى. وسى كەزدەن باستاپ ەۋروينتەگراتسيانى قولداۋشىلار مەملەكەتتىك مەكەمەلەردى باسىپ الۋعا ارەكەتتەنىپ, كۇندەلىكتى نارازىلىق اكتسيالارىن وتكىزىپ تۇردى. ءتىپتى ولار كۇننىڭ سۋىعىنا قاراماستان الاڭدا قونا باستاعان.
ايدار ورىسباەۆ.
دەرەككوز: Obozrevatel.com
