ەڭبەكشىلەردىڭ دەمالىسى ءۇشىن قولايلى جاعداي جاساۋ جانە 2013 جىلعى جەلتوقسان مەن 2014 جىلعى قاڭتارداعى جۇمىس كۇنىن ۇتىمدى پايدالانۋ ماقساتىندا پرەمەر-مينيستر سەرىك احمەتوۆ دەمالىس كۇنىن 2013 جىلعى 28 جەلتوقسان سەنبىدەن 2014 جىلعى 3 قاڭتار جۇماعا اۋىستىرۋ تۋرالى ۇكىمەت قاۋلىسىنا قول قويدى. بۇل تۋرالى «حابار» تەلەارناسى حابارلادى.
قاۋلىعا سايكەس, قاجەتتى ءونىم شىعارۋ, قارجى قىزمەتتەرىن قوسا العاندا, قىزمەتتەر كورسەتۋ, سونداي-اق قۇرىلىس وبەكتىلەرىن ىسكە قوسۋ ءۇشىن ەڭبەك, ماتەريالدىق جانە قارجى رەسۋرستارىمەن قامتاماسىز ەتىلگەن ۇيىمدارعا كاسىپوداق ۇيىمدارىمەن كەلىسىم بويىنشا 2014 جىلعى 3 قاڭتاردا جۇمىس جۇرگىزۋگە قۇقىق بەرىلەدى.
كورسەتىلگەن كۇنگى جۇمىس قازاقستان رەسپۋبليكاسىنىڭ قولدانىستاعى زاڭناماسىنا سايكەس وتەلەدى.
دەرەككوز: «حابار» تەلەارناسى
