مۋزەي ەل حالقىنا, تۋريستەرگە, شەتەلدىك قوناقتارعا قازاقستاننىڭ جەر استى بايلىعىن تانىستىرىپ, اعارتۋ جۇمىسىن جۇرگىزۋ ماقساتىندا اشىلعان. بۇدان بولەك, وقۋشىلار مەن ستۋدەنتتەر مۋزەيدەن وزدەرىنىڭ زەرتتەۋ جۇمىستارىنا قاجەتتى ماتەريالدار الا الادى.
ماعزۇم مىرزاعاليەۆتىڭ سوزىنشە, مۋزەيدى گەولوگ ماماندىعىن ناسيحاتتاۋ ءۇشىن وقىتۋ-اعارتۋ ورتالىعى رەتىندە ودان ءارى دامىتۋ قاجەت.
«وزدەرىڭىزگە بەلگىلى, گەولوگيا سالاسىندا ينجەنەر كادرلاردىڭ تاپشىلىعى بار. وسىعان بايلانىستى مۋزەي بازاسىندا جەر تۋرالى عىلىمي ورتالىق اشۋ كەرەك. وندا سالا ءۇشىن كادرلىق رەزەرۆ دايىندالىپ, جاس گەولوگتارعا, سالالىق جوو-لاردىڭ ستۋدەنتتەرىنە, جاس ماماندارعا كاسىبي ورتا قالىپتاسادى. سونىمەن بىرگە وقۋشىلاردىڭ نازارىن گەوەكولوگيا مەن جەر قويناۋى پروبلەمالارىنا اۋدارۋعا بولادى», - دەپ اتاپ ءوتتى مينيستر.
سونىمەن قاتار مينيستر مۋزەي تەك گەولوگيالىق ۇيىمدار اراسىندا ماڭىزدى ورىن الىپ قانا قويماي, قالانىڭ «ۆيزيتتىك كارتاسىنا» اينالاتىنىنا سەنىم ءبىلدىردى.
«مۋزەيدە گەولوگيا سالاسىنىڭ ماسەلەلەرى قامتيتىن تاقىرىپتىق ەكسكۋرسيالار دا وتكىزىپ تۇرۋ كەرەك»,- دەپ ايتتى مينيستر.
اشىلۋ سالتاناتىندا مۋزەي جەتەكشىسى, قازاقستاننىڭ ەڭبەك سىڭىرگەن گەولوگى ولجاباي يسمايلوۆ مۇندا قازاقستاننان بولەك, ەۋروپا, افريكا, وڭتۇستىك امەريكا, اۆستراليا مەملەكەتتەرىنەن جينالعان ەكسپوناتتار بار ەكەنىن اتاپ ءوتتى.
«كوللەكتسيالىق ۇلگىلەردىڭ ءبىرازىن گەولوگ-ارىپتەستەرىمىز قايتارىمسىز بىزگە بەردى. مۋزەي قورى ۇدايى جاڭارىپ, جاڭا دۇنيەلەر ءتۇسىپ تۇرادى. سوڭعى جىلدارى كوللەكتسيانىڭ تەك عىلىمي ەمەس, ەستەتيكالىق قۇندىلىعىنا دا نازار اۋدارىلۋدا», - دەپ اتاپ ءوتتى ول.
قازىرگى ۋاقىتتا مۋزەيدە مينەرالوگيالىق جانە پالەونتوگيالىق كوللەكتسيا, 19-20-عاسىرلارداعى گەولوگيالىق ادەبيەت باسىلىمدارى, بۇرىن قولدانىلعان گەولوگيالىق قۇرالدار, زاماناۋي فاۋنيستيكالىق قالدىقتار ورنالاسقان. ەكپوزياتسيادا كريستالداردىڭ, قۇندى مينەرالداردىڭ, پالەونتولوگيالىق قالدىقتاردىڭ كريستالل ۇلگىلەرى بار. مىسالى, ساف التىن, كۇمىس, تەمىر, جۇبارجات, ەۆدياليت, امەتيست, يزۋمرۋد, توپاز, تانزانيت, چارويت, نەفەلين, مينەرالدانعان اعاش جانە تاعى باسقالارىن ەرەكشە اتاپ وتۋگە بولادى. مۋزەيدەگى جالپى ەكسپوناتتار سانى – 750 دانانى قۇرايدى.
