«سوڭعى ءۇش جىلدا قازاقستان سۋ از تسيكلىنە كىردى. 2019 جىلى وزەن اعىسىنىڭ جالپى كولەمى 83 كم3-ءدى قۇرادى. بۇل ورتاشا كوپ جىلدىق كورسەتكىشتەن 20%-عا از. ايتا كەتۋ كەرەك, رەسپۋبليكا بويىنشا پايدالانىلاتىن سۋدىڭ 97%-ى وڭتۇستىكتەگى ءتورت وبلىسقا تيەسىلى. رەسپۋبليكا بويىنشا پايدالانىلعان سۋدىڭ ناقتى كولەمى 13,3 كم3 ء–دى قۇرادى. بۇل 2019 جىلمەن سالىستىرعاندا 1 كم3-گە ارتىق. بيىلعى ۆەگەتاتسيالىق كەزەڭ تۇراقتى ءوتتى. دەگەنمەن دە وتە شيەلەنىستى بولدى», - دەدى ماعزۇم مىرزاعاليەۆ ۇكىمەت وتىرىسىندا.
ايتا كەتەيىك, مەملەكەت باسشىسى قاسىم-جومارت توقاەۆ 2030 جىلعا دەيىن سۋارمالى جەر كولەمىن ءۇش ميلليون گەكتارعا دەيىن جەتكىزۋدى تاپسىرعان.
ء«بىزدىڭ ەسەپتەۋلەرىمىزگە سايكەس, سۋ تۇتىنۋدىڭ اعىمداعى ءۇردىسى 1,5 ملن.گا-عا 13,3 كم3 كولەمىندە ساقتالسا, بولجامدى تاپشىلىق 2030 جىلعا قاراي 11,7 كم3-تى قۇراۋى مۇمكىن.وسىعان بايلانىستى, قازىردىڭ وزىندە سۋ تۇتىنۋدى قىسقارتۋ بويىنشا شارالاردى جۇزەگە اسىرۋ قاجەت», - دەپ ناقتى شارالار ۇسىندى ماعزۇم مىرزاعاليەۆ.
سونىمەن, بىرىنشىدەن, سۋ تاپشىلىعىن بولدىرماۋ ماقساتىندا كۇرىش ەگىسىن 29 مىڭ گەكتارعا ازايتۋ قاجەت. (قىزىلوردا - 15 مىڭ گا, الماتى 10 مىڭ گا, تۇركىستان 4 مىڭ گا) بۇل ءبىر كۋب كيلومەتر سۋدى ۇنەمدەۋگە مۇمكىندىك بەرمەك. ەكىنشىدەن, كەمىندە 750 مىڭ گەكتار الاڭدا سۋارۋدىڭ سۋ ۇنەمدەۋشى تەحنولوگيالارىن ەنگىزۋدى جالعاستىرۋ كەرەك. بۇل ورتاشا العاندا 30%-عا دەيىن سۋدى ۇنەمدەۋگە سەپتىگىن تيگىزەدى. ۇشىنشىدەن, 6 مىڭ شاقىرىم سۋارۋ جەلىلەرىن قايتا جاڭارتۋ جانە 119 نەگىزگى ماگيسترالدىق كانالداردا تسيفرلاندىرۋدى جاپپاي ەنگىزۋ ەسەبىنەن جىلىنا 2 كم3 سۋ ۇنەمدەلەدى. اتالعان قاجەتتىلىكتەرگە 5 جىلدا رەسپۋبليكالىق بيۋدجەتتەن جانە حالىقارالىق قارجى ۇيىمدارىنان 192 ملرد.تەڭگە جۇمسالادى. تورتىنشىدەن, 10 جىلدا 3,6 كم3 كولەمىندە سۋ جيناقتاۋ ءۇشىن 39 جاڭا سۋ قويماسى سالىنادى. 394 مىڭ گەكتار جاڭا سۋارمالى جەر سۋ كوزىمەن قامتاماسىز ەتىلەدى.
«جوعارىدا اتالعان ءىس-شارالاردى ءساتتى ىسكە اسىرعان جاعدايدا شامامەن سەگىز ءبۇتىن وننان سەگىز 8,8 كم3 سۋدى قوسىمشا شوعىرلاندىرۋعا مۇمكىندىك پايدا بولادى. سونىمەن, ىلعال سۇيگىش داقىلداردىڭ, ياعني كۇرىش پەن ماقتا ەگىستىك القاپتارىن كەزەڭ-كەزەڭىمەن ازايتۋ قاجەت. جاڭا سۋ قويمالارىن سالۋ جانە كانالداردىڭ تەحنيكالىق جاي-كۇيىن جاقسارتۋ جونىندەگى جوبالار جالعاستىرىلاتىن بولادى. سۋارۋدىڭ سۋ ۇنەمدەۋ تەحنولوگيالارىن ەنگىزبەستەن سۋارمالى جەرلەردىڭ اۋدانىن ۇلعايتۋ مۇمكىن ەمەس. سۋارمالى سۋدى ۇتىمدى جانە ۇنەمدى پايدالانۋ ماقساتىندا 2025 جىلعا دەيىن 119 نەگىزگى كانالداردا جاپپاي تسيفرلاندىرۋدى جۇرگىزۋ قاجەت. وڭتۇستىك وڭىرلەردەگى ترانسشەكارالىق كوزدەرگە تاۋەلدىلىكتى نازارعا الا وتىرىپ, جاڭا سۋارمالى جەرلەر سۋمەن قامتاماسىز ەتىلگەن شىعىس جانە سولتۇستىك وڭىرلەردە ەنگىزىلۋگە ءتيىس», - دەپ ءتۇيدى ءسوزىن مينيستر.
