ستاتيستيكالىق مالىمەتتەرگە قاراساق, الەمدە ءاربىر 24 سەكۋند سايىن ءبىر ادام جول اپاتىنان قازا تابادى ەكەن. وسىلايشا كۇنىنە ءۇش مىڭنان استام ادام, جىل سايىن 1,35 ميلليون ادام جول-كولىك وقيعاسىنان كوز جۇماتىن كورىنەدى. بۇدان بولەك 10 ميلليونداي ادام جاراقات الىپ, مۇگەدەك ارباسىنا تاڭىلادى.
– ءبىزدىڭ باتىس قازاقستان وبلىسىندا 2020 جىلدىڭ 10 ايىندا 247 جول-كولىك وقيعاسى ورىن الدى. وسى اپاتتاردىڭ سالدارىنان 57 ادام قازا تاۋىپ, 298 ادام ءار ءتۇرلى دەنە جاراقاتىن الدى. بالالاردىڭ قاتىسۋىمەن 31 وقيعا بولىپ, ونىڭ سالدارىنان 1 ءسابي قايتىس بولىپ, 34 ادام جاراقات الدى, – دەيدى باتىس قازاقستان وبلىستىق پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆ.
بىرىككەن ۇلتتار ۇيىمى قاراشا ايىنىڭ ءۇشىنشى جەكسەنبىسىن دۇنيەجۇزىلىك جول-كولىك وقيعاسىنىڭ قۇرباندارىن ەسكە الۋ كۇنى دەپ بەلگىلەگەن بولاتىن.
بىرىككەن ۇلتتار ۇيىمىنىڭ دەرەكتەرىنە قاراعاندا, جول-كولىك اپاتىندا قازا تاپقانداردىڭ جارتىسىنان استامى – جاياۋ جۇرگىنشىلەر, موتوتسيكل جانە ۆەلوسيپەد جۇرگىزۋشىلەرى ەكەن. مۇنداي وقيعا ءبىزدىڭ ەلىمىزدە دە از ەمەس. سوندىقتان بيلىك ورىندارى, قۇقىق قورعاۋ ورگاندارى جولداردى جوسپارلاپ سالۋدان باستاپ, جىلدامدىقتى ارتتىرماۋ, كولىك قۇرالىن ماس كۇيدە جۇرگىزۋگە جول بەرمەۋ, قاۋىپسىزدىك بەلدىگىن تاعۋ, موتوتسيكل جۇرگىزۋشىلەرىنە دۋلىعا كيۋ, بالالارعا ارنالعان ورىندىق قويۋ بويىنشا بىرقاتار شارا قابىلداپ, تۇرعىندار اراسىندا ۇنەمى ءتۇسىندىرۋ جۇمىستارىن جۇرگىزىپ كەلەدى.
2019 جىلى 20 جەلتوقساندا بالالار مەن جاسوسپىرىمدەر زارداپ شەگەتىن جول-كولىك وقيعالارىنىڭ الدىن الۋ, وسى يگى ىسكە جۇرتشىلىقتىڭ نازارىن اۋدارتۋ ماقساتىندا ەني, شەلل جانە EASST كومپانيالارىنىڭ وكىلى «گاۋھار جولى» قوزعالىسى پوليتسيا دەپارتامەنتىنە جولدا ءجۇرۋ ەرەجەسىن, اسىرەسە بالالاردىڭ قاۋىپسىزدىگىن قامتاماسىز ەتۋ بويىنشا شەبەرلىك ساعاتىن وتكىزۋگە ارنالعان ءموبيلدى الاڭ مەن بۇرىش جاساقتاپ بەرگەن. بۇل الاڭدا جولدا ءجۇرۋ ەرەجەسىن قالاي ساقتاۋ كەرەك ەكەنىن كورسەتەتىن ويىن تۇرىندە كەڭىستىك بار. وندا كولىك قۇرالىنا قويىلاتىن ناقتى تالاپتار كورىنىپ تۇر. وسى ءموبيلدى الاڭدا بالالارعا باعدارشامنىڭ قاي ءتۇسى جانعاندا جاياۋ جۇرگىنشىلەر وتكەلىنەن ءوتۋ, جول بەلگىلەرىن ءبىلۋ داعدىلارىن ۇيرەتەدى جانە بالالاردى كوشەدە, جولدا قاۋىپسىزدىك ەرەجەلەرىن ساقتاۋعا داعدىلاندىرادى. بۇل مەكتەپ وقۋشىلارىن جول ەرەجەلەرىنە باۋلۋعا وتە پايدالى قۇرالدار.
بيىل دا قاراشا ايىندا «گاۋھار جولى» قوعامدىق بىرلەستىگى ورال قالالىق پوليتسيا باسقارماسى پاترۋلدىك پوليتسيا باتالونىمەن بىرلەسىپ, ورال قالاسىنداعى «اتريۋم» ساۋدا ءۇيىنىڭ ءبىرىنشى قاباتىندا اكتسيا وتكىزدى.
بولاتبەك بەلگىبەكوۆتىڭ ايتۋىنشا, تەرەكتى, سىرىم جانە قاراتوبە اۋداندارىنداعى مەكتەپتەردە دە وقۋشىلارعا جولدا ءجۇرۋ ەرەجەسىن تۇسىندىرەتىن تاقىرىپتىق كەشتەر ۇيىمداستىرىلعان. پوليتسيا دەپارتامەنتىنىڭ قىزمەتكەرلەرى مەكتەپتەرگە ارنايى بارىپ, وقۋشىلارعا جوعارىدا ايتىلعان موبيلدىك الاڭدا پراكتيكالىق ساباقتار وتكىزگەن.
كورنەكى قۇرالداردى پايدالانىپ, پوليتسيا قىزمەتكەرلەرىن قاتىستىرىپ وتكىزگەن مۇنداي شارالاردىڭ ماڭىزى ۇلكەن. وقۋشىلارعا ەرەكشە اسەر ەتەدى.
«مۇنداي ساباقتاردى بارلىق اۋدانداردا وتكىزۋ جوسپارلانعان ەدى, الايدا قازىرگى كارانتين جاعدايىندا وقۋشىلاردىڭ ونلاين فورماتىندا وقىتۋعا كوشۋىنە وراي ازىرگە توقتاتىلىپ تۇر», دەيدى ب.بەلگىبەكوۆ.
باتىس قازاقستان وبلىسى
