«سىبايلاس جەمقورلىق ءۇشىن سوتتالعانداردى جازانى وتەۋ ءۇشىن بىردەن قاۋىپسىزدىگى تومەن قىلمىستىق اتقارۋ جۇيەسى مەكەمەسىنە جىبەرۋ مۇمكىندىگى الىنىپ تاستالدى. سىبايلاس جەمقورلار ءۇشىن مۇنداي ارتىقشىلىق ( جالپى قىلمىستار ءۇشىن سوتتالعاندارعا قاۋىپسىزدىگى تومەن مەكەمەلەرگە اۋىسۋ ءۇشىن جابىق ۇلگىدەگى تۇزەۋ مەكەمەلەرىندە كەمىندە ەكى جىل وتكىزۋ قاجەت بولاتىن) بەلگىلى ءبىر سىن تۋدىرعان ەدى. سوندىقتان پرەزيدەنت سىبايلاس جەمقورلار ءۇشىن جازانى وتەۋ شارتتارىن وزگەرتۋ تۋرالى شەشىم قابىلدادى», دەدى ولجاس بەكتەنوۆ وكق-دا وتكەن ءباسپاسوز ءماسليحاتىندا.
ونىڭ ايتۋىنشا, ەندى پاراقورلىقتىڭ اۋىر قۇرامى ءۇشىن سوتتالعاندار (ايتارلىقتاي جانە ءىرى مولشەردە پارا الۋ جانە بەرۋ, قۇقىق قورعاۋ ورگانى قىزمەتكەرىنىڭ نەمەسە سۋديانىڭ پارا الۋى, پاراقورلىققا بىرنەشە رەت دەلدال بولۋ) جازاسىن وتەۋ ءۇشىن قاۋىپسىزدىگى ورتاشا مەكەمەلەرگە, ال اسا ءىرى مولشەردە پارا العان نەمەسە بەرگەن ادامدار ماكسيمالدى قاۋىپسىزدىكتەگى مەكەمەلەرگە جىبەرىلەتىن بولادى.
«وسىلايشا, مۇنداي ساناتتاعى ادامدار ءۇشىن جازانى جەڭىل وتەۋگە قۇقىقتىق توسقاۋىل قويىلدى. قاۋىپسىزدىگى تومەن مەكەمەلەرگە اۋىسۋ ءۇشىن ەندى ولار زالالدى وتەۋمەن قاتار, تاعايىندالعان جازانىڭ ءبىر بولىگىن تۇزەۋ مەكەمەلەرىندە ۇلگىلى مىنەز-ق ۇلىقپەن وتەۋى ءتيىس. بۇنىڭ قىلمىستىق جازالاۋ ماقساتتارىنا تولىق سايكەس كەلەتىنىنە, سۇرىنگەندەردى تۇزەتۋ جولىندا ءوزىنىڭ وڭ تاربيەلىك اسەرىن بەرەتىنىنە تولىقتاي سەنەمىز», دەدى ول.
