بىرىككەن كورولدىك كولەمىندە ۆيرۋستىڭ جاڭا شتاممى جايىنداعى اقپارات 14 جەلتوقساندا جارىق كورىپ, ەلدىڭ پرەمەر-ءمينيسترى بوريس دجونسون 20 جەلتوقساندا لوندوندا, شىعىس, وڭتۇستىك شىعىس جانە ۋەلس ايماقتارىندا لوكداۋن جاريا ەتىسىمەن ەۋروپانىڭ بىرقاتار مەملەكەتتەرى ۇلىبريتانيامەن اراداعى بارىس-كەلىسكە شەكتەۋ قويا باستادى.
اتاپ ايتقاندا, گەرمانيا دەنساۋلىق ساقتاۋ ءىسىنىڭ باسشىسى يەنس شپان ۇلىبريتانيادان دۇيسەنبى كۇنى, ياعني 21 جەلتوقساننان باستاپ اۋە بايلانىسىنىڭ توقتايتىنىن حابارلاسا, فرانتسيا 48 ساعاتقا بىرىككەن كورولدىكتەن جولاۋشى جانە جۇك تاسىمالىن دوعارا تۇرۋدى شەشكەن.
سونىمەن قاتار نيدەرلاند مەملەكەتى اۋە جانە تەمىرجول قاتىناسىن جاڭا جىلدىڭ باسىنا دەيىن ۇزىلەتىنىن مالىمدەپ, يتاليا ۇكىمەتى دە ارالعا سوڭعى ەكى اپتا ىشىندە بارعان ءوز ازاماتارىنا ەلگە قايتا كىرۋدى كەيىن شەگەرۋ قاجەتتىگىن ايتىپ, ەكى اراداعا اۋە بايلانىسىنىڭ توقتاي تۇراتىنىن حابارلادى. بەلگيا كورولدىگى دە ەتەك-جەڭىن قىمتاپ, ۇلىبريتانياعا ۇشاق ۇشىرىپ, ولاردان قابىلداۋدى ازىرگە توقتاتاتىنىن مالىمدەگەن.
يتاليا ۇكىمەتىندەگى دەنساۋلىققا جاۋاپ بەرەتىن ۆەدومستۆونىڭ حابارلاۋىنشا جاڭا شتاممنىڭ جۇعۋ جىلدامدىعى بۇرىنعىدان الدەقايدا جوعارى كورىنەدى.
قاۋىپتى شتاممعا قاتىستى قادامداردى ەو-عا مۇشە ەلدەردىڭ بارلىعى بىردەي قابىلداپ جاتىر. ماسەلەن, ەستونيا مەن لاتۆيا دا جىلدىڭ اياعىنا دەيىن ۇلىبريتانيامەن اراداعى اۋە قاتىناسىن توقتاتا تۇرماقشى.
جاڭا شتامم ەو قۇرامىنان باس تارتقان ۇلىبريتانيانى وقشاۋلاۋدا كارى قۇرلىقتاعى وداقتاستار ءۇشىن «قۇلاننىڭ قاسىنۋىنا, مىلتىق شۇرىپپەسىنىڭ باسىلۋىنا» ساياتىنداي جاقسى ءبىر تەتىك بولعانعا ۇقسايدى.
