الايدا ساقتاندىرۋ مارتەبەسىن الۋ ءۇشىن «Saqtandyry» اقپاراتتىق جۇيەسىنە جالدامالى قىزمەتكەرلەردىڭ دەرەكتەرىن ەنگىزۋ كەرەك. قازىر بۇل جۇمىستار تولىقتاي اياقتالىپ قالدى. بۇل تۋرالى وڭىرلىك كوممۋنيكاتسيالار قىزمەتىندە «الەۋمەتتىك مەديتسينالىق ساقتاندىرۋ قورى» كەاق قىزىلوردا وبلىسى بويىنشا فيليالىنىڭ ديرەكتورى باقىت يسماحانبەتوۆ مالىمدەدى.
«ساقتاندىرىلماعانداردىڭ اراسىندا ۇكىمەت قاۋلىسىنا سايكەس 2021 جىلدىڭ 1 قاڭتارىنا دەيىن جارنالار مەن اۋدارىمدار تولەۋدەن بوساتىلعان شاعىن جانە ورتا بيزنەس سۋبەكتىلەرىنىڭ قىزمەتكەرلەرى بولۋى مۇمكىن. جارنالاردىڭ بولماۋىنا قاراماستان, مۇنداي قىزمەتكەرلەردى ساقتاندىرۋ ءۇشىن جۇمىس بەرۋشىلەر msb.fms.kz ۆەب-سايتىنا قىزمەتكەرلەر تۋرالى مالىمەتتەردى ەنگىزۋى كەرەك, ياعني ولاردىڭ مارتەبەسىن ساقتاۋى كەرەك. الداعى ۋاقىتتا بۇل قىزمەتكەرلەر ءمامس جۇيەسىندەگى بارلىق قىزمەت تۇرلەرىن ەركىن الا الادى», دەدى باقىت تورعايباي ۇلى.
11 ايدىڭ قورىتىندىسى بويىنشا تمككك جانە ءمامس پاكەتتەرى شەڭبەرىندە كورسەتىلگەن مەديتسينالىق قىزمەتتەر ءۇشىن 55 340 741,8 مىڭ تەڭگە, ياعني جىلدىق كولەمنىڭ 82 پايىزى تولەندى. سونىمەن قاتار, شىعىستاردىڭ باسىم بولىگى ستاتسيونارلىق مەديتسينالىق كومەككە جۇمسالعان. بيىلعى جىلى جوسپارلى تۇردە ءوڭىردىڭ ستاتسيونارلارىندا 71 588 ادام ەمدەلدى.
وڭىردە 2021 جىلعا ارنالعان مەديتسينالىق قىزمەتتەردى ساتىپ الۋ بيۋدجەتى 65,6 ملرد تەڭگەگە بولىپ وتىر. ونىڭ 42,8 ملرد تەڭگەسى تەگىن مەديتسيتسنالىق كومەكتىڭ كەپىلدى كولەمى اياسىندا, 22,8 ملرد تەڭگەسى ءمامس پاكەتىندە. پاتسيەنتكە مەديتسينالىق كومەك كورسەتۋدەن باس تارتىلسا نەمەسە ءتيىستى تۇردە كورسەتىلمەسە, وندا 1406 ءنومىرى, «Qoldau - 24\7» ءموبيلدى قوسىمشاسى نەمەسە «SaqtandyruBot» Telegram-بوت بويىنشا حابارلاسۋ قاجەت. قوردىڭ ماماندارى مەن ساراپشىلارى جەدەل جاۋاپ بەرىپ, قاجەتتى كومەك كورسەتەدى.
