قازىرگى تاڭدا جۇرەك-قانتامىر اۋرۋلارىنان بولاتىن ءولىم-ءجىتىم دۇنيەجۇزىندە ءبىرىنشى ورىن الادى. سوندىقتان جۇرەك-قانتامىرى كەسەلدەرىن اسقىندىرماي, الدىن الۋ شارالارى اسا ماڭىزدى.
جۇرەك-قانتامىر پاتولوگياسى بار پاتسيەنتتەردىڭ 80%-دان استامىندا كارديولوگيالىق اۋرۋلاردى ۋشىقتىرىپ, ءومىر ءسۇرۋ ساپاسىن تومەندەتىپ, ادامنىڭ جۇمىسى مەن الەۋمەتتىك بەلسەندىلىگىنە اسەر ەتەتىن مازاسىزدىق, فوبيالىق جانە كۇيزەلىس بەلگىلەرى بايقالادى.
سوندىقتان بۇل ناۋقاستار ستاتسيونار جاعدايىندا ەمدەلەدى جانە پسيحولوگيالىق كومەكپەن كارديولوگيالىق وڭالتۋ شارالارىن دا تالاپ ەتەدى.
مازاسىزدىق قانداعى سترەسس گورموندارىنىڭ (كاتەحولاميندەر) دەڭگەيىن كوتەرىپ, اعزانى بەلسەندىرەتىن جانە تىنىشتاندىراتىن جۇيەلەر اراسىنداعى تەڭگەرىمنىڭ بۇزىلۋىنا اكەلەدى.
وسى ماسەلەگە وراي, الماتىداعى كارديولوگيا جانە ىشكى اۋرۋلار عزي يوگاعا نەگىزدەلگەن كۇيزەلىسكە جەڭۋ ادىستەرىن پايدالانۋ ارقىلى پسيحولوگيالىق كومەك كورسەتەتىن كارديولوگيالىق وڭالتۋ جۇمىستارى ءساتتى جۇرگىزىپ جاتىر. بۇل تىنىس الۋ جاتتىعۋلارى جانە مەدياتيۆتى پراكتيكانىڭ ەلەمەنتتەرى (mindfulness based stress reduction).
ەمحانانىڭ پسيحوتەراپەۆى راشيد ازيزوۆتىڭ ايتۋىنشا, بۇل جاتتىعۋلار كارديوۆاسكۋليارلىق پاتولوگيانىڭ قاۋىپ فاكتورلارىن تومەندەتۋگە مۇمكىندىك بەرەدى. جۇرەك جيىرىلۋى مەن ارتەريالىق قان قىسىمى جيىلىگى كورسەتكىشتەرىنىڭ تومەندەۋى سترەسس گورموندارىنىڭ شىعۋىن تەجەيتىن ۆەگەتاتيۆتىك نەرۆ جۇيەلەرىنىڭ پاراسيمپاتيكالىق بولىمدەرىنىڭ جوعارىلاۋى ارقىلى قول جەتكىزىلەدى.
وڭ ناتيجە جاس ادامداردا عانا ەمەس, سونىمەن قاتار ەگدە پاتسيەنتتەردە دە بايقالادى, دەيدى راشيد ازيزوۆ. ساباقتار ورىندىقتا وتىرعان كۇيدە, ديافراگمالدى تىنىس الۋ جاتتىعۋلارى جانە مىندەتتى تەوريا بولىگىمەن مەديتاتسيا جاساي وتىرىپ, توپتاردا اپتاسىنا 2 رەت وتەدى.
وسىنداي تورىعۋ مەن كۇيزەلىسكە توزىمدىلىكتى ارتتىرۋ كەشەندەرى پاتسيەنتتەردىڭ سەنىمدىلىگىن قايتارۋعا, ءومىر ءسۇرۋ ساپاسىن جاقسارتۋعا, قاۋىپ فاكتورلارىن ازايتىپ جانە سوزىلمالى جۇرەك-قانتامىرى دىمكاستىگىنە قاتىستى شاعىمداردىڭ سانىن ازايتۋعا كومەكتەسەدى.
كارولينا ۋنيۆەرسيتەتىنىڭ (شۆەتسيا) زەرتتەۋشىلەر توبىنىڭ جۇرەكشە فيبريللياتسياسى بار پاتسيەنتتەردىڭ قاتىسۋىمەن جۇرگىزگەن زەرتتەۋى وسىنداي پاتسيەنتتەردىڭ ءومىر ءسۇرۋ ساپاسىن جاقسارتۋداعى يوگانىڭ مۇمكىندىگىن دالەلدەدى.
تەرەڭ دەم الۋ جاتتىعۋلارىنا نەگىزدەلە وتىرىپ, جۇرەك-قانتامىر اۋرۋلارى بار پاتسيەنتتەر ءۇشىن ارنايى ازىرلەنگەن يوگا ساباقتارىنىڭ باعدارلاماسىنا قاتىسۋشىلاردىڭ ادەتتەگى توپتارعا قاراعاندا پسيحيكالىق كۇيىنىڭ كورسەتكىشتەرى جوعارى بولدى. الىنعان مالىمەتتەر بويىنشا, اۆتورلار يوگا پاتسيەنتتەرگە جۇرەكشە فيبريللياتسياسىنىڭ ەموتسيالىق سالدارىمەن كۇرەسۋگە مۇمكىندىك بەرەتىن پراكتيكالىق اسپاپتاردىڭ ءبىرى بولاتىندىعىن بولجاپ وتىر.
